Iruẹmwi 7

Na Gha Sikẹ Osanobua Vbe uwu Erhunmwu

Vbọzẹ nọ na hiunsi ne a gha na erhunmwu ugbugbẹhia? (1)

De ọmwa ne ima khian gha na erhunmwu gie kevbe de odẹ nọkhin? (2, 3)

De uhun emwi kpataki ne a gha nọ vbe erhunmwu? (4)

De ẹghẹ ne u gha ya gha na erhunmwu? (5, 6)

Osanobua danmwehọ erhunmwu hia ra? (7)

1. Erhunmwu ọre na muegbe rriotọ ya gha gu Osanobua guan. Uwẹ ghaa na erhunmwu gie Osanobua vbe ugbugbẹhia. Erriọ a gha ya sẹtin sikẹ ọre zẹ vbe ọse nọghan. Jehova kpọlọ ẹsẹse kevbe ọ mwẹ ẹtin, ọrheyerriọ ọ ye danmwehọ erhunmwu ọghomwa! Wẹ na erhunmwu gie Osanobua ugbugbẹhia ra?—Psalm 65:2; 1 Tẹsalonaika 5:17.

2. Erhunmwu ke ghi re obọkpa vbe ugamwẹ mwa. Vberriọ, Osanobua, Jehova ọkpa kẹkan ọre ima gha na erhunmwu gie. Vbe ẹghẹ ne Jesu na gha rre otagbọn, ẹghẹ hia irẹn ya gha na erhunmwu gie Erha, ẹire gie ọmwa  rhọkpa ọvbehe. Te ima gha vbe ru vberriọ. (Matiu 4:10; 6:9) Vbọrhirhighayehẹ, erhunmwu ọghomwa hia gha re na naẹn vbe enni ọghe Jesu. Ọna rhiema wẹ ima rhie ọghọ ne ukpo ne Jesu na zẹ kevbe wẹ ima vbe mwẹ amuẹtinyan yan izọẹse adẹwerriegbe ọghẹe.—Jọn 14:6; 1 Jọn 2:1, 2.

3. Ugbẹnvbe ima gha na erhunmwu ma ghi gha gu Osanobua guan ke uwu ẹkokoudu mwa rre. Ma ghẹ na erhunmwu mwa ke uwe na ruẹ ye uhunmwu rre ra na tie ke ebe erhunmwu ladian. (Matiu 6:7, 8) Ma sẹtin na erhunmwu vbe ihe amuegbe yọghọ, vbe ẹghẹ ikẹghẹ, kevbe ehei kehe. Osanobua sẹtin họn erhunmwu uhiẹn na fẹko na vbe uwu ẹkokoudu ọghomwa. (1 Samuẹl 1:12, 13) Emwi nọma ẹre nọ na gualọ ehe nọfurre nọ rre ne emwa ọvbehe na ya gha na erhunmwu egbọmwa.—Mak 1:35.

4. De avbe uhun emwi ne ima gha na erhunmwu vbekpa ẹre? Emwikemwi nọ gha dekaẹn aguegbe ruọse ruẹ ba irẹn. (Filipai 4:6, 7) Ne igiemwi erhunmwu nii rhiema wẹ te ima gha na erhunmwu vbekpa enni e Jehova kevbe emwamwa rẹn. Ma sẹtin vbe nọ emwi ewe ọghomwa ne ima ho nọ kpemehe ẹre, ne a ye orukhọ mwa bọmwa, kevbe nọ ru iyobọ na ya khẹyegbe vbuwe edanmwẹ. (Matiu 6:9-13) Erhunmwu ọghomwa i khian gha re ọghe ọkhẹnmwidamwẹ. Te ima ghaa na erhunmwu ye avbe emwi taara nọ gu aho ọghe Osanobua ro.—1 Jọn 5:14.

5. Uwẹ sẹtin vbe na erhunmwu vbe ẹghẹikẹghẹ ne ẹkokoudu ruẹ ya guakpaọ ne u ya kpọnmwẹ ra rho Osanobua. (1 Krọnikol 29:10-13) Uwẹ sẹtin na erhunmwu vbe u gha mwẹ ọlọghọmwa kẹke vbe amuẹtinyan ruẹn a gha rre edanmwẹ. (Psalm 55:22; 120:1) Emwi nọkhẹke nọ ne u na erhunmwu u te rri evbare ruẹ. (Matiu 14:19) Jehova tie ima ne ima gha na erhunmwu “vbe ẹghẹ hia.”—Ẹfisọs 6:18.

6. Ma gualọ ne ima gha na erhunmwu katekate vbe ima a ru orukhọ nọwegbe. Vbe egbe ẹghẹ vberriọ te ima gha rinmwian Jehova ye itohan kevbe ayabọ ọghẹe. Adeghẹ ima na miẹn orukhọ ọghe ima kue ma irẹn kevbe a na gha hia ẹsẹse ne a ghẹ ghi werriegbe ruẹe, Osanobua “ya orukhọ bọ.”—Psalm 86:5; Itan 28:13.

7. Jehova danmwehọ erhunmwu emwa nimwẹ imudiase ọkpa kẹkan. Ne erhunmwu ruẹn gha re ne Osanobua họẹn, te uwẹ gha hia vbe ne ẹtin ruẹn sẹe ne u ye uhi ẹre gha ru emwi. (Itan 15:29; 28:9) Te uwẹ ghaa mwẹ imuegberriotọ vbe uwẹ gha na erhunmwu. (Luk 18:9-14) Te uwẹ gha winna lele emwi ne uwẹ na erhunmwu yi. Uwẹ ghi do ye ọni rhiema wẹ u mwẹ amuẹtinyan kevbe wẹ u gele muẹn sẹ emwi ne u tae. Ẹghẹ ni ọkpa ẹre Jehova ra ya rhie ewanniẹn ye erhunmwu ruẹn.—Hibru 11:6.