Ayi ọghomwa ẹre ọ mwẹ ẹwaẹn sẹ ima. Zẹvbe erha nọ mwẹ ahoẹmwọmwa, irẹn keghi gbaroghe ima. Deba ọni, irẹn ma hoo ne ima rhiegbe hiẹn ototọ irẹn rre, gha kha yan egbe ima. (Jerimaia 10:23) Rhunmwuda ọni, zẹvbe ne ọmọ obọ gualọ adia ọghe evbibiọre, erriọ ima hia vbe gualọ adia ọghe Osanobua. (Aizaia 48:17, 18) Avbe ilele ọghe Baibol keghi re adia kevbe esọhẹ nọ ke obọ Osanobua rre.—Tie 2 Timoti 3:16.

Avbe uhi kevbe ilele ọghe Jehova, keghi ma ima emwi nọ dekaẹn odẹ nọ maan sẹ na gha ya yin vbe ẹghẹ na ye na, kevbe iran vbe gie ima rẹn vbene ima gha ya miẹn isaẹnse ọghe ẹdẹdẹmwẹdẹ vbe odaro. Ugbẹnvbe a miẹn wẹẹ, Osanobua ẹre ọ yi ima, ọ khẹke nima gbọyẹmwẹ ye adia ọghẹe.—Tie Psalm 19:7, 11; Arhie Maan 4:11.

Avbe ilele ọghe Baibol keghi re avbe ẹmwata ne kpataki nẹi fiwerriẹ. Sokpan a gha sẹtin lele uhi zẹẹ, vbe emwi eso tara gha de rre. (Diuteronomi 22:8) Te ima gha loo iziro ọghomwa ya rẹn otọre ilele ọghe Baibol nọ khẹke ne ima dayi vbe emwi eso gha sunnu. (Itan 2:10-12) Vbe igiemwi, e baibol ma ima re wẹẹ, arrọọ keghi re ẹse nọ ke obọ Osanobua rre. IIele ne kpataki nii, sẹtin dia ima vbe ima gha rre isiwinna, vbe ima gha rre owa, kevbe vbe ima gha rhie ehe. Ọ keghi ru iyobọ ne ima, na gha baba egbe vbe emwikemwi ne ima rhirhi gha ru.—Tie Iwinna 17:28.

Jesu guan kaẹn ilele eva nọ ghi ru ekpataki sẹ. Nokaro rhiẹre ma evbọzẹ kpataki ne a na yi emwa  nagbọn, ọni ọre wẹẹ, ne iran rẹn Osanobua, ne iran hoẹmwẹ ọnrẹn, kevbe ne iran gae vbe odẹ ọghe amuẹtinyan. Ọ khẹke ne ima gha muẹn roro ilele nokaro na, a te miẹn wẹẹ, ma ru atamuolọyan nọ rhirhi gha khin. (Itan 3:6) Emwa ni yin vbe odẹ nọ gu ilele na ro, gha sẹtin gu Osanobua gha muobọ, iran gha vbe miẹn oghọghọ ọghe ẹmwata kevbe arrọọ ọghe etẹbitẹ.—Tie Matiu 22:36-38.

Ilele nogieva gha ru iyobọ ne ima, na ya gha gu emwa ọvbehe loo vbuwe ọfumwegbe. (1 Kọrinti 13:4-7) Odẹ ne ima khian ya rhie ilele nogieva na ye uyinmwẹ, ọre na gha yegbe ta Osanobua vbe nọ dekaẹn obọ nọ ya mu emwa—Tie Matiu 7:12; 22:39, 40.

Avbe ilele Baibol keghi ru iyobọ ne avbe ẹgbẹe ya gha mwẹ akugbe kevbe ahoẹmwọmwa. (Kọlose 3:12-14) Ẹmwẹ ọghe Osanobua vbe gbaroghe avbe ẹgbẹe lekpae ne ọ na ma iran re ilele ọvbehe nọ gha ru iyobọ ne iran, ọni ọre wẹẹ, ne orọnmwẹ gha re ọghe ẹdẹdẹmwẹdẹ.—Tie Gẹnẹsis 2:24.

Adeghẹ ima na gha lele imamwaemwi ọghe Baibol, ma gha sẹtin kpemehe ne egbe ima vbe odẹ ọghe ikpakpa, kevbe wẹẹ, egbe ghi vbe rọkhọ ima. Vbe igiemwi, emwa ni yan isiwinna keghi gualọ emwa ne iran gha viọ vbe iwinna, nọ mwẹ ẹkoata kevbe nọ mu aro ye iwinna zẹvbe nọ gu ilele ọghe Baibol ro. (Itan 10:4, 26; Hibru 13:18) Ẹmwẹ ọghe Osanobua vbe ma ima re, ne emwi ne ima mwẹ gha sẹ ima ọkẹn, kevbe ne ima gha ghe aguegbemuobọ ne ima gu Osanobua mwẹ, zẹvbe emwi nọ hiunsi sẹ emwi ikpakpa.—Tie Matiu 6:24, 25, 33; 1 Timoti 6:8-10.

Uyinmwẹ nọ gu ilele ọghe Baibol ro keghi rhie egberanmwẹ ne ọmwa. (Itan 14:30; 22:24, 25) Vbe igiemwi, adeghẹ ima na lele uhi ọghe Osanobua vbe nọ dekaẹn nai ghẹ dayọn gbe egbe, ma i khian mu emiamwẹ nọ wegbe kevbe ima i khian miẹn odekun. (Itan 23:20) E Jehova kue yọ ne ima gha da ayọn nọ fian, sokpan ọ ye obọ sekhae ne ima, na gha dae ye oreghe. (Psalm 104:15; 1 Kọrinti 6:10) Avbe ilele ọghe Osanobua keghi ru iyobọ ne ima, lekpae nọ na ma ima re, na gha begbe vbe odẹ ne ima ya yin kevbe iro ne ima zẹ. (Psalm 119:97-100) Ọrheyerriọ, ẹi re rhunmwuda umamwẹ ọghe egbe iran ọkpa, ẹre ọ ye Ivbiotu e Kristi họn ẹmwẹ ne Osanobua. Iran keghi ru vberriọ, rhunmwuda ọghọ ne iran rhie ne Jehova.—Tie Matiu 5:14-16.