IRUẸMWI 25

Vbọzẹ Ne Osanobua Na Yi Ima?

KPẸRE

E Baibol wẹẹ “agbọn orhikhan nai na tọ, ẹre ima hia ye.” (Job 14:1) Erriọ ẹre Osanobua gele hoo nọ gha ye ra? Deghẹ ẹi re erriọ, de vbene Osanobua ghi hoo nọ gha ye hẹ? Emwamwa ne Osanobua mwẹ ne ima gha gele mwẹ amusẹ ra? Gia ziro yan ewanniẹn nọ fu ọmwa ẹko rre, ne Baibol rhie ye avbe inọta na.

1. De vbene Jehova hoo ne arrọọ ọghe ima gha ye hẹ?

E Jehova hoo ne ima gha sọyẹnmwẹ arrọọ nọ ghi maan sẹ. Vbe ọ yi Adam vbe Ivi, ọ na viọ iran ye ogba ne mosee, nọ re ogba ọghe Idẹni. ‘Ọ keghi fiangbe iran vbenian wẹẹ: “Wa ghi biẹlẹ emọ nibun; uniẹn uwa ghi gba ehe hia vbe agbọn, iran ghi gha khaevbisẹ yan rẹn.”’ (Gẹnẹsis 1:28) E Jehova kegha hoo ne iran biẹlẹ emọ, ne iran ya otagbọn na hia khian e paradais, iran ghi vbe gha gbaroghe avbe aranmwẹ. Emwamwa ọghe Osanobua, ọre ne emwa hia gha rrọọ vbe etẹbitẹ, vbene iran i na khuọnmwi.

Agharhemiẹn wẹẹ emwi hia i wa ye vbene Osanobua te mwamwaẹn, a emwamwa ọghẹe ma he ye fi werriẹ. (Aizaia 46:10, 11) Ọ ye hoo ne emwa ni họn ẹmwẹ ne irẹn gha sọyẹnmwẹ arrọọ vbe etẹbitẹ.—Tie Arhie Maan 21:3, 4.

2. Vbọ khian ya ima gha sọyẹnmwẹ arrọọ vbe ẹghẹ na nia?

Ma hia hoo ne ima rẹn Osanobua, ne ima vbe gha gae; erriọ ẹre ọ ya yi ima. (Tie Matiu 5:3-6.) Ọ hoo ne ima gha re ọsiọre, ne ima gha “họn ẹmwẹ nẹẹn,” ne ima “hoẹmwẹ ọnrẹn,” ne ima vbe ya ekhọe hia gha gae. (Diuteronomi 10:12; Psalm 25:14) Ma ghaa ru vberriọ, ma ghi gele gha sọyẹnmwẹ, ọ gha khọnrẹn ne ima gha rre uwu ọlọghọmwa. Ma ghaa ga e Jehova, ẹkun ghi sẹ ima otọ, rhunmwuda ne ima na ru emwi vbene ọ gualọe yi.

GUALỌ OTỌ RE SAYỌ

Gia ziro yan vbene Jehova ya rhie ẹre ma hẹ wẹẹ, irẹn kakabọ hoẹmwẹ ima vbe ọ yi agbọn na, kevbe emwi ne Ẹmwẹ ọnrẹn tae vbekpa evbọzẹe nọ na yi ima.

3. Te Jehova yi ima ne ima gha sọyẹnmwẹ arrọọ

Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: Vbọzẹe Ne Osanobua Na Yi Agbọn Na?—Abọ Ne Kuẹi Vbọ (1:41)

Vbọzẹ ne Osanobua na yi agbọn ne mose mose na?

Tie Asan-Ibo 3:11, NW, iyeke ọni, uwa ghi ziro yan inọta na:

De emwi ne ọna maa ruẹ re vbekpa e Jehova?

4. Emwamwa ọghe Jehova ma he fi werriẹ

Tie Psalm 37:11, 29, NW kevbe Aizaia 55:11, iyeke ọni, uwa ghi ziro yan inọta na:

Vbe ima ya rẹn hẹ wẹẹ, emwamwa ne Jehova mwẹ ne ima ma he fi werriẹ?

Ọ gha khọnrẹn ne owa gha dele nẹ, a gha ye sẹtin dọlọe yi, ọ ghi do yevbe ọghe ọgbọn. Erriọ vbe ye, agharhemiẹn wẹẹ emwa nagbọn mu agbọn na rhia, Osanobua gha yae khian ọghe ọgbọn ne emwa ni hoẹmwẹ irẹn

5. Ma ghaa ga e Jehova, arrọọ ọghe ima ghi gha mwẹ evbọ demu

Ne ima na rẹn evbọzẹe ne Osanobua na yi emwa nagbọn keghi ya ima sọyẹnmwẹ. Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: I Na Do Rẹn Evbọzẹe Ne Osanobua Na Yi Ima (5:03)

De afiangbe ne Terumi miẹn, vbe ọ ghi do rẹn evbọzẹe ne Osanobua na yi emwa nagbọn?

Tie Asan-Ibo 12:13, iyeke ọni, uwa ghi ziro yan inọta na:

Vbọ khẹke ne ima ru, ne ima ya kpọnmwẹ e Jehova ye emwi hia nọ he ru ne ima?

ỌMWA SẸTIN NỌ WẸẸ: “Vbọzẹ ne Osanobua na yi emwa nagbọn?”

De ewanniẹn ne u gha rhie ne ọmwa vberriọ?

OLIKA ẸMWẸ

E Jehova hoo ne ima gha sọyẹnmwẹ arrọọ vbe etẹbitẹ vbe agbọn na. Ma ghaa ya ekhọe hia gae, arrọọ ọghe ima ghi gha mwẹ evbọ demu, uhiẹn vbe ẹghẹ ne ima ye na.