Ọtẹn Nọ Ghaan Nọ Ya Iyẹn Arriọba Wewe:

Gia kha wẹẹ, ọkpa vbe usun avbe ukọ ọghe Jesu ni mudia ye uhunmwu Oke Ọliv ẹre u khin. Jesu keghi rhiegbe ma uwa. Vbe ọ khian ghi kpa gha rrie ẹrinmwi, ọ na kha wẹẹ: “Orhiọn nọhuanrẹn gha ghi tuorre yan uwa nẹ, wa ghi gha mwẹ ẹtin, wa ghi ya sẹ osẹ mẹ vbe Jerusalẹm, vbe otọ e Judia hia, kevbe Sameria, uhiẹn ya sẹ ehe nọ ghi rree sẹ vbe agbọn na.” (Iwinna 1:8) De vbene ẹmwẹ na khian gha ye ruẹ hẹ vbe ekhọe?

Egbọre, u sẹtin gha ghee iwinna na kanyan, rhunmwuda, u ghee ẹre wẹẹ, emwi nọ lọghọ ẹre Jesu we ne uwa ru na. U sẹtin gha roro ẹre wẹẹ, ‘Vbene ima kherhe sẹ na, vbe ima khian ya sẹtin kporhu hẹ “ya sẹ ehe nọ ghi rree sẹ vbe agbọn na”?’ Egbọre, u vbe ya yerre, ẹmwẹ ne Jesu ya sekhae ma erhuanegbe ẹre vbe asọn nọ gbe fi ẹdẹ nọ wu, nọ na wẹẹ: “Ọviẹn ma sẹ enarẹn. Adeghẹ iran na zẹ mwẹ kpokpo, iran gha vbe zẹ uwa kpokpo; adeghẹ iran na ya ẹmwẹ mwẹ ru emwi, iran gha vbe ya ọghe uwa ru emwi. Ne uwa na re erhuanegbe mwẹ, ẹre ọ khian ya iran ru uwa avbe emwi na hia, rhunmwuda, iran ma rẹn Ọmwa nii nọ gie mwẹ rre.” (Jọn 15:​20, 21) Zẹvbe ne u ya mu ẹmwẹ na roro, u sẹtin do gha nọ egbuẹ wẹẹ, ‘Vbia khian ya sẹtin gha ta ẹmwẹ Arriọba Osanobua ma emwa ẹsẹsẹmwẹse hẹ, vbe emwa ghaa gbe mwẹ odan, ra iran ghaa zẹ mwẹ kpokpo?’

Inọta vbenian sẹtin vbe gha kpokpo ima orhiọn vbe ẹdẹnẹrẹ. Zẹvbe Osẹe Jehova ne ima khin, iwinna nọ bi ye ima egbe nọ, ne ima kporhu ẹsẹsẹmwẹse ma “emwa ni rre agbẹnvbo hia” “ya sẹ ehe nọ ghi rree sẹ vbe agbọn na.” (Mat 28:​19, 20) De vbene ima khian ya sẹtin musọe hẹ vbe iwinna na, agharhemiẹn wẹẹ, emwa gha gbe ima odan zẹvbe ne Baibol tae yotọ?

Ebe Iwinna Avbe Ukọ keghi vuọn ne okha ni gbe ọmwa otiti ọghe vbene Jehova ya ru iyobọ ne avbe ukọ kevbe Ivbi Otu e Kristi ni ghaa rrọọ vbe ẹghẹ nii, ne iran ya musọe vbe iwinna na waa iran ẹre. Te a gbẹn ebe ne u tie na, nọ mieke na ru iyobọ nuẹn ya rẹn okha ọghe Ivbi Otu e Kristi ni ghaa rrọọ vbe ẹghẹ nii, kevbe vbene iran ya gha ghọghọ hẹ, vbe iran ghi bẹghe ẹre wẹẹ, alaghodaro rre iwinna ikporhu. Ọ sẹtin kpa ruẹ odin vbe u gha bẹghe ẹre wẹẹ, emwi bun nọ ya ima kevbe Ivbi Otu e Kristi ni ghaa rrọọ vbe ẹghẹ nii khọ egbe. Ẹ i re iwinna ikporhu ne ima ru ọkpa ẹre ọ ya ima khọ egbe, sokpan, vbene iran vbe ya gha ru emwamwa iwinna na vbe ẹghẹ nii, erriọ ẹre ima vbe ru ẹre vbe ẹdẹnẹrẹ. U gha wa mu ọna roro, ẹ i mwẹ ọ ma ya ruẹ gha mwẹ ilẹkẹtin wẹẹ, Osanobua ne Jehova ẹre ọ wa ye dia iwinna nọ khian vbe otu ọghẹe vbe uhunmwu otagbọn na vbe ẹdẹnẹrẹ.

Ma ya aro yọ wẹẹ, zẹvbe ne u ya tie ebe Iwinna, ọ gha ya ruẹ gha mwẹ ilẹkẹtin wẹẹ, e Jehova gha ru iyobọ nuẹn kevbe wẹẹ, ọ ghi ya orhiọn nọhuanrẹn ọghẹe rhie ẹtin nuẹn, ne u mieke na sẹtin gha mwẹ izinegbe; ọna ọre erhunmwu ne ima na nuẹn. Erhunmwu ọvbehe ne ima vbe na, ọre ne ebe na rhie igiọdu nuẹn, ne u sẹtin ‘gha ta ẹmwẹ Arriọba Osanobua ma emwa ẹsẹsẹmwẹse’ kevbe ne u ru iyobọ ne iran ya do la odẹ imiẹnfan.—Iwinna 28:23; 1Tim 4:16.