IRUẸMWI 24

Emwi Ne Baibol Tae Vbekpa Avbe Odibosa

KPẸRE

E Jehova hoo ne ima rẹn vbekpa ẹgbẹe irẹn nọ rre ẹrinmwi. Ẹgbẹe nii ẹre avbe odibosa ye, “ivbi Osanobua” ẹre iran khin. (Job 38:7, NW) De emwi ne Baibol tae vbekpa avbe odibosa? De vbene emwi ne iran ru ya kaẹn ima hẹ? Avbe odibo hia ẹre ọ ye re ọkpa vbe ẹgbẹe Osanobua ra?

1. De aro emwa ne avbe odibosa khin?

Avbe odibosa ẹre Jehova ka yi, ọ ke yi agbọn na. Vbe na ghee Jehova, emwa orhiọn nai bẹghe, ẹre iran khin; ẹrinmwi ẹre iran ye. (Hibru 1:14) Iran wa bun, dọmwadẹ iran vbe lughaẹn ne egbe. (Arhie Maan 5:11, NW) Iran ‘mu uhi e Nọyaẹnmwa sẹ, iran vbe danmwehọ re.’ (Psalm 103:20) Vbe ẹghẹ nẹdẹ, e Jehova ghaa gie iran uhunmwu gie emwa, ọ ghaa gie iran, ne iran ya ru iyobọ ne emwa rẹn, ne iran vbe gha gbogba ga emwa rẹn. Vbe ẹdẹnẹrẹ, avbe odibosa vbe dia Ivbiotu e Kristi bu emwa ni hoo ne iran rẹn Osanobua.

2. Gha re Setan kevbe avbe ugbogiorinmwi ọghẹe?

Odibosa eso keghi sọtẹ daa e Jehova. Odibosa nọ ka sọtẹ, ẹre a tie ẹre Esu kevbe “Setan, nọ mu otọ agbọn hia rẹrẹ.” (Arhie Maan 12:9) Setan kegha hoo nọ gha kha yan emwa ọvbehe, ọni ẹre ọ si ẹre nọ na ya Adam vbe Ivi sọtẹ. Ọ ghi sẹ ẹghẹ, ọ na vbe silo odibosa eso ba egbe. Avbe odibo ni sọtẹ nii, ẹre a tie ẹre ugbogiorinmwi. E Jehova keghi khulo iran hin ẹrinmwi rre gha die otagbọn na, ọ gha vbe fuẹn iran rua.—Tie Arhie Maan 12:9, 12.

3. De vbene Setan kevbe avbe ugbogiorinmwi ya mu emwa rẹrẹ hẹ?

Orhiọn dan na gu mu obọ, ọre odẹ ọkpa ne Setan kevbe avbe ugbogiorinmwi ya mu emwa rẹrẹ. Iran keghi ru ẹre ne emwa gha gu orhiọn dan guan. Vbe igiemwi, emwa eso yo ọghe emwa ni tie orhọnmwẹ, emwa ni miẹn aro kevbe ọghe ọbo edunna. Emwa eso gu orhiọn dan mu obọ vbe odẹ ne iran ya gbaroghe egbe, vbe iran ghaa khuọnmwi. Esu kevbe avbe ugbogiorinmwi vbe ya emwa roro ẹre wẹẹ, a gha sẹtin gu emwa ni wulo nẹ guan. Sokpan e Jehova wẹẹ ne ima “ghẹ yo ọghe iran ni gu emwa ni wulo nẹ guan kevbe iran ni miẹn aro.” (Lẹvitikọs 19:31, NW) Te ọ rhie adia na ne ima, ne obọ Esu kevbe avbe ugbogiorinmwi ghẹ vba ima. Eghian Osanobua ẹre iran khin, iran vbe hoo ne iran kuan ima.

GUALỌ OTỌ RE SAYỌ

Gia ziro yan emwi esi ne avbe odibosa ru, ẹbe nọ si vbe a ghaa gu orhiọn dan mu obọ, kevbe odẹ ne ima gha ya sẹtin gbogba ga egbe ima vbe obọ Esu kevbe avbe ugbogiorinmwi ọghẹe.

