INỌTA 9
Ọ Khẹke Ne I Yayi Wẹẹ Te Emwi Hia Didaghohi Ra?
DE EMWI NE UWẸ GHA RU?
Ghee igiemwi na ghee: Alex ma ghi rẹn nọ khian yayi vbọ. Ọ te wa yayi wẹẹ Osanobua rrọọ kevbe wẹẹ irẹn ẹre ọ yi emwi hia. Sokpan vbe ẹrẹna, ọmamwaemwi ọghẹe na wa si agbada vbe unu tae wẹẹ te emwi hia gele didaghohi zẹvbe ne ezanzan ne avbe umẹwaẹn ru rhiẹre maa. Alex ma hoo ne emwa do gha ghee irẹn zẹvbe akpa. Irẹn khare wẹẹ, ‘adeghẹ avbe umẹwaẹn tae nẹ wẹẹ te emwi gele didaghohi, a ghi re imẹ nọ khian wẹẹ ohoghe nọ?’
Adeghẹ uwẹ ọre Alex, uwẹ gha kue yọ wẹẹ te emwi gele didaghohi rhunmwuda wẹẹ u miọẹn tie vbe ebe ra?
MUẸN RORO ẸSẸSẸMWẸSE!
Emwa ni muan ẹmwẹ na keghi rherhe ta emwi ne iran yayi vbene iran i na gele rẹn evbọzẹ ne iran na yaeyi.
-
Emwa eso yayi wẹẹ te a yi emwi hia rhunmwuda wẹẹ ọni ẹre a ma iran re vbe esọsi.
-
Emwa eso yayi wẹẹ te emwi hia didaghohi rhunmwuda wẹẹ ọni ẹre a ma iran re vbe owebe.
INỌTA EHAN NỌ KHẸKE NA MU RORO
E Baibol khare wẹẹ: “A rẹnrẹn ighẹ, owa hia mwẹ ọmwa nọ bọẹ, Osanobua ọre ọmwa ne ọ bọ emwi hia.” (Hibru 3:4) Ọmwa ẹwaẹn gha sẹtin ya ọni yi ra?
Ọmwa nọ tae wẹẹ arrọọ i mwẹ Ayi keghi yevbe ọmwa ukọnmwẹ nọ tae wẹẹ owa na, i mwẹ nọ bọe
EMWI NE EMWA TA: Emwi nọ mu sa vbe ideghedeghe ẹre ọ zẹ ighẹ emwi hia rrọọ.
1. De emwi ra de ọmwa nọ siẹre ne emwi nii na mu sa?
2. De ne ẹwaẹn ye sẹ vbe iyayi eveva na—wẹẹ te emwi hia didaghohi, ra ọmwa ẹre ọ yi emwi hia?
EMWI NE EMWA TA: Aranmwẹ ẹre emwa nagbọn la rre.
3. Adeghẹ aranmwẹ vbe na ghee ọsa, ẹre emwa nagbọn la rre—vbọ ghi siẹ ne a na miẹn wẹẹ ẹi re avbiẹ emwa nagbọn ya mwẹ ẹwaẹn sẹ ọsa?
4. Vbọsiẹ ne a na miẹn wẹẹ a ma ye sẹtin rẹn otọre ighẹ “ekẹn” arrọọ?
EMWI NE EMWA TA: A gualọ otọre miẹn wẹẹ ẹmwata nọ ighẹ iyayi ọghe emwi hia nọ didaghohi.
5. Emwa ni ta ẹmwẹ na tobọ iran gualọ otọre wẹẹ ẹmwata gele nọ ra?
6. Inu emwa ẹre ọ yayi wẹẹ te emwi hia didaghohi rhunmwuda wẹẹ iran họn ighẹ emwa hia ni rẹn ebe vbe yaeyi?
“Adeghẹ u na gha khian vbuwe ẹgbo, u na do dekun owa nọ wa mose, uwẹ gha kha wẹẹ: ‘U miẹn vbe owa na mose hẹ! Avbe erhan ni rre emwa ẹre ọ wa dele do khian owa na.’ Hiehie! Akpa ẹre ọ khian sẹtin ta egbe emwi vberriọ. Vbọ ghi siẹ ne ima gha na yayi wẹẹ te emwi hia nọ rre agbọn didaghohi?”—Julia.
