Iruẹmwi 11

Evbayayi Kevbe Ilele Ẹvbo Nẹi Yẹ Osanobua

De aro evbayayi kevbe ilele ẹvbo nẹi ma? (1)

Ivbi Otu e Kristi gha yayi wẹ Osanobua nọ re Osanagbeha nọ ra? (2)

Vbọzẹ ne Ivbi Otu e Kristi ẹmwata i na dugie Krismasi, Ista, ra avbe ẹdubiẹmwẹ? (3, 4)

Eniwu gha sẹtin kuan enirrọ ra? (5)

Jesu wu ye uhunmwu ugbugbe ra? (6)

Vbọ hiunsi sẹ hẹ na ye ẹko rhiẹnrhiẹn Osanobua? (7)

1. Ẹire evbayayi hia kevbe ilele ẹvbo ọre nẹi ma. Sokpan Osanobua ma rhie akueyi ne iran adeghẹ iran ke ugamwẹ ohoghe rre ra ọ na gbodan ghe imamwaemwi ọghe Baibol.—Matiu 15:6.

2. Osanagbeha: Osanagbeha ẹre Jehova khin ra—emwa eha vbuwe Osanobua ọkpa ra? Ẹn o! Jehova, ne Erha, ọre “Osanobua ọkpa ne ọ re ọghe ẹmwata.” (Jọn 17:3; Mak 12:29) Jesu ọre ọmọdiọn Nokpia Ọghẹe nọbiẹe, kevbe wẹ ototọ Osanobua irẹn ye. (1 Kọrinti 11:3) Ne Erha kpọlọ sẹẹ ne Nokpia. (Jọn 14:28) Orhiọn nọhuanrẹn i re ọmwa; ọ keghi re ẹrhiọn izọghae ne Osanobua ya ru emwi.—Gẹnẹsis 1:2; Iwinna 2:18.

3. Krismasii Kevbe Ista: A ma biẹ Jesu vbe December 25. Odẹ October1, ọre a na biẹ ọre, ẹghẹ vbe ukpo ne avbe ọsuohuan ya-viọ ohuan ọghe iran ladian vbe asọn. (Luk 2:8-12) Jesu ma yiyi ẹre ne Ivbi Otu e Kristi ne iran gha dugie ubiẹmwẹ ọnrẹn. Nọghayayerriọ, irẹn ke ghi tama erhuaengbe ẹre ne iran gha ru ayere, ra ye ẹre rre, uwu ọghẹe. (Luk 22:19, 20) Krismasi kevbe ilele ẹre keghi ke ugamwẹ ohoghe nẹdẹ rre. Erriọ vbe re ẹmwata ọghe ilele Ista, zẹvbe ulomwẹ ọghe avbe ekẹn ọkhọkhọ kevbe ọfiontọ. Ivbi Otu e Kristi nowiẹ ma dugie Krismasi ra Ista, amaghiwẹ Ivbi Otu e Kristi ọghe ẹmwata vbe ẹdẹnẹrẹ.

4. Avbe Ẹdubiẹmwẹ: Idugie ẹdubiẹmwẹ eva kẹkan ne Baibol guan kaẹn ke gha re ne emwa nẹi ga e Jehova ru. (Gẹnẹsis 40:20-22; Mak 6:21, 22, 24-27) Ivbi Otu e Kristi nowiẹ ma dugie avbe ẹdubiẹmwẹ. Ne ilele ọghe idugie ẹdubiẹmwẹ ke ghi ke uwu avbe ugamwẹ ohoghe nẹdẹ rre. Ivbi Otu e Kristi ọghe ẹmwata ru izọhẹ kevbe sọyẹnmwẹ egbe kugbe vbe ẹghẹ ọvbehe vbuwe ukpo.

5. Ohan Ọghe Eniwulo: Eniwulo i sẹtin ru emwi rhọkpa ra mu emwi rhọkpa roro. Ma i sẹtin vbe ru iyobọ ne iran, kevbe iran i sẹtin vbe kuan ima. (Psalm 146:4; Asan-Ibo 9:5, 10) Ne evbọrrọọ wu; ẹi werriegbe gha rrọ vbe iyeke uwu. (Ẹzikiẹl 18:4) Sokpan ẹghẹso edibosa dan, na tie ẹre ekpayẹ esu, ghi ba gha ru vbe na ghe avbe orhiọn ọghe eniwulo. Ilele ẹvbo nọ rhirhi gha khin nọ ginna ohan ra ugamwẹ ọghe eniwulo ke gha re nọmagba.—Aizaia 8:19.

6. Ugbugbe: Jesu ma wu vbe uhunmwu ugbugbe. Irẹn keghi wu vbe uhunmwu erhan, ra ẹkpe. Ne ẹmwẹ Griki na zedu ẹre “ugbugbe” vbuwe Baibol nọbun keghi rhiema ike erhan ọkpa kẹkan. Ne ama ọghe ugbugbe keghi ke ugamwẹ ohoghe nẹdẹ rre. Ne ugbugbe ma gha re ne Ivbi Otu e Kristi nowiẹ loro ra na vbe gae. Rhunmwudọni, uwẹ vbe roro wẹ emwi nọma nọ ne a gha lo ugbugbe vbe ugamwẹ ra?—Diuteronomi 7:26; 1 Kọrinti 10:14.

7. Ọ sẹtin gha re emwi nọwegbe ẹsẹse na do sọrae eso vbe avbe evbayayi kevbe ilele ẹvbo na. Etẹn kevbe avbe ọse sẹtin hia ne iran ye ekhọe ruẹ muẹn ne u ghẹ fi evbayayi ruẹ werriẹ. Sokpan ne a ye ẹko rhiẹnrhiẹn Osanobua ọre nọhiunsi sẹẹ a ye ẹko rhiẹnrhiẹn emwa nagbọn.—Itan 29:25; Matiu 10:36,37.

[Efoto nọ rre ipapa 22]

Osanobua i re Osanagbeha

 [Efoto nọ rre ipapa 23]

Krismasi kevbe Ista ke uwu ugamwẹ ohoghe nẹdẹrre

[Efoto nọ rre ipapa 23]

Evbọzẹ rhọkpa i rrọ ne a gha na ga eniwulo ra na gha muohan iran