4. Avbe odibosa keghi ru iyobọ ne emwa ya ruẹ vbekpa e Jehova

Avbe odibosa i wa tobọ iran kporhu. Sokpan iran sẹtin dia emwa Osanobua bu emwa ni hoo ne iran ruẹ vbekpa e Jehova. Tie Arhie Maan 14:6, 7, iyeke ọni, uwa ghi ziro yan avbe inọta na:

Vbọzẹ ne ima na gualọ iyobọ ọghe avbe odibosa vbe iwinna ikporhu?
Vbọ ye ruẹ hẹ vbe ekhọe, ne u na rẹn wẹẹ avbe odibosa gha sẹtin dia ruẹ bu emwa ni hoo ne iran ruẹ e Baibol? Vbua gu kha vberriọ?

5. Gban egbe ne orhiọn dan

Eghian Osanobua ẹre Setan kevbe avbe ugbogiorinmwi khin. Eghian ima ẹre iran vbe khin. Tie Luk 9:38-42, iyeke ọni, uwa ghi ziro yan inọta na:

De obọ ne avbe orhiọn dan ya mu emwa?

Ma i khian kie ẹkpotọ yọ ne orhiọn dan do miẹn agba dia vbe arrọọ ọghe ima. Tie Diuteronomi 18:10-12, iyeke ọni, uwa ghi ziro yan avbe inọta na:

De odẹ eso ne avbe orhiọn dan ya mu emwa rẹrẹ? De odẹ ne iran hoo ne iran ya gha gu emwa guan? De odẹ eso ne emwa mobọ ya gu orhiọn dan mu obọ vbe ehe ne u ye?
Uwẹ ghee ẹre wẹẹ adia nọ maan nọ, ne Jehova na wẹẹ ne ima ghẹ gha gu orhiọn dan mu obọ ra? Vbua gu kha vberriọ?

Kpee VIDIO na, iyeke ọni, uwa ghi ziro yan inọta ni lelẹe.

E VIDIO: “Mu Aro Igbinna Da Esu” (5:02)

Uwẹ yayi wẹẹ akpalode ne ovbi e Palesa gba ye obọ gha sẹtin zẹ ẹbe ra? Vbua gu kha vberriọ?
De emwi nọ khẹke ne Palesa ru, ne obọ orhiọn dan ghẹ vba re?

Ke otọ gha dee, ẹre Ivbiotu e Kristi ọghe ẹmwata ke mu aro igbinna daa avbe orhiọn dan. Tie Iwinna 19:19 kevbe 1 Kọrinti 10:21, iyeke ọni, uwa ghi ziro yan inọta na:

Vbọzẹ nọ na khẹke ne u wabọ re rua, emwi ke emwi ne u mwẹ nọ dekaẹn orhiọn dan?

6. Khọnmiotọ yan Esu kevbe avbe ugbogiorinmwi ọghẹe

Setan ẹre ọ kha yan avbe ugbogiorinmwi. Sokpan Jesu na vbe tie ẹre Maikẹl, ọre ọkaolotu ọghe avbe odibosa ni mwẹ ẹkoata. De vbene Maikẹl mwẹ ẹtin sẹ hẹ? Tie Arhie Maan 12:7-9, iyeke ọni, uwa ghi ziro yan avbe inọta na:

De nọ mwẹ ẹtin sẹ? E Maikẹl kevbe avbe odibo ọghẹe nọ ra, ra Setan kevbe avbe ugbogiorinmwi ọghẹe?
Uwẹ ghee ẹre wẹẹ ọ khẹke ne erhuanegbe Jesu gha mu ohan e Setan kevbe avbe ugbogiorinmwi ọghẹe ra?

U gha sẹtin khọnmiotọ yan e Setan kevbe avbe ugbogiorinmwi ọghẹe. Tie Jems 4:7, iyeke ọni, uwa ghi ziro yan inọta na:

De vbene u gha ya sẹtin gbogba ga egbuẹ hẹ vbe obọ e Setan kevbe avbe ugbogiorinmwi ọghẹe?

EMWA ESO KEGHI KHA WẸẸ: “Ọ ma de emwi nọ rhia deghẹ a na gha gbe vidio gem nọ dekaẹn orhiọn dan, ra deghẹ a na gha ghee ughe vberriọ. Te a wa yae sọyẹnmwẹ egbe kẹkan.”

Vbọzẹ ne iziro na, gha na sẹtin zẹ ẹbe?

OLIKA ẸMWẸ

Avbe odibosa ni mwẹ ẹkoata keghi ru iyobọ ne ima. Eghian e Jehova ẹre Setan kevbe avbe ugbogiorinmwi ọghẹe khin. Iran ẹre ọ ya orhiọn dan na gu mu obọ mu emwa rẹrẹ.