“Ba roro ẹre wẹẹ ọmwa tama ruẹ wẹẹ emadogua na ya printi ebe mu sa kevbe ink nọ tue kua vbọ na wa sanmwẹ ye ehe hia, a na do miẹn wẹẹ ink nọ tue kua nii ẹre ọ ghi do khian disiọnarri na ghi tie. Uwẹ gha ya ọni yi ra?”—Gwen.
VBỌZẸ NỌ NA KHẸKE NA YAYI WẸẸ OSANOBUA RRỌỌ?
E Baibol khare wẹẹ, ne u gha loo ‘ẹtin ọghe iziro’ ọghuẹ. (Rom 12:1) Ọni rhiema wẹẹ ọ ma khẹke ne u yayi wẹẹ Osanobua rrọọ rhunmwuda
-
EMWI NE U MU RORO (I ghee ẹre wẹẹ ọmwa rrọọ nọ sẹ ima)
-
EMWI NE EMWA ỌVBEHE RU (Emwa ni rre ẹvbo ni ye ga Osanobua)
-
A MUẸN KPAN YỌ RUẸ EGBE (Te evbibiẹ mwẹ wa kọe yọ mwẹ ekhọe ke egbe ọvbokhan gha dee wẹẹ Osanobua rrọọ—vbia khian ghi ru hẹ?)
Nọghayayerriọ, ọ khẹke ne u gha mwẹ evbọzẹ ne u na ya Osanobua yi.
“Ọmamwaemwi mwẹ gha rhaan otọre vbene egbe ọmwa nagbọn ya winna hẹ, ọ ghi gele ya mwẹ yayi wẹẹ Osanobua rrọọ. Emwi hia ni rre egbe emwa nagbọn keghi mwẹ iyobọ ne iran ye, ke ni kọnkọn ke ni giẹghẹ, vbene ima i na zẹdẹ rẹn emwi nọ sunu vbuwe egbe ima. Egbe ima ne emwa nagbọn keghi re emwi nọ gele yan ọmwa unu uan!”—Teresa.
“I gha bẹghe egedege nọ yo, okọ nọ khian vbuwe ẹzẹ ra imọto, I gha nọ egbe mwẹ wẹẹ, ‘A ru ọna?’ Emwa ni mwẹ ẹwaẹn ẹre ọ khian sẹtin kun imọto rhunmwuda wẹẹ, emwi ughughan ẹre a khian ku kugbe ọ ke do sẹtin gha winna. Adeghẹ ọmwa ẹre ọ kun imọto, ọni rhiema wẹẹ te a vbe yi ima ne emwa nagbọn.”—Richard.
“Vbene I ya ruẹ sayọ vbekpa emwi ne avbe umẹwaẹn gualọ otọre miẹn, erriọ ẹre I ya bẹghe ẹre sayọ wẹẹ imamwaemwi ọghe emwi nọ didaghohi i mwẹ ẹzi. . . . Mẹ ghee ẹre wẹẹ, na yayi ighẹ te emwi hia didaghohi, ẹre ọ lọghọ sẹ na yaeyi wẹẹ te a yi emwi hia.”—Anthony.
EMWI NỌ KHẸKE NE U MU RORO
Agharhemiẹn wẹẹ, ukpo nibun ẹre umẹwaẹn he ya ru ezanzan, iran i ye mwẹ iyayi ọkpa nọ dekaan emwi nọ didaghohi. Adeghẹ umẹwaẹn hia, na wẹẹ iran ẹre ọ rẹn sẹ, i mwẹ iyayi ọkpa vbe nọ dekaan emwi nọ didaghohi—u ma ru emwi dan, deghẹ u ma miọẹn yi ighẹ ezanzan ne iran ru?
