IRUẸMWI 21
De Vbene A Ya Kporhu Iyẹn Nọ Maan Hẹ?
E Jehova gha rherhe ya Arriọba ọghẹe sọfurre ye ọlọghọmwa hia ne ima ye. Ọna keghi re iyẹn nọ maan nọ khẹke ne emwa hia họn. Ọna ẹre ọ zẹe ne Jesu na wẹẹ ne erhuanegbe ẹre kporhu iyẹn nọ maan na, ma emwa hia! (Matiu 28:19, 20, NW) De vbene Avbe Osẹe Jehova ya ru ọna hẹ?
1. De vbene Matiu 24:14 ya mwẹ amusẹ hẹ vbe ẹdẹnẹrẹ?
Jesu tae yotọ wẹẹ: “A gha kporhu iyẹn nọ maan ọghe Arriọba na la otọ agbọn hia.” (Matiu 24:14) Ọ keghi sẹ ima ne Avbe Osẹe Jehova ọyẹnmwẹ, ne ima na mwẹ obọ vbe iwinna ne kpataki na. Urhuẹvbo ni gberra 1,000 ẹre ima ya kporhu iyẹn nọ maan na! Iwinna na, i re iwinna nekherhe. Te ọ khẹke na loo ẹrhiọn yọ, nọ mieke na gha khian hẹnẹhẹnẹ. Ẹtin e Jehova, ẹre a ya mu iwinna na khian.
2. De ẹrhiọn ne ima loo ye iwinna ikporhu iyẹn nọ maan?
Ehe hia ẹre ima na kporhu. Ma keghi kporhu vbe “dọmwadẹ owa” vbene Ivbiotu e Kristi ni ghaa rrọọ vbe ẹghẹ avbe ukọ ọghe Jesu vbe gha ru ẹre. (Iwinna 5:42) Odẹ ne ima ya kporhu na, ẹre ọ zẹe ighẹ ima sẹtin kporhu ma ẹbo emwa nibun vbe ukpukpo. Rhunmwuda nai na miẹn emwa vbe owa vbe ẹghẹ hia, ma vbe kporhu vbe adesẹ orere. Ma keghi gu emwa guan vbekpa e Jehova kevbe emwamwa ọghẹe, vbe ẹghẹ ke ẹghẹ ne ẹkpotọ ya kie.
3. De emwa na waa re iwinna ikporhu iyẹn nọ maan?
Ivbiotu e Kristi ọghe ẹmwata hia, ẹre a waa re iwinna ikporhu iyẹn nọ maan. Ma i zẹdẹ ya iwinna na rhẹghẹrẹ. Ma keghi kporhu vbene ẹtin ima sẹ, rhunmwuda ma rẹnrẹn wẹẹ, iwinna na gha sẹtin miẹn emwa fan. (Tie 1 Timoti 4:16.) Ai ha ima osa ye iwinna na, rhunmwuda e Baibol khare wẹẹ: ‘Te a rhie ne uwa ọghe ọhẹ, wa ghi vbe gha rhie ne emwa ọvbehe ọghe ọhẹ.’ (Matiu 10:7, 8) Ẹi re emwa hia ẹre ọ rhie ehọ ne ima ta yi. Sokpan ma i gi ẹtin fo ima, rhunmwuda, ikporhu iyẹn nọ maan keghi re odẹ ọkpa ne ima ya rhie ugamwẹ ne Jehova, ọ vbe yae sọyẹnmwẹ.
GUALỌ OTỌ RE SAYỌ
Gia ziro yan rẹn sayọ, odẹ ne Avbe Osẹe Jehova ya loo ẹrhiọn ye iwinna ikporhu iyẹn nọ maan ne iran ru vbe uhunmwu otagbọn hia, kevbe odẹ ne Jehova ya ru iyobọ ne iran.
Ikporhu na kpee vbe otagbọn hia: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Ma keghi hia ne ima kporhu ma emwa hia
Avbe Osẹe Jehova keghi hia vbe odẹ ke odẹ ne iran kporhu ma emwa hia. Kpee VIDIO na, iyeke ọni, uwa ghi ziro yan inọta nọ lelẹe.
-
Vbọzẹ ne u gha na sẹtin kha wẹẹ, Avbe Osẹe Jehova wa hia vbe odẹ ne iran ya rhiegba ye iwinna ikporhu?
Tie Matiu 22:39 kevbe Rom 10:13-15, NW, iyeke ọni, uwa ghi ziro yan avbe inọta na:
-
De vbene odẹ ne ima ya kporhu ya rhie ẹre ma wẹẹ, ma hoẹmwẹ ogieva ima?
-
De aro ne Jehova ya ghee emwa ni kporhu iyẹn nọ maan?—Ghee uviẹn 15.
