Ebraham keghi maa Aizik re, nọ hoẹmwẹ e Jehova kevbe nọ mu ẹtin yan eyan ne Osanobua rhirhi ru. Vbe Aizik ghi rre ukpo 25, e Jehova keghi tama Ebraham nọ ru emwi ọkpa nọ lọghọ na ru. Uwẹ rẹn emwi ne ọni khin ra?

Osanobua keghi tama Ebraham wẹẹ: ‘Lahọ, ya ukpọmọkpa ne u mwẹ ru izọese gu mwẹ vbe uhunmwu oke ọghe Moraia.’ Agharhemiẹn wẹẹ Ebraham ma rẹn evbọzẹe ne Jehova na wẹẹ ne irẹn ru egbe emwi vberriọ, ọ na ye họn ẹmwẹ ne Jehova.

Ẹdẹ ghi gbe, Ebraham keghi rhie Aizik kevbe eguọmwadia ọghẹe eva lele egbe gha rrie Moraia. Vbe iyeke ikpẹdẹ eha, iran na suẹn gha bẹghe oke Moraia vbe urria. Ebraham keghi tama eguọmwadia ọghẹe ne iran mudia khẹ irẹn vbe Aizik, ne iran ya ru izọese. Ebraham na wẹẹ ne Aizik mu erhan lele irẹn, vbene irẹn na rhie abẹ mwẹ. Aizik keghi nọ erhae wẹẹ: ‘Baba o, aranmwẹ ne ima khian ya ru izọese vbo?’ Ebraham keghi kha wẹẹ: ‘Ovbimwẹ, e Jehova gha kpemehe ẹre.’

Vbe iran ghi sẹ nene uhunmwu oke, iran na do bọ aka. Ebraham na ghi gbalọ Aizik obọ vbe owẹ, ọ na muẹn ye uhunmwu nene aka.

Ebraham keghi tọn abẹ mu, vbe ọwarọkpa nii, odibosa keghi da tie Ebraham wẹẹ: ‘Ebraham! Ghẹ gbe ọvbokhan nii rua! I wa rẹn nia wẹẹ, u mwẹ amuẹtinyan daa Osanobua ẹre ọ si ẹre ne u na muegbe ne u ya ye ovbuẹ zọ ese.’ Vbe iyeke ọni,  Ebraham keghi bẹghe ohuan ọkpa ne irri rhie ẹre igho. Ọ na zẹgiẹ fannọ emwi nọ ya gbalọ Aizik, ẹre ọ na ghi ya ohuan nii zọ ese.

Ke ẹdẹrriọ kpa, e Jehova na suẹn gha tie Ebraham ọsiọre. U rẹn emwi nọ si ẹre ra? Ebraham keghi ru emwi hia ne Jehova wẹẹ nọ ru, uhiẹn vbe ọ ma rẹn evbọzẹ ne Jehova na wẹẹ nọ ru vberriọ.

E Jehova na werriegbe yan ma Ebraham wẹẹ: ‘I gha fiangbuẹ, I ghi vbe ya ivbuẹ khian nibun.’ Ọni rhiema wẹẹ, ẹgbẹe ọghe Ebraham ẹre Jehova khian la fiangbe emwa esi hia.