Ọ ghaa mwẹ uke ọkpa, nọ ghaa dabọ vbe onurho ọgua Osa vbe ẹdẹgbegbe. Vbe ọ ghi rre ẹghẹ avan vbe ẹdẹ ọkpa, ọ keghi miẹn e Pita kevbe Jọn vbe iran khian la ọgua Osa. Ọ keghi tama iran wẹẹ: ‘Lahọ uwa gualọ emwi kherhe mẹ.’ Ẹre Pita na tama rẹn wẹẹ: ‘Emwi ne I khian rhie nuẹ sẹ igho. Kpaegbe, ne u suẹn gha khian vbe eni Jesu!’ Vbe iyeke ọni, e Pita keghi si ẹre kpaegbe. Ẹre nene okpia na suẹn gha khian! Vbe emwa ghi miẹn emwi ọyunnuan na, nibun vbọ keghi khian Ivbiotu e Kristi.

Sokpan, ohu kegha mu avbe ohẹn kevbe Ivbi e Sadusi. Iran keghi si e Pita vbe Jọn gha rrie owa ẹzọ. Vbe iran ghi sẹ evba, iran keghi nọ e Pita vbe Jọn wẹẹ: ‘De eke ne uwa na miẹn ẹtin ne uwa ya mu okpia na egbe rran?’ E Pita keghi wanniẹn iran wẹẹ: ‘Jesu Kristi ne uwa gbe rua ẹre ọ rhie ẹtin ne ima.’ Ẹre avbe ọkaolotu ugamwẹ na van mu iran wẹẹ: ‘Wa ghẹ ghi dọlegbe ta ẹmwẹ Jesu!’ Sokpan e Pita vbe Jọn keghi tama iran wẹẹ: ‘Ma i khian sẹtin da unu ima yi. Te ima khian ye gha guan vbekpae Jesu.’

Vbe a ghi fan iran nẹ, iran na ya na iyẹn emwi nọ sunu ma erhuanegbe nikẹre. Iran hia na ghi na erhunmwu gie Jehova wẹẹ: ‘Rhie udinmwẹ ne ima, ne ima ya sẹtin gha ru iwinna ruẹ.’ E Jehova wa họn erhunmwu iran. Ọ na ya orhiọn nọhuanrẹn ọghẹe rhie ẹtin ne iran, ne iran ya gha kporhu iyẹn nọ maan kevbe ne iran gha mu emwa egbe rran. Iran na vbe gha muan yọ. Ivbi e Sadusi kegha gbọvo iran, rhunmwuda ọni, iran na mu avbe ukọ ọghe Jesu fi eghan. Sokpan vbe asọn nii, e Jehova keghi gie odibo ọghẹe rre, ne ọ do kie urho ọghe eghan nii. Ọ na tama avbe ukọ wẹẹ: ‘Wa werriegbe gha rrie ọgua Osa, ne uwa ya maa emwa emwi vba.’

Ẹdẹ ghi gbe, emwa keghi tama avbe ọkaolotu ugamwẹ ni rre Sahẹndrin wẹẹ: ‘Urho eghan nii ma te kie yotọ sokpan emwa ne uwa viọ ye uwu ẹre i ghi rre evba! Iran wa kporhu vbuwe ọgua Osa nia!’ Iran na dọlegbe ya mu avbe ukọ gha die Sahẹndrin. Ogie ohẹn keghi nọ avbe ukọ wẹẹ:  ‘Ima ma ka tama uwa, ne uwa ghẹ ghi kporhu vbekpae Jesu?’ E Pita na wẹẹ: “Ne Osa khare ẹre ima ra ya ru emwi, ighẹ ẹi re ne emwa ne agbọn khare.”

Avbe ọkaolotu ugamwẹ ghi họn ẹmwẹ na, ohu mu iran sẹrriọ wẹẹ, iran na gha hoo ne iran gbele avbe ukọ rua. Sokpan Ovbi e Farisi ọkpa na tie ẹre Gamaliẹl keghi tama iran wẹẹ: ‘Wa mwẹ ẹwaẹn! Ọ gha kẹ, Osanobua ẹre ọ ye iran ike. Ra te uwa hoo ne uwa gu Osanobua gbinna ra?’ Iran keghi rhie ibude ọghe Gamaliẹl, sokpan iran na ye gbe avbe ukọ asan. Iran na werriegbe tama avbe ukọ ne iran ghẹ ghi kporhu. Vbe iyeke ọni, iran na zẹ iran obọ. Sokpan avbe ukọ ma gi egbe wọọ iran. Iran na ye gha kporhu iyẹn nọ maan vbe ọgua Osa kevbe ke owa ya sẹ owa.