Ukpo ukpo, ẹre Ivbi e Ju ya gha do Ugie Alagberra vbe ikpẹdẹ nogie 14 vbe uki e Nisan. Te iran ghaa do ugie na, ne iran ya gha yerre odẹ ne Jehova ya fan iran vbe otọ Igipt gha rrie otọ ne ọ yan rẹn wẹẹ iren gha mu ne iran. Vbe ọ ghi rre ukpo 33 C.E., Jesu kevbe avbe ukọ ọghẹe keghi do Ugie Alagberra vbe ughugha ọghe egedege ọkpa nọ rre Jerusalẹm. Vbe iran ghi do ugie na fo nẹ, Jesu keghi kha wẹẹ: ‘Ọkpa vbuwe uwa gha ya mwẹ dẹ.’ Ẹmwẹ na keghi kpa iran odin, iran na gha nọ Jesu wẹẹ: ‘De ọmwa nọ khin yi?’ Jesu keghi wanniẹn iran wẹẹ: ‘Ọmwaikọmwa ne I rhie ebrẹdi na, ẹre ọ khian ya mwẹ dẹ.’ Vbe iyeke ọni, Jesu keghi fian ebrẹdi ne Judas Iskariọt. Vbe ọwarọkpa nii, e Judas na kpa sẹ iran rae.

Ẹre Jesu na ghi na erhunmwu, ọ na bunnọ ebrẹdi nii, ọ na ghae re ne avbẹ ukọ ọghẹe. Ọ keghi tama iran wẹẹ: ‘Wa miẹn. Ọna mudia ye egbe mwẹ ne I khian ya zọ ese ne uwa.’ Vbe iyeke ọni, Jesu keghi na erhunmwu ye ayọn ne ọ dayi mwẹ obọ, ọ na vbe mu ne avbe ukọ ọghẹe ne iran wọn vbọ. Ọ na khama iran wẹẹ: ‘Wa wọn rẹn. Ọna mudia ye esagiẹn mwẹ ne I khian da kua, ne uwa mieke na miẹn ayabọ orukhọ ọghe uwa. I gu uwa ta ile wẹẹ, wa gha deba mwẹ kha vbe ẹrinmwi. Wa gha ru ọna vbe ukpo ukpo, ne uwa ya gha yee mwẹ rre.’ Te erhuanegbe Jesu wa ye do ugie na, vbe ukpo ukpo. Ugie na, ẹre a ghi rẹn ye Evbare Ota Ọghe Nọyaẹnmwa ra Ugie Ayere.

 Vbe iran ghi rri evbare fo nẹ, iran na suẹn imuaẹmwẹ. Iran kegha sinmwi ye ukpo ọghe ọmwa nọ hiunsi sẹ. Sokpan Jesu na tama iran wẹẹ: ‘Ọmwa nọ hiunsi sẹ vbuwe ẹbu uwa, ọre ọmwa ne ọ ghee egbe ẹre zẹvbe ọmwa nọ ghi kanmwa sẹ.

‘Ọse mwẹ ẹre uwa khin. I gi uwa rẹn emwi hia ne Erha mwẹ wẹẹ ne I tama uwa. I gha rherhe bu Erha mwẹ vbe ẹrinmwi. I ghi sẹ uwa rae ye agbọn na. Sokpan deghẹ uwa na hoẹmwẹ egbe uwa, emwa gha rẹn wẹẹ erhuanegbe mwẹ ẹre uwa khin. Zẹvbe ne imẹ ya hoẹmwẹ uwa, erriọ ẹre ọ khẹke ne uwa ya hoẹmwẹ egbe uwa.’

Ẹre Jesu na ghi na erhunmwu, ne Jehova gbogba ga erhuanegbe ẹre hia. Ọ na rinmwian e Jehova ne ọ ru iyobọ ne iran ya gha mwẹ akugbe. Ọ na vbe na erhunmwu, ne eni e Jehova khian na kpe huan. Vbe iyeke ọni, Jesu kevbe avbe ukọ ọghẹe keghi so ihuan urhomwẹ gie Jehova. Iran ghi so ihuan fo nẹ, iran na gha rrie orere. Ẹghẹ sẹ nẹ nia, ne eghian khian ya mu Jesu.