Iruẹmwi 13

Vbe Uwẹ Gha ya Sẹtin Gualọ Ugamwẹ Ẹmwata Miẹn Hẹ?

Ugamwẹ hia ẹre ọ yẹ Osanobua, ra ọkpa kẹkan nọ? (1)

Vbọzẹ ne a ghi na miẹn ugamwẹ nọbun sẹrriọ nọ kha wẹ Ivbi Otu e Kristi ẹre iran khin? (2)

Vbe u gha ya sẹtin yẹrẹro hẹ Ivbi Otu e Kristi ẹmwata? (3-7)

1. Jesu ọre ọ muẹn hẹn ugamwẹ ẹmwata ọkpa ọghe Otu e Kristi. Rhunmwudọni ẹdẹnẹrẹ egbe ọkpa kẹkan ọ khian vbe gha rrọ, ra otu, ọghe emwa ata ni ga Osanobua Jehova. (Jọn 4:23, 24; Ẹfisọs 4:4, 5) Baibol ma ima re wẹ emwa ibozẹghẹ kẹkan ẹre ọ rre odẹ ne wẹnrẹnrẹn nọ rrie arrọọ.—Matiu 7:13, 14.

2. Baibol ka tae yotọ wẹ vbe iyeke uwu ọghe avbe ukọ, imamwaemwi nọmagba kevbe uyinmwẹ nẹi re ọghe Kristi gha rẹnrẹn lae uwu iko ọghe Ivbi Otu e Kristi. Emwa gha silo emwa iyayi ba egbe ne iran gha te ya lele Kristi. (Matiu 7:15, 21-23; Iwinna 20:29, 30) Ọni ọ siẹe ne ima ghi na miẹn ugamwẹ nọbun ughughan nọ kha wẹ Ivbi Otu e Kristi iran khin. Vbe ima gha ya sẹtin yẹrẹro hẹ Ivbi Otu e Kristi ata?

3. Ama nọsẹre ne a gha ya rẹn Ivbi Otu e Kristi ẹmwata ọre wẹ iran ke ghi mwẹ ahoẹmwọmwa kpataki vbuwe ẹbu iran. (Jọn 13:34, 35) A ma i ya ma iran emwi ne iran gha roro wẹ iran ọre ọ ma sẹ uniẹn ẹvbo ọvbehe ra vbe ikpakpa egbe. Amaghiwẹ te a ghi ma iran re ne iran gha mwẹ irriakhuẹ ghe emwa ni ke agbẹnvbo ọvbehe rre. (Iwinna 10:34, 35) Rhunmwudọni iran i mwẹ obọ vbe okuo. Ivbi Otu e Kristi ẹmwata yobọ mu egbiran zẹvbe etẹn nikpia kevbe nikhuo.—1 Jọn 4:20, 21.

4. Ama ọvbehe ọghe ugamwẹ ẹmwata ọre wẹ ivbiotu ẹre keghi mwẹ ọghọ nọdinmwi ne Baibol. Iran rhanbọ miẹn ọnrẹn zẹ vbe Ẹmwẹ ọghe Osanobua kevbe yaeyi ighẹ emwi nọrhirhi ta. (Jọn 17:17; 2 Timoti 3:16, 17) Iran ye obọ mu Ẹmwẹ ọghe Osanobua zẹvbe nọhiunsi sẹ iziro ra ilele ọghe emwa nagbọn. (Matiu 15:1-3, 7-9) Iran hia  ne iran ye Baibol gha ru emwi ẹdẹgbegbe vbe ẹdẹ agbọn ọghe iran. Rhunmwudọni iran i vbe kporhu emwi ọkpa kevbe na a ru emwi ọvbehe.—Taitọs 1:15, 16.

5. Ne ugamwẹ ẹmwata gha vbe yọghọ ne enni ọghe Osanobua. (Matiu 6:9) Jesu ye enni ọghe Osanobua, Jehova, khin enarẹnrẹn ma emwa ọvbehe. Te Ivbi Otu e Kristi ẹmwata gha vbe ru vberriọ. (Jọn 17:6, 26; Rom 10:13, 14) De emwa nọ khin vbe ẹdogbo ne u ye nọ tama emwa ọvbehe vbekpa enni ọghe Osanobua?

6. Te Ivbi Otu e Kristi ẹmwata gha kporhu vbekpa Arriọba ọghe Osanobua. Jesu ru vberriọ. Irẹn wa gha guan vbekpa Arriọba vbe ẹghẹ hia. (Luk 8:1) Irẹn ke vbe yiyi ne avbe erhuaengbe ẹre ne iran kporhu egbe igiuhun vberriọ vbe uhunmwu otagbọn hia. (Matiu 24:14; 28:19, 20) Ivbi Otu e Kristi ẹmwata yaeyi wẹ Arriọba ọghe Osanobua ọkpa kẹkan ọre ọ gha rhie ọfumwegbe kevbe agbẹkunsotọ ẹmwata rrie otagbọn na.—Psalm 146:3-5.

7. Erhuaengbe ọghe Jesu i khian gha re ọkpa vbe agbọn atosi na. (Jọn 17:16) Iran i rhie egbe iran ye ẹmwẹ otu azẹ ọghe agbọn na kevbe olighi ọghe evbakhinvbẹvbo. Iran keghi biegbe ne avbe uyinmwẹ nọ si ikuaengbe, evbaru, kevbe avbe uyinmwẹ na miẹn wẹ ọ kpọkpọ vbe uwu ne agbọn. (Jems 1:27; 4:4) Uwẹ gha sẹtin yẹrẹro otu ugamwẹ vbe uwu ẹdogbo ne uwẹ ye nọ mwẹ avbe ama na ọghe Ivbi Otu e Kristi ẹmwatara?

[Efoto nọ rre ipapa 26, 27]

Ivbi Otu e Kristi ẹmwata hoẹmwẹ egbiran, rhie ọghọ ne Baibol, kevbe kporhu vbekpa Arriọba Osanobua