Gha Re ne Esu?
Iruẹmwi 4
Gha Re ne Esu?
Setan ne Esu—de ehe ne ọ ke rre? (1, 2)
De vbe ne Setan ya bibi emwa odẹ hẹ? (3-7)
Vbọzẹ ne u gha na khẹyegbe vbegbe Esu? (7)
1. Ne ẹmwẹ “esu” a ya re kha ọmwa eso nọ ta ohoghe dan vbekpa ọmwa ọvbehe. “Setan” a yae kha oghiọnmwa ra ọgbodan. Ena ọre avbe okpenni na mu ne ọka eghian ọghe Osanobua. Vbe okaro, rẹn ghaa re odibosa nọgbae vbe ẹrinmwi vbe ehe ne Osanobua ye. Vbọrhirhighayehẹ, vbe okieke ọ ke do kakabọ roro gberra egbe ẹre kevbe ọ na gha hoo ne ugamwẹ nọ wa gele khẹke Osanobua.—Matiu 4:8-10.
2. Odibosa na, Setan, lo ẹyẹn ya gu Ivi guan. Vbene ọ na ta ohoghe ma rẹn, ọ na ya ẹre khien enọ ma họẹnmwẹ ne Osanobua. Erriọ ẹre Setan ya werriẹ aro nọkhọ dae na tiẹre “ọdakha” ọghe Osanobua, ra ukpo ẹre zẹvbe Nọyosẹ hia. Setan na nọta adeghẹ Osanobua kha yan vbe odẹ nọkhẹke kevbe wẹ vbe ẹkorhiẹn rhiẹnmwẹ nọ masẹ ọghẹe emwa Rẹn nọ khayan. Setan vbe nọta kan rẹn adeghẹ ọmwaikọmwa gha sẹtin ghaa re nọ mwẹ ẹkoata ghe Osanobua. Vbene irẹn na ru ọna, Setan ke ghi ye egbe ẹre khin eghian ọghe Osanobua. Ọni ọre evbọzẹe ne a ghi na do gha tie ẹre Setan ne Esu.—Gẹnẹsis 3:1-5; Job 1:8-11; Arhie 12:9.
3. Setan hia ne ọ ye ero silo emwa la uwu ugamwẹ ọnrẹn. (2 Kọrinti 11:3, 14) Odẹ ọkpa ne irẹn ya bibi emwa odẹ ọre luwe ugamwẹ ohoghe. Adeghẹ ugamwẹ ma emwa ohoghe vbekpa Osanobua, ọ ke wa gele yin lele emwamwa ọghe Setan. (Jọn 8:44) Emwa ni re ọkpa vbe usun ọghe avbe ugamwẹ ohoghe ghaa ye ekhọekekhọe yayi wẹ iran wa ga Osanobua ọghe ẹmwata. Sokpan Setan ọre iran wa gele ga. Irẹn ọre ‘osa ọghe agbọn na.’—2 Kọrinti 4:4.
4. Aguorhiọndan muobọ ke ghi re odẹ ọvbehe ne Setan ya silo emwa ye ototọ ẹtin ọghẹe. Iran sẹtin vbe kpe tie avbe orhiọn ne iran do gbaroghe iran, ne ọ kuan emwa ọvbehe, ne ọ ta evbe ọ rre odaro, ra ne ọ ru avbe emwi ọyunnuan. Setan ọre ẹtin dan nọ rre iyeke avbe uyinmwẹ na hia. Ne a ye ẹko rhiẹnrhiẹn Osanobua, ma ghẹ mwẹ emwi rhọkpa ne ima gha ya gu orhiọndan muobọ.—Diuteronomi 18:10-12; Iwinna 19:18, 19.
5. Setan wa vbe bibi emwa odẹ luwe itengbemu nọkhua ọghe uniẹn na ke rre kevbe ugamwẹ ọghe emwamwa otuazẹ. Eso roro wẹ agbẹnvbo ra uniẹn ọghe iran ọ masẹ ọghe emwa ọvbehe. Sokpan ọna i re ẹmwata. (Iwinna 10:34, 35) Emwa ọvbehe ke ghi ghe avbe emwamwa otuazẹ nọ do sọfurre ye ọlọghọmwa ọghe emwa. Vbene iran na ru ọna, te iran ghi he Arriọba ọghe Osanobua yotọ. Ọni ọkpa kẹkan ọre nọ nọ gha sọfurre ye ọlọghọmwa ọghomwa.—Daniẹl 2:44.
6. Odẹ ọvbehe ne Setan ya bibi emwa odẹ ọre ne ọ na ye aho naru orukhọ danmwẹ iran. Jehova tama ima ne ima gbaẹngbe ne avbe uyinmwẹ orukhọ rhunmwuda irẹn rẹnrẹn wẹ iran gha rhie ikuaẹngbe ne ima. (Galatia 6:7, 8) Emwa eso sẹtin vbe gha ho ne uwẹ deba iran vbe uwu avbe uyinmwẹ vberriọ. Yerre, ọrheyerriọ, Setan gele nọ ne ọ ho ne uwẹ gha ru emwi na hia.—1 Kọrinti 6:9, 10; 15:33.
7. Setan sẹtin ye ukpokpo ra igbodan ya tọn ne u sẹ Jehova rae. Eso vbe emwa ruẹn ni hoẹmwẹ ruẹn ghi do gha kakabọ mu ohu ruẹ rhunmwuda ighẹ uwẹ ruẹ Baibol. Eso sẹtin vbe gha ya ruẹ gbogiẹ. Sokpan de ọmwa ne uwẹ mwẹ ọnrẹn arrọọ? Setan ho ne ọ ye ohan muẹn ne u miẹn eke na dobọyi ne u ghẹ ghi ruẹ vbekpa Jehova. Ghẹ gie Setan do musọe! (Matiu 10:34-39; 1 Pita 5:8, 9) Agha khẹ yegbe vbe egbe Esu, u sẹtin ye Jehova gha ghọghọ kevbe u ghi rhiema wẹ u daeyi ighẹ ọdakha Ọghẹe.—Itan 27:11.
[Efoto nọ rre ipapa 9]
Ugamwẹ ohoghe, aguorhiọndan muobọ, kevbe oseghe ẹvbo bibi emwa odẹ
[Efoto nọ rre ipapa 9]
Khẹyegbe vbekpa Setan ne u ye gha ruẹ vbekpa Jehova