IRUẸMWI 13
Vbene Ugamwẹ Ohoghe Ya Rhie Ozan Gie Osanobua Hẹ
Deghẹ Osa ọghe ahoẹmwọmwa ẹre Osanobua khin, vbọ ghi zẹe ne emwa ni wẹẹ iran gae na yin uyinmwẹ atosi? Ẹmwata nọ rrọọ ọre wẹẹ, ugamwẹ ohoghe ẹre iran khin; te iran rhie ozan gie Osanobua. Vbe iran ya rhie ozan gie Osanobua hẹ? De aro ne Osanobua ya ghee iran? Vbe ọ khian ru iran hẹ?
1. De vbene imamwaemwi ugamwẹ ohoghe ya rhie ozan gie Osanobua hẹ?
Te ugamwẹ ohoghe “fi ẹmwata nọ rre ẹmwẹ Osanobua werriẹ ya khian ohoghe.” (Rom 1:25) Vbe igiemwi, ugamwẹ nibun ma gi emwa iran rẹn eni Osanobua. Sokpan e Baibol gi ima rẹn wẹẹ, te ọ khẹke na gha loo eni Osanobua. (Rom 10:13, 14, NW) Emwi dan gha sunu, avbe ọkaolotu ugamwẹ eso ghi kha wẹẹ, ahoo ọghe Osanobua nọ. Sokpan ohoghe nọkhua ẹre ọna wa khin. Ẹi re Osanobua ẹre ọ si emwi dan ni sunu. (Tie Jems 1:13.) Ọ keghi da ọmwa wẹẹ, ugamwẹ ohoghe ya Osanobua khian ne emwa ghi lẹẹ na.
2. De vbene uyinmwẹ emwa ni rre ugamwẹ ohoghe ya rhie ozan gie Osanobua hẹ?
Obọ ne emwa ni rre ugamwẹ ohoghe ya mu emwa lughaẹn ne obọ ne Jehova ya mu emwa. E Baibol khare wẹẹ te orukhọ ọghe ugamwẹ ohoghe “yo sẹ iso.” (Arhie Maan 18:5) Ke otọ gha dee, ẹre iran ke mwẹ obọ vbe otu azẹ, okuo kevbe uwu ọghe emwa nibun. Te avbe ọkaolotu ugamwẹ ohoghe eso wa zẹ re zẹ kua, vbene emwa ọvbehe na miẹn ẹsọn lele iran. Ena hia so igiẹ yọ wẹẹ iran ma rẹn Osanobua, amaiwẹ te iran khian ghi do gha maa emwa emwi vbekpa re.—Tie 1 Jọn 4:8.
3. De aro ne Osanobua ya ghee ugamwẹ ohoghe?
Deghẹ emwi ne ugamwẹ ohoghe ru sọnnọ uwẹ, inu ghi nọ ne Jehova? E Jehova hoẹmwẹ emwa hia, sokpan ẹi ya aro nọ maan ghee avbe ọkaolotu ugamwẹ ni rhie ozan gie ẹre kevbe ni ya obọ atosi mu emwa iran. Irẹn yan rẹn wẹẹ, te a khian wabọ ugamwẹ ohoghe rua, “ai ghi ra vbe dọlegbe miẹn ọnrẹn.” (Arhie Maan 18:21) Osanobua gha do ru ọna vbe nẹi khian ghi kpẹẹ gbe.—Arhie Maan 18:8.
GUALỌ OTỌ RE SAYỌ
Gia ziro yan rẹn sayọ, aro ne Osanobua ya ghee ugamwẹ ohoghe. Gia vbe ziro yan emwi ne ugamwẹ ohoghe he ru, kevbe evbọzẹe nọ ma na khẹke ne u rhunmwuda emwi ne iran he ru kha wẹẹ, u i ghi ruẹ vbekpa e Jehova.
4. Osanobua ma kpasẹ ye ugamwẹ hia
Emwa nibun yayi wẹẹ te ugamwẹ yevbe odẹ ughughan na la sẹ ehe ne Osanobua ye. Sokpan ẹmwata ẹre ọna khin ra? Tie Matiu 7:13, 14, NW, iyeke ọni, uwa ghi ziro yan inọta na:
-
De vbene Baibol ya gie odẹ nọ su rrie arrọọ hẹ?
Kpee VIDIO na, iyeke ọni, uwa ghi ziro yan inọta nọ lelẹe.
-
E Baibol maa ima re wẹẹ, ugamwẹ hia ẹre Osanobua kpasẹ yi ra?
5. Emwa ni rre ugamwẹ ohoghe i mwẹ ahoẹmwọmwa vbene Osanobua ye
Odẹ ughughan ẹre ugamwẹ ohoghe he ya rhie ozan gie Osanobua. Ọkpa vbọ ọre ne iran na mwẹ obọ vbe okuo. Ne u ya rẹn odẹ ọkpa ne iran he ya ru ọna, kpee VIDIO na. Iyeke ọni, uwa ghi ziro yan inọta ni lelẹe.
