IRUẸMWI 14
Ọviẹn Nọ Họn Ẹmwẹ Ne Osanobua
Vbuwe emọ ikpia 12 ne Jekọb biẹlẹ, nogie 11 ẹre Josẹf ghaa khin. Etiọnrẹn ne ọdiọn ghi bẹghe ẹre wẹẹ e Josẹf ẹre erha iran hoẹmwẹ ọnrẹn sẹ, iran na gha gbọvo ẹre, uhiẹn iran na vbe gha khẹko ẹre. Vbe Josẹf ghi mina imina eso vbe ẹdẹ ọkpa, ọ keghi tama etiọnrẹn vbekpa re. Etiọnrẹn na gha roro wẹẹ emwi ne imina nii rhiema ọre wẹẹ, ototọ e Josẹf ẹre iran khian gha ye. Rhunmwuda ọni nia, iran na kakabọ gha mu ohu ẹre!
Vbe ẹdẹ ọkpa, etiẹn e Josẹf na gha gbaroghe ohuan ọghe erha iran vbe ọkpẹn e Siẹkẹm. Ẹre erha iran ighẹ e Jekọb na gie Josẹf bu iran, nọ vbe ya ghee vbene iran ye hẹ vbe odọ. Iran ghi ke urria bẹghe Josẹf khian bu iran dee, iran na kha wẹẹ: ‘Ya ghee ọni, nọ mina imina. Uwa gia wa gbe ẹre rua!’ Iran na muẹn fi uwu uhae ne amẹ i ye. Sokpan e Juda keghi kha wẹẹ: ‘Ai ghi wa khiẹn ọnrẹn zẹvbe ọviẹn, na gha te ya gbe ẹre rua?’ Iran keghi khiẹn e Josẹf ne Ivbi e Midian ni rrie otọ Igipt. Esiliva 20 ẹre iran ya khiẹn ọnrẹn.
Etiẹn e Josẹf keghi gbe ẹwe, iran na fi ẹwu ne guọrọ ọghe Josẹf ye uwu esagiẹn ọnrẹn. Iran ghi rhie ẹwu nii gie erha iran, iran na nọ rẹn wẹẹ: ‘Ọna i re ẹwu ọghe ovbuẹ ra?’ Vbe Jekọb ghi miẹn ọnrẹn, ọ na gha roro ẹre wẹẹ aranmwẹ nọ khọọ gbe Josẹf nẹ. Ọ na suẹn gha khiẹ. Ọmwa rhọkpa ma sẹtin fu ẹre ẹko rre.
Vbe a ghi mu e Josẹf sẹ Igipt nẹ, iran keghi khiẹn ọnrẹn ne okpia ọkpa na tie ẹre Pọtifa nọ ghaa winna vbe ẹguae ọba. Sokpan e Jehova ma sẹ e Josẹf rae. E Pọtifa na do bẹghe ẹre wẹẹ, e Josẹf keghi re ọmwa nọ guẹ iwinna kevbe ọmwa na gha sẹtin gba ẹko ẹre. Ẹre Pọtifa na mu emwi hia nọ mwẹ ne Josẹf, ne ọ gha gbaroghe.
Ugbẹnvbe amwẹ e Pọtifa ghi bẹghe ẹre wẹẹ e Josẹf keghi re ọmọ nọ zọ ẹse kevbe nọ wa vbe mose, ọ na gha kpikpi ẹre vbe ẹghẹ hia nọ gu irẹn
lovbiẹ. De emwi ne Josẹf gha ghi ru? Ọ keghi tama amwẹ e Pọtifa: ‘Ẹn o! I i khian sẹtin ru egbe emwi vberriọ. Te arowa mwẹ wa gba ẹko mwẹ kevbe wẹẹ ọvbokhan rẹn ẹre u khin. I gha gu ruẹ lovbiẹ, ọni nọ wẹẹ I ru orukhọ daa Osanobua!’Sokpan, ọ ghi sẹ ẹdẹ ọkpa, amwẹ e Pọtifa na dobọ mu ukpọn e Josẹf, ọ na khama rẹn wẹẹ nọ gu irẹn lovbiẹ. Sokpan e Josẹf keghi lẹẹ fua. E Pọtifa ghi sẹ owa, ọvbokhan rẹn na ba e Josẹf ohoghe. Ọ na tama ọdafẹn ọnrẹn wẹẹ, e Josẹf te mu irẹn yagha. Vbene ohu ghi mu e Pọtifa sẹ, ọ na mu e Josẹf fi uwu eghan. Sokpan e Jehova ma mianmian e Josẹf.
“Rhunmwuda ọnii nian, gha mu egbe rriotọ vbe odaro obọ ẹtin nọkhua ọghe Osanobua, ne irẹn miẹn ehe na tọn ọn mu vbe ẹghẹ ne ọ keyi vbe aro ẹre.”—1 Pita 5:6