Iruẹmwi 2

Gha Re Osanobua?

Gha re Osanobua ẹmwata, kevbe vbe ọre enni ẹnrẹn? (1, 2)

De aro egbe ne ọ mwẹ? (3)

De avbe akpa kpataki ne ọre ọghẹe? (4)

Ọkhẹke ne ima lo avbe amazẹ kevbe ama vbe ugamwẹ mwa ghe ẹre ra? (5)

De odẹ eva ne ima gha ya sẹtin ruẹ vbekpa Osanobua? (6)

1. Emwa ga emwi nọbun. Sokpan Baibol tama ima wẹ Osanobua ẸMWATA ọkpa kẹkan ẹre ọ rrọ. Irẹn ọre ọ yi emwi hia nọ rre ẹrinmwi kevbe uhun otagbọn. Rhunmwuda irẹn rhie arrọọ ne ima, irẹn ọkpa kẹkan ẹre ima gha sẹtin ga.—1 Kọrinti 8:5, 6; Arhie 4:11.

2. Osanobua mwẹ iwaenni nọbun sokpan enni ọkpa kẹkan ọre irẹn mwẹ. Enni ni ọre JEHOVA. Vbe uwu avbe Baibol nibunsẹ, enni ọghe Osanobua ke ghi re na rhie hin vbọ rre kevbe a na ghi ye iwaẹnni NỌYAẸNMWA ra OSANOBUA rhie ihe ẹre. Sokpan vbe ẹghẹ ne a na gbẹn Baibol, enni Jehova ke ghi ladian vbe uwu ẹre inugba nọ re 7,000!—Ẹksọdọs 3:15; Psalm 83:18.

3. Jehova mwẹ egbe, sokpan ẹi ye vbe ọghomwa. “Ọrhiọn ọre Osanobua khin,” erriọ Baibol khare. (Jọn 4:24) Orhiọn ke gha re ukhọmwẹ arrọọ na miẹn wẹ ọ kakabọ yo sẹ ọghomwa. Ọmwa ọkpa i rrọ nọ he miẹn Osanobua aro ẹdẹ. Ẹrinmwi ọre Jehova ye, sokpan ọ sẹtin bẹghe emwi hia. (Psalm 11:4, 5; Jọn 1:18) De emwi, khekherhiọ, ne ọ ghi re orhiọn nọhuanrẹn? Ẹi re ọmwa nọ ye vbe Osanobua. Nọghayayerriọ, ọ ke ghi re ẹrhiọn izọghae ọghe Osanobua.—Psalm 104:30.

4. Baibol wẹre rua ma ima ighẹ akpa ọghe Jehova. Ọ rhie ẹre ma ima avbe akpa kpataki ọghẹe nọre ahoẹmwọmwa, abuohiẹn ata, ẹwaẹn, kevbe ẹtin. (Diuteronomi 32:4; Job 12:13; Aizaia 40:26; 1 Jọn 4:8) Baibol tama ima wẹ irẹn vbe re nọtohọnmwa, nọfu, nọyabọ, nọzemwiobọ, kevbe nọziengbe. Ma, zẹ vbe emọ ni họẹnmwẹ, ghi hia ne a yegbe ta ẹre.—Ẹfisọs 5:1, 2.

5. Te ima gha gbe uhunmwu ke otọ ra na erhunmwu gie avbe amazẹ, avbe efoto, ra avbe ama vbe uwu ugamwẹ ọghomwa ra? Ẹn o! (Ẹksọdọs 20:4, 5) Jehova tae wẹ te ima gha ga irẹn ọkpa kẹkan. Irẹn i khian gu ọmwaikọmwa ra emwikemwi ọvbehe ghae uyi ọghẹe. Avbe amazẹ i mwẹ ẹtin ne iran ya ru iyobọ ne ima.—Psalm 115:4-8; Aizaia 42:8.

6. Vbe ima gha ya sẹtin do rẹn Osanobua sayọ hẹ? Odẹ ọkpa vbọ ọre ne ima gbarokotọ ya gha ghe avbe emwi ne irẹn yi kevbe rorẹe dinmwi vbekpa avbe emwi ne iran tama ima. Evbayi ọghe Osanobua rhiema ima wẹ irẹn wa mwẹ ẹtin nọkhua kevbe ẹwaẹn. Ima bẹghe ahoẹmwọmwa rẹn vbe uwu emwi hia ne irẹn he ru. (Psalm 19:1-6; Rom 1:20) Odẹ ọvbehe ne ima gha ya sẹtin ruẹ vbekpae Osanobua ọre na gha ruẹ Baibol. Vbe uwu ẹre irẹn tama ima ẹsẹsẹmwẹse vbekpa aro Osanobua ne irẹn khin. Irẹn ye vbe tama ima vbekpa emwamwa rẹn kevbe emwi nọ ho ne ima gha ru.—Emọs 3:7; 2 Timoti 3:16, 17.

 [Efoto nọ rre ipapa 5]

Ma ruẹ re vbekpa Osanobua luwe evbayi rre kevbe uwu e Baibol