Iruẹmwi 1

Vbene U Gha ya Sẹtin Gualọ Miẹn Hẹ Emwi ne Osanobua Hoo

De uhun ẹmwẹ kpataki nọ rre uwu e Baibol? (1)

Gha re asẹ ọghe Baibol? (2)

Vbọzẹ ne u gha na ruẹ ne Baibol? (3)

1. E Baibol ọre izọhẹ nọghan nọ ke obọ Osanobua rre. Ọ ke ye vbe ebe nagbẹn nọ ke obọ erha nọmwẹ ahoẹmwọmwa gie ivbiẹ ẹre. Ọ tama ima ẹmwata vbe ekpa Osanobua—ọmwa ne irẹn khin kevbe emwi ne ọ mudia yi. Ọ vbe rhan otọ ẹre vbene a ya gu ọlọghọmwa suan hẹ ke vbene a gha ya miẹn oghọghọ ẹmwata hẹ. E Baibol ọkpa ọre ọ tama ima emwi ne ima gha ru ne a gha ya ye ẹko rhiẹnrhiẹn Osanobua.—Psalm 1:1-3; Aizaia 48:17, 18.

2. E Baibol ke ghi re ne ikpia ughughan eso nọ re 40 gbẹn vbe ẹghẹ nọ gberra ukpo 1,600, nọ suẹnrẹn vbe 1513 B.C.E. Ọ ke ghi re na gba ẹre ikun nọ re ebe 66 ne giẹrẹrẹ. Emwa ni gbẹn Baibol ke ghi re ne Osanobua loro. Iziro ọghẹe ẹre iran gbẹn, ẹi re ọghe iran. Erriọ Osanobua nọ rre ẹrinmwi ẹi re ọmwa rhọkpa vbe uhunmwu otagbọn, nọ re Asẹ ọghe Baibol.—2 Timoti 3:16, 17; 2 Pita 1:20, 21.

3. Osanobua ghaa mwẹ ọnrẹn vbe ekhọe ne Baibol gha re na gbẹn ladian vbe ugbamwẹ kevbe na rhie kaya. E Baibol ẹre a ghi he gbẹn bunsẹ ebe ke ebe ọvbehe hia. Ẹi re emwa hia ọre ọ khian gha ghọghọ vbe ọ gha dẹghe vbe uwẹ gha ruẹ Baibol, sokpan uwẹ ghẹ gie ọni da uwẹ obọ yi. Arrọọ ọghe etẹbitẹ ruẹ vbe odaro hẹnhẹn egbe yan ne uwẹ do rẹn Osanobua kevbe ne uwẹ ru aho ọghẹe, agharhemiẹn ukpokpo kukpokpo rrọ.—Matiu 5:10-12; Jọn 17:3.