AVBE OKOZẸ Igho ọrhẹnrhẹn ẹre a loo ro ya ru emwamwa, na ya kpemehe ehe itota nọ khẹke, avbe emadogua amigbo, kevbe avbe iwinna nibun ọvbehe, ne asikoko nọkhua ne ima rre na, mieke na fu ima egbe rre, kevbe nọ ru iyobọ ne ima ya sikẹ e Jehova sayọ. Avbe okozẹ ne uwa rhie ladian ẹre a loo ro ye ena hia, kevbe avbe iwinna Arriọba ọvbehe nọ khian vbe otagbọn hia. Nọ mieke na khuẹrhẹ nuẹ, avbe ẹkpẹti okozẹ na se ama yi gbodoo, keghi rre ako hia vbe ọgbẹlẹzẹ na. Avbe okozẹ hia, keghi re na gha gbọyẹmwẹ yi ẹsẹsẹmwẹse. Ẹbu Nọ Su, keghi kpọnmwẹ uwa ne uwa na zẹ emwi obọ ya ru iyobọ ye iwinna ọghe Arriọba.

EHE ITOTA Lahọ gha mwẹ amuroro ghee emwa ọvbehe. Yerre wẹẹ, u sẹtin sinmwi ehe itota khẹ ẹgbẹe ruẹ, emwa ne uwa gba la imọto rre, emwa ne uwa gba rre owa, ra emwa ne uwa gu ruẹ e Baibol. Lahọ, ghẹ sẹ emwi rae ye ehe itota ne u ma sinmwi yotọ.

EVBỌ WIRI NA MIẸN RHIE Ugha na, ẹre a rhiẹre yi, emwi ke emwi na miẹn rhie. Adeghẹ u mu emwi ke emwi fua, gha rrie ugha na, ne u sunu ye emwi ruẹ nọ wiri. A gha miẹn emọ ni khian fua vbe ehe ne evbibiẹ iran ye kevbe ni wiri, a ghi rhie iran gha rrie ugha na. Ọrheyerriọ, ọ ma khẹke na gha ghee evba zẹvbe ehe ukokọmọ. Lahọ gbaroghe ivbuẹ, ne u si iran kẹ egbe.

IDINMWIAMẸ Avbe aga ni ke odaro sẹ, ni rre odaro ogiukpo, keghi re ehe itota na mwamwa khẹ emwa ni khian dinmwiamẹ. Adeghẹ afiwerriẹ na gha rre ọna, a gha yae wewe ọ te sẹ ẹghẹ. Ọ khẹke ne emwa ni khian dinmwiamẹ tota ye ehe itota na mwamwa khẹ iran, a te suẹn gha ye ọta ọghe idinmwiamẹ guan vbe ẹghẹ owiẹ vbe Satọde. Edọmwadọghẹ ghi rhie ukpọn na ya kaa egbe rre, kevbe ukpọn na ya khuẹ nọ khẹke.

IWINNA NỌ KE EKHỌE RRE Adeghẹ ọ ke ruẹ ekhọe rre ne u ru iyobọ ye iwinna nọ dekaan emwamwa asikoko na, lahọ gha rrie ugha na; a gha ma ruẹ ehe ne a na gualọ iyobọ.

UGHA NỌ SIẸNRO ISINMWIEGBE ỌGHE ẸGIẸGIẸ Lahọ yerre wẹẹ, ọna keghi re ugha nọ ru IYOBỌ ẸGIẸGIẸ ne etẹn.

UKỌ NI SU ỌMWA Ukọ ni su ọmwa ẹre a zẹ yọ nọ ru iyobọ ne uwa. Lahọ ku obọ gbe ba iran ẹsẹsẹmwẹse, lekpae ne u lele adia ọghe iran vbe nọ dekaan ako ne okotọ na kun sie, ako ne emwa la lae asikoko kevbe ne iran la ladian, ehe itota kevbe avbe emwi ọvbehe.

OWEBE ỌGHE EMWA NI KPORHU IYẸN NỌ MAAN ỌGHE ARRIỌBA Avbe arọndẹ ọghe ẹghẹ hia, ni rre ukpo 23 ya mu 65, ni mwẹ ẹkorhiẹnrhiẹnmwẹ na yae vẹwa, iwinna ikporhu ọghe iran, keghi re na gie na tie, ne iran yo iko ọghe etẹn ni hoo ne iran yo Owebe Ọghe Etẹn Ni Kporhu Iyẹn Nọ Maan Ọghe Arriọba, na khian do vbe ẹdẹ e Sọnde vbe avan. A gha yae wewe ọ te sẹ ẹghẹ, ehe nọ khin zẹẹ, kevbe ẹghẹ na khian ya do iko na.