Iruẹmwi 9

Te Eguọmwadia Ọghe Osanobua Gha Re Nọhianrẹn

Vbọzẹ ne ima gha na re nọhianrẹn vbe odẹ hia? (1)

Vbe a yae kha ne a gha re nọhianrẹn vbe odẹ ọghe orhiọn? (2) uyinmwẹ nọhianrẹn? (3) iziro nọhianrẹn? (4) egbe nọhianrẹn? (5)

De aro ẹmwẹ nọgbiruẹn ne ima gha gbaẹngbe na? (6)

1. Nọhianrẹn kevbe nọhuanrẹn ẹre Osanobua Jehova khin. Irẹn ye aro yọ ne emwa ni gae gha re nọhianrẹn vbe—orhiọn, uyinmwẹ, iziro, kevbe egbe. (1 Pita 1:16) Ọ keghi rhie ẹrhiọn ẹsẹse na gha re nọhianrẹn vbe ọdaro Osanobua. Ma rrọọ vbuwe agbọn nọgbiruẹn. Ima vbe mwẹ ihiaegbe na ya gu ẹre khọn abemwikuru ọghomwa. Sokpan ima i khian hẹwẹ vbọ.

2. Uyinmwẹ Ọghe Orhiọn: Adeghẹ ima ho na ga e Jehova, ima i khian ye gha rre imamwaemwi nọ rhirhi gha khin ra ilele avbe avbavbotọ ọghe ugamwẹ ohoghe. Te ima gha kpaọ vbuwe ugamwẹ ohoghe rre kevbe ne a ghẹ ye odẹikodẹ yẹrike. (2 Kọrinti 6:14-18; Arhie 18:4) Ugbẹn vbe ima ghi ruẹ ne ẹmwata vbekpa Osanobua nẹ, te ima gha ghi gbaro kotọ ne emwa ni mamwaemwi ohoghe ghẹ do bibi ima odẹ.—2 Jọn 10, 11.

3. Uyinmwẹ Nọhianrẹn: Jehova gualọ vbe obọ emwa ni gae ne iran gha yin zẹvbe emwa ata ọghe Ivbi Otu e Kristi vbe ẹghẹ hia fẹrẹrẹ. (1 Pita 2:12) Irẹn bẹghe emwikemwi ne ima ru, uhiẹn vbe ẹkhokho. (Hibru 4:13) Te ima gha gbaẹngbe ne uyinmwẹ alama oghẹ kevbe avbe uyinmwẹ nọgbiruẹn ọvbehe ọghe agbọn na.—1 Kọrinti 6:9-11.

4. Iziro Nọhianrẹn: Adeghẹ ima na ye ekhọe mwa vuọn ne evbọhianrẹn, iro vuọn khuiae, uyinmwẹ ọghomwa ghi vbe gha re nọhianrẹn. (Filipai 4:8) Sokpan adeghẹ ima na gha lo vbuwe emwi nọgbiruẹn, ọ ghi do rhie uyinmwẹ ọkhọ ma. (Matiu 15:18-20) Te ima gha gbaẹngbe ne aro irọkheghe ne ọ gha sẹtin sọrho ye ekhọe mwa. Ma sẹtin ye ekhọe mwa vuọn ne iziro nọhianrẹn lekpae Ẹmwẹ Osanobua na ruẹ rre.

5. Uhianmwẹ Ọghe Egbe: Rhunmwuda ne iran na mu akpa Osanobua yọ, te Ivbi Otu e Kristi gha ye egbe kevbe ukpọn ọghe iran khien nọhianrẹn. Ima gha re nọ kpe obọ ọghomwa vbe a ra yo egbowa fo nẹ, kevbe ima ghi vbe kpe a te rri evbare ra a te ye obọ kaẹn evbare. Adeghẹ uwa i mwẹ emwamwa kpataki ne a ya họe ebẹsọn kua, a ghi tọnnọ otọ na họe yọ. (Diuteronomi 23:12, 13) Ne a gha kpe egbọmwa huan sẹtin ye ọmwa gha mwẹ egberranmwẹ esi. Te owa ọghe Ovbi Otu e Kristi gha ye sẹsẹsẹ kevbe nọkhiae vbe uwowa kevbe orere. Ọ ghi rhiegbe ladian vbuwe ẹdogbo nọ ye zẹ vbe igiemwi esi.

6. Ẹmwẹnunu Nọhianrẹn: Te eguọmwadia ọghe Osanobua gha ta ẹmwata vbe ẹghẹ hia. Avbe ọhọnhoghe i khian laa Arriọba ọghe Osanobua. (Ẹfisọs 4:25; Arhie 21:8) Ivbi Otu e Kristi i fi obiunu. Iran i danmwehọ ra ne iran gha ta ẹmwẹ ọden nọgbiruẹn ra avbe nọmahian. Rhunmwuda ẹmwẹ naguan ọghe iran nọhianrẹn, iran ke gha re nọ lughaẹn vbe isi iwinna ra vbe owa iruẹmwi kevbe vbuwe ẹdogbo ne iran ye.—Ẹfisọs 4:29, 31; 5:3.

[Efoto nọ rre ipapa 18, 19]

 Te eguọmwadia ọghe Osanobua gha re nọhianrẹn vbe odẹhia