Vbe ọ ghi rre ẹdẹ ọkpa, ẹyẹn ọkpa na do gu Ivi guan. Adam ma gha rre evba. Ẹyẹn nii na nọ Ivi wẹẹ: ‘Ẹmwata gele nọ wẹẹ Osanobua wẹẹ ne uwa ghẹ rri avbe ọmọ erhan na hia ra?’ Ivi na kha wẹẹ: ‘Ọkpa kẹkan ẹre Osanobua wẹẹ ne ima ghẹ re vbọ. Ọ wẹẹ ima gha rri ọre, ima ghi wu.’ Ẹyẹn nii na kha wẹẹ: ‘Uwa i wu. Vbene ẹmwata, te uwa khian gha yevbe Osanobua deghẹ uwa na rri ọre.’ Ẹmwata ẹre ọni gele khin ra? Hiehie! Ohoghe nọkhua wa gha nọ. Sokpan Ivi na yaeyi. Ọmọ erhan nii na gha khọn Ivi zẹvbe ne ọ ya gha ghee ẹre. Ọ na rri ọmọ erhan nii, ọ na vbe rhie ne Adam vbọ. Adam rẹnrẹn wẹẹ iran gha wu deghẹ iran ma na họn ẹmwẹ ne Osanobua. Sokpan ọ na ye rri ọmọ erhan nii.

Vbọ ghi zẹ kpẹẹ, e Jehova na do gu Adam vbe Ivi guan. Ọ na nọ iran evbọzẹe ne iran na he ẹmwẹ ye irẹn obọ. Ivi na wẹẹ ẹyẹn nii ẹre ọ si ẹre, Adam na wẹẹ Ivi ẹre ọ si ẹre. E Jehova na ghi khulo iran hin ogba nii rre. E Jehova keghi gie avbe odibosa eso ne iran ya mudia ye onurho ọghe ogba nii, ọ na vbe ru ẹre ne agbada gha fieghe lẹga vbe evba, ne Adam vbe Ivi ghẹ sẹtin laọ.

E Jehova na wẹẹ te irẹn khian vbe rri ọre oya ighẹ ọmwa nọ mu Ivi rẹrẹ. Ẹi re ẹyẹn nii ẹre ọ gele gu Ivi guan. E Jehova ma yi ẹyẹn nọ gha guan. Odibosa dan ẹre ọ loo ẹyẹn ya gu Ivi guan nọ mieke na muẹn rẹrẹ. Odibosa dan nii ọre Setan. Vbe odaro, e Jehova gha guọghọ e Setan rua, nẹ ghẹ ghi mieke na gha mu emwa rẹrẹ, ne iran gha ru emwi dan.