5. Osanobua ẹre ima gu winna
Okha nibun rhie ẹre ma wẹẹ, e Jehova ẹre ọ dia iwinna ima. Vbe igiemwi, vbe ọtẹn nokpia ọkpa na tie ẹre Paul nọ rre New Zealand ghi rre ikporhu vbe avan ọkpa, ọ na kporhu sẹ owa okhuo ọkpa. Vbe owiẹ vbe ẹdẹrriọ, okhuo na keghi na erhunmwu gie Osanobua, ọ na sunu ye eni ẹnrẹn nọ re Jehova, ọ na wẹẹ nọ gie ọmwa gie irẹn. Vbe ughaẹdẹ eha ghi gberra nẹ, ẹre Paul na kporhu sẹ owa ẹre.
Tie 1 Kọrinti 3:9, iyeke ọni, uwa ghi ziro yan inọta na:
-
De vbene okha ọghe ọtẹn na nọ rre New Zealand ya rhie ẹre ma wẹẹ, e Jehova ẹre ọ dia iwinna ikporhu iyẹn nọ maan?
Tie Iwinna 1:8, iyeke ọni, uwa ghi ziro yan inọta na:
-
Ne ima sẹtin musọe vbe iwinna ikporhu, vbọzẹ ne ima na gualọ iyobọ e Jehova?
U ka rẹn ra?
Iko ne ima do vbe uwu uzọla, ẹre a na maa ima re, vbene a ya kporhu hẹ. Deghẹ u ka yo iko na kha na nẹ, vbua ghee ẹre hẹ ighẹ odẹ na ya maa emwa emwi vba?
6. Ma keghi kporhu rhunmwuda Osanobua ẹre ọ gie ima
Vbe ẹghẹ ọghe avbe ukọ ọghe Jesu, avbe eghian te hia ne iran dobọ iwinna ikporhu ọghe erhuanegbe Jesu yi. Sokpan erhuanegbe Jesu keghi ya uhi arriọba sinmwi oseghe ne ikporhu “iyẹn nọ maan.” (Filipai 1:7) Erriọ Avbe Osẹe Jehova vbe ru ẹre vbe ẹdẹnẹrẹ. a
Tie Iwinna 5:27-42, iyeke ọni, uwa ghi ziro yan inọta na:
-
Vbọzẹ ne ima i khian na dobọ iwinna ikporhu iyẹn nọ maan yi?—Ghee uviẹn 29, 38, kevbe 39.
ỌMWA SẸTIN NỌ WẸẸ: “Vbọzẹ ne Avbe Osẹe Jehova na kporhu ke owa ya sẹ owa?”
-
De ewanniẹn ne u gha rhie ne ọmwa vberriọ?
OLIKA ẸMWẸ
Jesu tama erhuanegbe ẹre, ne iran kporhu iyẹn nọ maan vbe otagbọn hia. E Jehova wa ru iyobọ ne emwa rẹn ya ru iwinna na.
Ogbewerriẹ
-
De vbene a ya kporhu iyẹn nọ maan hẹ vbe otagbọn hia?
-
De vbene iwinna ikporhu iyẹn nọ maan ọghomwa ya rhie ẹre ma hẹ wẹẹ, ima hoẹmwẹ ogieva ima?
-
Uwẹ yayi wẹẹ, iwinna ikporhu iyẹn nọ maan gha sẹtin ya ọmwa gha sọyẹnmwẹ ra? Vbua gu kha vberriọ?
RUẸ SAYỌ
Ghee vbene Avbe Osẹe Jehova ya kporhu hẹ vbe okpẹvbo.
Emwamwa Ikporhu Ne Kpataki Na Kpee Re Vbe Eke Ne Ẹvbo Bi La Vbe Paris (5:11)
De vbene Avbe Osẹe Jehova he ya ru iyobọ ne emwa ni lẹẹ hin otọ ẹvbo iran rre hẹ?
Ma Keghi Ru Iyobọ Ne Emwa Ni Lẹẹ Hin Otọ Ẹvbo Iran Rre Ya Do Rẹn Osanobua (5:59)
Ghee vbene ọ ya ọmwa sẹ ọyẹnmwẹ hẹ, deghẹ a na rhie egbe ye ugamwẹ ẹghẹ hia.
Ghee odẹ eso ne ima he ya khọnmiotọ vbe owa ẹzọ, nọ zẹe ighẹ iwinna ikporhu iyẹn nọ maan mwẹ alaghodaro.
“Emwa Ni Kporhu Iyẹn Nọ Maan Mu Ẹzọ Iran Gha Rrie Ekọtu” (God’s Kingdom Rules!, uhunmwuta 13)
a Osanobua ẹre ọ rhie asẹ ne ima ya gha kporhu. Nọnaghiyerriọ, ma i gualọ asẹ rhọkpa vbe obọ arriọba emwa nagbọn.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
