Iruẹmwi 3

Gha Re Jesu Kristi?

Vbọzẹ ne a na tie Jesu “ọmọdiọn” Nokpia ọghe Osanobua? (1)

Vbọzẹ ne a na tie ẹre “ne Ẹmwẹ”? (1)

Vbọzẹ ne Jesu na gha die otagbọn zẹ vbe ọmwa? (2-4)

Vbọzẹ ne ọ na ru avbe emwi ọyunnuan? (5)

De emwi ne Jesu gha rherhe ru vbe odaro? (6)

1. Jesu ka gha rre ẹrinmwi zẹ vbe ọmwa orhiọn a te miẹn wẹ irẹn ke gha die otagbọn. Irẹn ke gha re evbayi nokaro ọghe Osanobua, kevbe wẹ a na gha tie irẹn ne “ọmọdiọn” Nokpia ọghe Osanobua. (Kọlose 1:15; Arhie 3:14) Jesu ọre Nokpia ọkpa kẹkan ne Osanobua tobọre yi. Jehova keghi lo ọmwa ne ọ kagha rrọ, Jesu zẹ vbe “owinna owa ne a bọ” ya yi avbe emwi ọvbehe hia nọ ghi rrọ vbe ẹrinmwi kevbe otagbọn. (Itan 8:22-31; Kọlose 1:16, 17) Osanobua ke vbe loo Ẹre zẹvbe ọka ọmunu owinna owa. Ọni ọre ọ zẹe ne a na tie Jesu “ne Ẹmwẹ.”—Jọn 1:1-3; Arhie 19:13.

2. Osanobua gie Nokpia Ẹre gha die otagbọn vbene ọ na rhie arrọọ ẹre gha rrie uwu akuọmọ ọghe Meri. Vberriọ Jesu ma gha mwẹ erha ọghe agbọn na. Ọni ọre ọ zẹe ne ọ ma na rriukhu orukhọ rhọkpa ra amagba. Osanobua gie Jesu gha die otagbọn rhunmwuda emwi eha: (1) ne ọ do ma ima ẹmwata vbekpa Osanobua (Jọn 18:37), (2) ne ọ do muẹnso rhie igiemwi ọghe imudiase nọgbae, ne ima gha lele (1 Pita 2:21), kevbe (3) ne ọ ye arrọọ ọghẹe zọẹse ne ọ ya miẹn ima fan vbe obọ orukhọ kevbe uwu rre. Vbọzẹ ne a na gualọ ọnọna?—Matiu 20:28.

3. Ne ọ ma na mu uhi ọghe Osanobua sẹ, ọmwa ni nokaro, Adam, ke ghi ru emwi ne Baibol tie ẹre “orukhọ.” Erriọ Osanobua na buohiẹn uwu gbẹe. (Gẹnẹsis 3:17-19) Irẹn ma ghi werriegbe sihe vbe emwamwa ọghe Osanobua, erriọ ọ ma ghi werriegbe gha re nọgbae ọvbehe. Kherhekherhe irẹn ghi ya gha khin ọmaẹn kevbe ọ na wu. Adam ghae orukhọ ne ivbi ẹre hia fẹrẹrẹ. Ọni ọre ọ zẹe ne ima na khin ọmaẹn, do gha khuọnmwi, kevbe do wu. Vbe emwa nagbọn khian ya miẹn fan hẹ?—Rom 3:23; 5:12.

4. Ọmwa nọgbae ẹre Jesu gha khin zẹ vbene Adam vbe gha ye. Nọ ma ya khọ Adam, agharhemiẹn, Jesu wa gha mwẹ ahọẹnmwẹ nọgbae da Osanobua uhiẹn vbe ototọ edanmwẹ nọsẹre. Vbe nian irẹn ya sẹtin ye arrọọ ọghẹe nọgbae zọẹse nọ ya ha osa ye orukhọ ọghe Adam. Ọnọna ọre emwi ne Baibol guan kaẹn zẹ vbe “adẹwerriegbe.” Ivbi Adam gha sẹtin vbenian gha re na fanvbimu hin ena bu abe uwu gbe. Ehia nọ ghi mwẹ amuẹtinyan yan Jesu gha khiẹn na ye orukhọ ọghe iran bọ kevbe do miẹn arrọọ etẹbitẹ.—1 Timoti 2:5, 6; Jọn 3:16; Rom 5:18, 19.

5. Vbe ẹghẹ ne ọ na gha rre otagbọn Jesu sinmwi iran ne egbe ma rran, rhie evbare ne avbe ne ohanmwẹ gbe, kevbe ọ na dọ ogbigbi ẹhoho yọ. Uhiẹn ọ vbe huẹn emwa ni wulo kpaegbe. Vbọzẹ ne irẹn na ru avbe emwi ọyunnuan? (1) Irẹn keghi mwẹ enina dae avbe emwa ne usẹ sẹ, kevbe ọ vbe ho ne ọ ru iyobọ ne iran. (2) Iwinna ọyunnuan ọghẹe rhiema wẹ Ovbi Osanobua ọre irẹn khin. (3) Iran vbe rhie ẹre ma emwi ne irẹn khian ru ne emwa nagbọn nọ họẹnmwẹ vbe ẹghẹ ne irẹn khian ya gha kha zẹvbe Ọba yan uhun otagbọn.—Matiu 14:14; Mak 2:10-12; Jọn 5:28, 29.

6. Jesu wu kevbe wẹ Osanobua na huọnrẹn kpaegbe zẹ vbe evbayi ọghe orhiọn, kevbe ọ werriegbe gha rrie ẹrinmwi. (1 Pita 3:18) Ke ẹghẹ ni gha de Osanobua ma ẹre Ọba nẹ. Vbe nẹi khian kpẹ Jesu gha rhie avbe emwidan kevbe usẹ hin otagbọn na rre.—Psalm 37:9-11; Itan 2:21, 22.

 [Efoto nọ rre ipapa 7]

Iwinna ọghe Jesu deba imamwaemwi, ọyunnuan, kevbe uhiẹn ọ ye arrọọ ọghẹe fiohan ne ima