-
De emwi ne esọsi nibun ru vbe ẹghẹ na ya gha khọn Okuo Ọgbagbọn Nogieva?
-
Vbe uwẹ a ghee emwi ne iran ru na hẹ?
Tie Jọn 13:34, 35 kevbe 17:16. Iyeke ọni, uwa ghi ziro yan avbe inọta na:
-
Vbua yayi wẹẹ ọ ye Jehova hẹ, vbe emwa ni wẹẹ iran gae ghaa mwẹ obọ vbe okuo?
-
Ugamwẹ ohoghe ẹre ọ si emwi dan nibun ni sunu. De emwi eso ne iran ru, ne aro ruẹ he sẹ, nọ rhie ẹre ma wẹẹ, iran i ya egbe taa Osanobua vbe odẹ nọ ya rhie ahoẹmwọmwa ma?
Ọ gha de ọghe ahoẹmwọmwa na rhie ma, ugamwẹ ohoghe i ya egbe taa Osanobua hiehie
6. Osanobua hoo nọ ru iyobọ ne emwa ya ladian vbe ugamwẹ ohoghe
Tie Arhie Maan 18:4, a iyeke ọni, uwa ghi ziro yan inọta na:
-
Vbọ ye ruẹ hẹ vbe ekhọe, ne u na rẹn wẹẹ Osanobua hoo nọ ru iyobọ ne emwa ne ugamwẹ ohoghe bibi ẹre odẹ?
7. Ye gha ruẹ vbekpa Osa ọghe ẹmwata
Ọ khẹke ne u gha ya aro dan ghee Osanobua rhunmwuda emwi ne ugamwẹ ohoghe ru ra? Gia kha wẹẹ ọmọ okpia ọkpa ma rhie ude ne erhae bu ẹre. Ọ na kpa hin owa rre, ya gha yin uyinmwẹ nọ ma khẹke. Uyinmwẹ nọ yin i ya ẹko rhiẹnrhiẹn erhae. Ọ gha gu ruẹ na kha wẹẹ, erhae ẹre ọ si ẹre, ne ovbi ẹre na yin uyinmwẹ dan ra?
-
Ọ vbe khẹke ne ọmwa rhunmwuda uyinmwẹ ọghe emwa ni rre ugamwẹ ohoghe kha wẹẹ, irẹn i ghi ruẹ vbekpa Osanobua ra?
EMWA ESO KEGHI KHA WẸẸ: “Ẹmwẹ ugamwẹ Osanobua ma mu mwẹ, rhunmwuda, emwa ni wẹẹ iran ga Osanobua, ẹre ọ si ọlọghọmwa nibun, ne ima ye vbe ẹdẹnẹrẹ.”
-
Erriọ vbe ye vbe ekhọe uwẹ ra?
-
Vbọzẹ nọ ma na khẹke ne u gha ya aro dan ghee Jehova, rhunmwuda emwi ne ugamwẹ ohoghe ru?
OLIKA ẸMWẸ
Uyinmwẹ atosi ne ugamwẹ ohoghe yin kevbe imamwaemwi ọghe iran keghi rhie ozan gie Osanobua. Osanobua gha wabọ ugamwẹ ohoghe rua.
Ogbewerriẹ
-
De aro ne uwẹ ya ghee ugamwẹ ohoghe, rhunmwuda emwi ne iran maa emwa re kevbe odẹ ne iran ya yin?
-
De aro ne Jehova ya ghee ugamwẹ ohoghe?
-
De emwi ne Osanobua khian ru ugamwẹ ohoghe re?
RUẸ SAYỌ
Ghee emwi eva ne ugamwẹ nibun ru nọ sọnnọ Osanobua.
“Ọkpa Ẹre Ugamwẹ Hia Khin Ra? Osanobua Miẹn Ehia Yi Ra?” (Ọ rre intanẹt)
Vbọzẹ ne Jehova na hoo ne ima gha koko ga irẹn, zẹvbe emwa ni rre ugamwẹ ọkpa?
“Esa Zẹdẹ Rrọọ Ne Ọmwa Gha Mwẹ Ugamwẹ Nọ Ye Ra?” (Ọ rre intanẹt)
Emwi eso nọ ghaa sunu vbe esọsi kegha kpokpo ohẹn ọkpa vbe orhiọn. Sokpan, ọ ma gi ọni da re obọ yi, nẹ ghẹ rẹn ẹmwata vbekpa Osanobua.
“Evbọzẹe Ne Ohẹn Ọkpa Na Kpa Hin Esọsi Ọghẹe Rre” (Awake!, February 2015)
Ke otọ gha dee, ohoghe ne ugamwẹ nibun he ta keghi ya emwa roro ẹre wẹẹ, Osanobua mwẹ ekhọe atosi kevbe wẹẹ, ẹi zẹ ye ima re. Ghee eha vbe ohoghe na kevbe ẹmwata ni rrọọ.
“Ohoghe Nọ Ya Emwa Lẹẹ Ne Osanobua” (The Watchtower, November 1, 2013)
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
