IRUẸMWI 38
Gha Gbọyẹmwẹ Ye Ẹse Ọhẹ Ọghe Arrọọ
Ẹi re avbiẹ emwi ẹre a sọyẹnmwẹ ọnrẹn vbe a ghaa rre agbọn. Uhiẹn vbe ima ghaa rre uwu ọlọghọmwa, ọ ye mwẹ emwi eso ne ima sọyẹnmwẹ ọnrẹn. Vbe ima khian ya rhie ẹre ma hẹ wẹẹ, ma gbọyẹmwẹ ye ẹse ọhẹ ọghe arrọọ? Vbọ mobọ zẹe nọ na khẹke ne ima gha gbọyẹmwẹ yọ?
1. Vbọzẹ nọ na khẹke ne ima gha gbọyẹmwẹ ye arrọọ?
Ọ khẹke ne ima gha gbọyẹmwẹ ye arrọọ rhunmwuda, e Jehova ne Erha mwa nọ mwẹ ahoẹmwọmwa, ẹre ọ yae ru ima ẹse. “Obọ [re] ẹre arrọọ ke rre”—irẹn ẹre ọ yi emwi hia ni mwẹ arrọọ. (Psalm 36:9, NW) “Irẹn ẹre ọ rhie arrọọ, uhiọnrọnmwẹ ke emwi ọvbehe hia ne emwa hia.” (Iwinna 17:25, 28) E Jehova ẹre ọ kpemehe emwi hia nọ zẹe ighẹ ima rre agbọn. Yevbesọni, emwi ne irẹn kpemehe ẹre na, keghi ya ima sọyẹnmwẹ arrọọ.—Tie Iwinna 14:17.
2. Vbe ima khian ya rhie ẹre ma hẹ wẹẹ ima gbọyẹmwẹ ye arrọọ ne Jehova ya ru ima ẹse?
Ke ẹghẹ na ya suẹn gha hanmwa ruẹ gha dee, ẹre Jehova ke gbaroghe ruẹ. Orhiọn nọhuanrẹn keghi dia e Devid ne ọguọmwadia Osanobua ya kha wẹẹ: “[Osanobua] bẹghe mwẹ nẹ, a ke biẹ mwẹ.” (Psalm 139:16) Arrọọ ruẹ wa hin usi vbe odaro e Jehova. (Tie Matiu 10:29-31.) Ọ keghi wa kakabọ da e Jehova, vbe ọmwa gha wa rhan aro gbe ọmwa rua, ra vbe ọmwa gha gbe egbe ẹre rua. a (Ẹksodọs 20:13) Ọ keghi vbe da e Jehova vbe ima gha gheghe mu arrọọ ọghe ima ye ikpadede, ra deghẹ ima ma ru emwi nọ khẹke, ne ima ya gbogba ga arrọọ ọghe emwa ọvbehe. Ma ghaa gbaroghe egbe ima, ma na vbe gha ya aro nọ ghaan ghee arrọọ ọghe emwa ọvbehe, te ima rhie ẹre ma wẹẹ, ma gbọyẹmwẹ ye ẹse ọhẹ nọ hin usi ọghe arrọọ.
GUALỌ OTỌ RE SAYỌ
Gia ziro yan odẹ eso ne u gha ya rhie ẹre ma wẹẹ, u gbọyẹmwẹ ye ẹse ọhẹ ọghe arrọọ.
3. Gha gbaroghe egbuẹ
Ivbiotu e Kristi ni ya egbe iran fiohan ne Jehova, keghi ya ẹdagbọn iran hia gae. Ọ yevbe na miẹn wẹẹ, egbe iran ẹre iran ya zọ ese gie Osanobua. Tie Rom 12:1, 2, iyeke ọni, uwa ghi ziro yan avbe inọta na:
-
Vbọ khẹke nọ gua ruẹ kpa ya gha gbaroghe egbuẹ?
-
De odẹ eso ne u gha ya sẹtin ru ọna?
4. Gha begbe ne u ghẹ ya ru emwi nọ gha si ikuanegbe ra uwu
E Baibol wẹẹ ne ima ghẹ gha mwẹ obọ vbe emwi ke emwi nọ gha sẹtin si ikuanegbe. Kpee VIDIO na, ne u ya rẹn emwi ne u gha ru, ne u ghẹ rhie ikuanegbe ne egbuẹ kevbe emwa ọvbehe.
Tie Itan 22:3, iyeke ọni, wa ghi ziro yan odẹ ne u khian ya gha begbe ne uwẹ kevbe emwa ọvbehe ghẹ ya miẹn ikuanegbe . . .
-
vbe owa.
-
vbe isiwinna.
-
vbe u ghaa ku iku isasegbe.
-
vbe u ghaa fi imọto, e mẹsini ra okọ, ra deghẹ ọmwa ọvbehe ẹre ọ fi ẹre khian.
5. Ghẹ rhie ikuanegbe ne ọmọ na hanmwa
Ẹmwẹ ekharha, ẹre Devid loo ro ya gi ima rẹn wẹẹ, aro nọ ghaan ẹre Jehova ya ghee ọmọ nọ ye rre ẹko iyẹe. Tie Psalm 139:13-17, iyeke ọni, uwa ghi ziro yan inọta na:
-
Vbe aro e Jehova, ẹghẹ na ya suẹn gha hanmwa ọmọ, ẹre arrọọ ọghe ọmọ nii ya suẹn ra, ra vbe a gha biẹ ọre nẹ?
