IRUẸMWI 13
De Iyẹn Nọma Nọ Rrọọ Vbekpae Ugamwẹ?
1. Ugamwẹ hia ẹre ọ wa maan ra?
Ai miẹn ugamwẹ ne emwa ni mwẹ ẹkoata i ye. Iyẹn nọma ẹre nọ wẹẹ, Osanobua bẹghe emwa vberriọ kevbe wẹẹ, ọ gbaroghe iran. Ọ keghi re emwi nọ da ọmwa wẹẹ, ugamwẹ khian ne emwa ghi loo ya ru emwi dan. (2 Kọrinti 4:3, 4; 11:13-15) Zẹvbe ne iyẹn rhiẹre ma, ugamwẹ eso keghi mwẹ obọ vbe igbinna oguo, uniẹ ẹvbo ohoho na wabọre rua, okuo kevbe emọ ne giẹrẹ na mu yagha. Emwa ni ga Osanobua vbe odẹ ọghe ẹmwata, keghi khiẹ ye egbe avbe uyinmwẹ na!—Tie Matiu 24:3-5, 11, 12.
Ugamwẹ ẹmwata keghi rhie uyi ne Osanobua, sokpan ugamwẹ ohoghe keghi ru emwi nọ ye ohu muẹn. Ugamwẹ ohoghe keghi ya ma emwa emwi, iziro nẹi rre uwe Baibol, deba imamwaemwi ọghe ohoghe vbekpae Osanobua kevbe emwa ni wulo. Sokpan, e Jehova hoo ne emwa rẹn ẹmwata vbekpae irẹn.—Tie Ezikiẹl 18:4; 1 Timoti 2:3-5.
2. De Iyẹn Nọma Nọ Rrọọ Vbekpae Ugamwẹ?
Ma ghọghọ wẹẹ, emwa ni ye unu tae wẹẹ, iran hoẹmwẹ Osanobua i khian sẹtin mu irẹn rẹrẹ, rhunmwuda agbọn ọghe Setan ẹre iran hoẹmwẹ ọnrẹn. (Jems 4:4) Eni ne evbagbẹn nọhuanrẹn tie ugamwẹ ohoghe hia re, ọre “Babilọn Nọkhua.” E Babilọn keghi re okpẹvbo nẹdẹ ne ugamwẹ ohoghe ke suẹn, vbe iyeke okpamẹ nọkhua nọ rrọọ re vbe ẹdẹ ọghe Noa. Vbe nẹi khian kpẹ gbe, Osanobua gha hihiẹ ọguọghua ọghe udomwurri yan ugamwẹ ni mu emwa rẹrẹ kevbe ni yọn emwa muotọ.—Tie Arhie Maan 17:1, 2, 5, 16, 17; 18:8.
Iyẹn nọma ọvbehe ye rrọọ. E Jehova ma re mianmian emwa ẹkoata ni rre uwe ugamwẹ ohoghe ughughan vbe otagbọn hia. Ọ keghi ku egbe emwa vberriọ kugbe lekpae nọ na ma iran ne ẹmwata.—Tie Maika 4:2, 5.
3. De emwi nọ khẹke ne emwa ẹkoata ru nia?
Ugamwẹ ọghe ẹmwata keghi ku emwa kugbe
E Jehova keghi mwẹ ẹkorhiẹrhiẹnmwẹ da emwa esi kevbe ni ta ẹmwata. Ọ keghi rhie igiọdu ne iran, niran zẹ egbe hiẹn ugamwẹ ọhoghe rre.—Tie Arhie Maan 18:4.
Vbe orre nokaro, emwa ni mwẹ ẹkoata ghi họn iyẹn nọma nọ ke unu ọghe avbe ukọ ladian, iran keghi ye oghọghọ miẹn ọnrẹn yi. Iran keghi ruẹ uyinmwẹ ọghe ọgbọn vbe obọ e Jehova, uyinmwẹ nọ ye ọmwa mwẹ oghọghọ, nọ mwẹ evbọdemu kevbe nọ ye ọmwa mwẹ ayayẹro. Iran keghi rhie igiemwi esi yotọ nima nọ rrọọ vbe ẹdẹnẹrẹ rhunmwuda, iran miẹn iyẹn nọma yi lekpae niran na mu ugamwẹ e Jehova karo vbe ẹdẹ arrọọ ọghe iran.—Tie 1 Tẹsalonaika 1:8, 9; 2:13.
Emwa gha kpa hiẹn ugamwẹ ohoghe rre do deba ẹgbẹe ọghe Jehova, e Jehova ghi gbọbokhian ne iran. Adeghẹ u na miẹn ọnrẹn yi itie oghọghọ ọghe Jehova, u do gha re ọse ọre, kevbe wẹẹ, u do gha re ọkpa vbe ẹgbẹe nọ mwẹ ahoẹmwọmwa ni ga e Jehova. Sẹhia, u do gha mwẹ arrọọ ọghe etẹbitẹ.—Tie Mak 10:29, 30; 2 Kọrinti 6:17, 18.
4. De vbene Osanobua khian ya ruẹ hẹ ne oghọghọ gha rre ehe hia vbe otagbọn?
Ibuohiẹn nọ de nẹ ugamwẹ ọghe ohoghe keghi re iyẹn nọma. Ọ gha fan emwa nagbọn hia vbe imu ọghe a yọn ọmwa muotọ. Ẹghẹ nii, ai ghi werriegbe miẹn ugamwẹ ohoghe ni mu emwa rẹrẹ, kevbe ni sie ighaegbe. Emwa hia fẹrẹ do gha rrọọ vbe akugbe vbuwe ugamwẹ ọkpa ọghe Osanobua ẹmwata.—Tie Arhie Maan 18:20, 21; 21:3, 4.
