E Jehova keghi zẹ e Jerimaia ne ọ gha re akhasẹ ọghe Ivbi e Juda. Ọ keghi tama rẹn ne ọ ya kporhu ma Ivbi e Juda kevbe ne ọ ya obọ sekhae ne iran vbe emwi dan ne iran ru. E Jerimaia keghi tama e Jehova wẹẹ: ‘Ọvbokhan kherhe ẹre I khin. I ma rẹn vbene I khian ya gu emwa ruẹ guan hẹ.’ E Jehova keghi tama rẹn wẹẹ: ‘Ghẹ gi ohan muẹn. I gha tama ruẹ emwi ne u khian ta. I gha ru iyobọ nuẹ.’

E Jehova keghi tama e Jerimaia ne ọ si ediọn ni rre Juda koko, ne ọ sirra iran guọghọ akhe kevbe ne ọ tama iran wẹẹ: ‘Erriọ ẹre a khian vbe ya guọghọ e Jerusalẹm rua.’ Vbe Jerimaia ghi ru vberriọ, ohu na gha mu ediọn ọghe Juda. Ohẹn ọkpa na tie ẹre Pasiọ keghi gbe Jerimaia, ọ na muẹn ye ehe nẹi khian na sẹtin zẹ obọ zẹ owẹ, evba nii ẹre ẹdẹ gbe ẹre yi. Ẹdẹ ghi gbe, e Pasiọ na zẹ ọre obọ. E Jerimaia keghi kha wẹẹ: ‘Egbe ena hia wọọ mwẹ nẹ. I i ghi kporhu hiehie.’ Sokpan ọ gele dobọ ikporhu yi ra? Hiehie! Vbe Jerimaia ghi muẹn roro, ọ na kha wẹẹ: ‘Te igiuhunmwu ọghe Jehova yevbe na ghee erhẹn nọ giẹn vbuwe egbe mwẹ. I i khian sẹtin dobọ ikporhu yi hiehie.’ E Jerimaia na ye gha ya obọ sekhae ne iran.

Vbe ukpo eso ghi gberra nẹ, ọba ọghe ọgbọn na suẹn gha kha yan otọ e Juda. Avbe ohẹn kevbe akhasẹ ohoghe na gha mu ohu e Jerimaia rhunmwuda igiuhunmwu ne ọ ya gha wewe. Iran keghi tama avbe okoro ọghe ẹvbo nii wẹẹ: ‘Ọ khẹke na gbe okpia na rua.’ E Jerimaia keghi tama iran wẹẹ: ‘Ọmwa nọ ma rẹn ọkpa rẹn eva ẹre uwa khian gbe rua na, rhunmwuda igiuhunmwu ọghe Jehova ẹre I ya wewe, ẹi re ẹmwẹ obọ mwẹ.’ Avbe okoro ghi họn ẹmwẹ ne Jerimaia tae, iran keghi kha wẹẹ: ‘A gha sẹ okpia na rae rhunmwuda ọ ma mwẹ emwi rhọkpa ne ọ ru.’

Rhunmwuda wẹẹ e Jerimaia ma  dobọ ikporhu yi, ohu na gha mu avbe okoro nii. Iran na ya tama ọba nọ gbe Jerimaia rua. Ọba keghi tama iran, ne iran ru e Jerimaia emwi nọ rhirhi khọn iran. Ẹre iran na ya mu e Jerimaia fi uwu uhae ne ekhuọrhọ vuọn, ne ọ mieke na wu ye evba. E Jerimaia na gha ziẹn ye uwu ekhuọrhọ.

Okpia ọkpa na tie ẹre Ebẹdmẹlẹk nọ ghaa winna vbe ẹguae ọba keghi tama ọba wẹẹ: ‘Avbe okoro ẹvbo na, fi e Jerimaia fi uwu uhae! A gha sẹrae ye evba, ọ gha wu.’ Ọba keghi tama rẹn nọ viọ ikpia 30 ba egbe ne iran ya si e Jerimaia ladian vbuwe uhae. Ọ khẹke ne ima yegbe tae Jerimaia, nọ ma kue ne ọlọghọmwa ne ọ werriẹ aro daa mu idobo ye iwinna ikporhu ọghẹe.