Uhi ne Jehova yi ne Ivbi Izrẹl nẹdẹ keghi gbogba ga ikhuo ni hanmwa kevbe emọ ni rre iran ẹko. Tie Ẹksodọs 21:22, 23, iyeke ọni, uwa ghi ziro yan avbe inọta na:
-
Ọmwa gha gbe ọmọ nọ rre ẹko rua, vbene ọ ma na ba ru ẹre, de aro ne Jehova ya ghee ẹre?
-
De aro ne uwẹ yayi wẹẹ, ọ ya ghee ọmwa nọ wa rhan aro gbe ọmọ nọ rre ẹko rua? b
-
Vbọ ye ruẹ hẹ vbe ekhọe, ne Jehova na ya aro nọ hin usi vbenian ghee ọmọ nọ ye rre ẹko?
Emwi eso sẹtin de rre, nọ gha ya okhuo gha roro ẹre wẹẹ, irẹn wa kpannọ ẹko ẹre ọ maan sẹ, agharhemiẹn wẹẹ ọ te ya aro nọ ghaan ghee arrọọ. Tie Aizaia 41:10, iyeke ọni, uwa ghi ziro yan avbe inọta na:
-
Deghẹ okhuo na gha werriẹ aro daa ọlọghọmwa nọ gha sẹtin yae kpannọ ẹko, ra deghẹ emwa na gha kpikpi ẹre nọ kpannọ ẹko, de ọmwa nọ khẹke nọ tu tie? Vbua gu kha vberriọ?
EMWA ESO KEGHI KHA WẸẸ: “Okhuo mwẹ asẹ nọ gha ya kpannọ ẹko, rhunmwuda, irẹn ẹre nene ọmọ rre ọre ẹko.”
-
Vbọ ya ruẹ yayi wẹẹ, aro nọ ghaan ẹre Jehova ya ghee arrọọ ọghe okhuo nọ hanmwa kevbe ọmọ nọ rre ọre ẹko?
OLIKA ẸMWẸ
E Baibol wẹẹ ne ima gha ya aro nọ ghaan ghee arrọọ ọghe ima kevbe ọghe emwa ọvbehe, ma ghi vbe gha gbogba ga ẹre rhunmwuda, ẹse nọ ke obọ e Jehova rre nọ.
Ogbewerriẹ
-
Vbọzẹ ne arrọọ ọghe emwa nagbọn na hin usi vbe odaro e Jehova?
-
Vbọ ye Jehova hẹ vbe ọmwa gha wa rhan aro gbe ọmwa rua, ra vbe ọmwa gha gbe egbe ẹre rua?
-
Vbọzẹ ne uwẹ na gbọyẹmwẹ ye ẹse ọhẹ ọghe arrọọ?
RUẸ SAYỌ
De vbene ima khian ya kpọnmwẹ e Jehova hẹ ye arrọọ nọ ya ru ima ẹse?
Gualọ ewanniẹn ọghe inọta na, Osanobua gha sẹtin yabọ okhuo nọ ka kpannọ ẹko nẹ ra?
“De Emwi Ne Baibol Khare Vbekpa Ẹko Na Kpannọ?” (Ọ rre intanẹt)
Ghee vbene aro ne Osanobua ya ghee arrọọ gha ya ru iyobọ nuẹn ya rẹn aro iku isasegbe ne u gha rhie egbe yi.
“Ọ Khẹke Ne U Gha Mwẹ Obọ Vbe Iku Isasegbe Nọ Rhie Ikuanegbe Ne Ọmwa Ra?” (Awake!, October 8, 2000)
Ghee vbene Baibol gha ya sẹtin ru iyobọ ne ọmwa nọ hoo nọ gbe egbe ẹre rua.
a E Jehova wa mwẹ ẹnina daa emwa ne iro han rẹn. (Psalm 34:18) Ọ rẹnrẹn wẹẹ, emwi eso sẹtin sunu nọ gha da emwa eso sẹrriọ wẹẹ, iran ghi gha hoo ne iran gbe egbe iran rua. Ọ wa mu egbe nọ ya ru iyobọ ne emwa vbenian. Ne u ya rẹn vbene ọ ya ru iyobọ ne emwa vbenian hẹ, tie uhunmwuta na, “I Hoo Ne I Wu—E Baibol Gha Sẹtin Ru Iyobọ Mẹ Vbe I Ghaa Hoo Ne I Gbe Egbe Mwẹ Rua Ra?” nọ rre abọ ọghe Ruẹ Sayọ vbe iruẹmwi na.
b Ọ ma khẹke ne emwa ni ka kpannọ ẹko nẹ, gi ekhọe iran gha fi iran uwẹnrhiẹn, ne iran do gha roro ẹre wẹẹ, e Jehova i ghi sẹtin yabọ iran. E Jehova gha sẹtin yabọ iran. Adeghẹ u hoo ne u rẹn sayọ, tie uhunmwuta na, “De Emwi Ne Baibol Khare Vbekpa Ẹko Na Kpannọ?” nọ rre abọ ọghe Ruẹ Sayọ vbe iruẹmwi na.
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
