IRUẸMWI 44

Ugie Hia Ẹre Ọ Ya Ẹko Rhiẹnrhiẹn Osanobua Ra?

KPẸRE

E Jehova hoo ne ima gha sọyẹnmwẹ arrọọ, ọ vbe hoo ne ima gha do ugie vbe ugbẹnso. Sokpan ugie hia ne emwa do, ẹre ọ ya ẹko rhiẹnrhiẹn Osanobua ra? Vbe ima khian ya rhie ẹre ma hẹ wẹẹ, ima hoẹmwẹ e Jehova vbe nọ dekaẹn ugie na do?

1. Vbọzẹ ne ugie nibun ne emwa do na sọnnọ e Jehova?

Ọ sẹtin kpa ruẹ odin vbe u gha rẹn wẹẹ, e Baibol ma kpasẹ ye ugie nibun kevbe wẹẹ, emwa igẹbọ ẹre ọ mu ugie nibun gbọọ. Avbe ugie vbenian sẹtin ginna ugamwẹ ohoghe, orhiọn dan na gu mu obọ kevbe iyayi ọghe orhiọn ọmwa nẹi wu vbe ọmwa gha wu. Ugie eso hẹnhẹn egbe yan idandan, emwa eso vbe do ugie ẹwerẹ. (Aizaia 65:11) Ọna ẹre ọ zẹe ne Jehova na ya obọ sekhae ne eguọmwadia re wẹẹ: “Wa wannọ egbe hin uwu iran rre. Wa ghẹ mwẹ obọ vbe emwi nọ ma huan.”—2 Kọrinti 6:17. a

2. Vbọ ye hẹ vbe ekhọe Jehova vbe emwa ghaa do ugie nọ rhie uyi nọ ma khẹke ne emwa nagbọn?

E Jehova gi ima rẹn ẹbe nọ si, vbe ima gha “mu ẹtin yan [emwa nagbọn kẹkan].” (Tie Jerimaia 17:5.) Ugie eso keghi rhie uyi ne emwa ni khaevbisẹ ra ivbiyokuo. Eso rhie uyi ne ama na ya rẹn otọ ẹvbo, vbe na ghee afiala, emwa eso vbe do ugie afanvbimu ọghe otọ ẹvbo ne iran ke rre. (1 Jọn 5:21) Ọ vbe mwẹ ugie eso ni rhie uyi ne otu azẹ ra otu ọvbehe. De vbene uwẹ roro ẹre wẹẹ ọ khian gha ye hẹ vbe ekhọe Jehova, vbe ima ghaa rhie uyi nọ ma khẹke ne ọmwa ra otu, katekate nọ gbodan ye emwamwa ọghẹe?

3. De uyinmwẹ eso ne emwa yin vbe iran ghaa do ugie, nọ ya ugie nii sọnnọ Osanobua?

E Baibol keghi gbodan ye “ayọn na da gbe egbe, ohọhọ, [kevbe] ẹbu idayọn.” (1 Pita 4:3) Ọ mwẹ ugie eso ne emwa do, ne iran na yin pirhipirhi, iran ghi vbe gha yin uyinmwẹ esakan. Ma ghaa hoo ne ima ye gha re ọsie Jehova, te ima gha lẹẹ ne uyinmwẹ ohọhọ vberriọ.

GUALỌ OTỌ RE SAYỌ

Gia ziro yan odẹ ne u gha ya sẹtin ru azẹ nọ gha ya ẹko rhiẹnrhiẹn e Jehova vbe nọ dekaẹn ugie na do.

4. Ghẹ gha deba emwa do ugie ni sọnnọ e Jehova

Tie Ẹfisọs 5:10, NW, iyeke ọni, uwa ghi ziro yan avbe inọta na:

De emwi nọ khẹke ne ima rẹn vbe ima ghaa ru azẹ nọ dekaẹn ugie na do?
De ugie ne emwa mobọ do vbe ẹdogbo ne u ye?
Uwẹ yayi wẹẹ avbe ugie nii ya ẹko rhiẹnrhiẹn e Jehova ra?

Vbe igiemwi, uwẹ he ka muẹn roro ẹdẹ, aro ne Osanobua ya ghee ugie ẹdẹ ubiẹmwẹ ra? Ako ọkpa i rre Baibol nọ khare wẹẹ ọguọmwadia Osanobua do ugie ẹdẹ ubiẹmwẹ. Orhunmwu eva ne Baibol wẹẹ ọ do ugie ẹdẹ ubiẹmwẹ kegha re emwa ni ma ga e Jehova. Tie Gẹnẹsis 40:20-22 kevbe Matiu 14:6-10. Iyeke ọni, uwa ghi ziro yan avbe inọta na:

De emwi ọhanabe nọ sunu vbe ugie ẹdẹ ubiẹmwẹ ọghe iran eva na?
Zẹvbe na miẹn ọnrẹn vbe okha eva na, de aro ne uwẹ yayi wẹẹ e Jehova ya ghee ugie ẹdẹ ubiẹmwẹ?

U sẹtin ye gha roro ẹre wẹẹ, ‘E Jehova zẹdẹ zẹyọ ra, deghẹ I na gha deba emwa do ugie ẹdẹ ubiẹmwẹ, ra ugie ọvbehe ne Baibol ma kpasẹ yi ra?’ Tie Ẹksodọs 32:1-8. Iyeke ọni, kpee VIDIO na, ne uwa ziro yan inọta ni lelẹe.

E VIDIO: Avbe Ugie Ni Sọnnọ Osanobua (5:07)

Vbọzẹ nọ na khẹke ne ima hia ne ima rẹn emwi nọ yẹẹ e Jehova?
Vbe ima khian ya sẹtin ru vberriọ hẹ?

Odẹ ne u gha ya rẹn ugie nọ sọnnọ Osanobua

Ọ ginna imamwaemwi nẹi rre Baibol ra? Ne u ya rẹn, gualọ otọ vbene ọ ya suẹn hẹ.
Ọ rhie uyi nọ ma khẹke ne emwa kevbe otu ra? Ọ rhie uyi ne ama na ya rẹn otọ ẹvbo, vbe na ghee afiala ra? E Jehova ẹre ima rhie uyi nọ sẹre na, ma vbe rẹn wẹẹ, irẹn ẹre ọ khian sẹtin sọfurre ye ọlọghọmwa ni rre agbọn na.
Ilele kevbe uyinmwẹ ne emwa yin vbe a ghaa do nene ugie, gua ilele ọghe Baibol ro ra? Ọ khẹke ne uyinmwẹ ima gha re nọhuanrẹn.

5. Ru iyobọ ne emwa ne iran gha ya aro nọ ghaan ghee emwi ne u yayi

Ọ keghi wa lọghọ ne ima sẹtin mudia gbain vbe emwa ghaa kpikpi ima, ne ima deba iran do ugie nẹi yẹẹ e Jehova. Ọ ghaa yerriọ, gi emwa rẹn obọ ne u mudia yi, sokpan, u ghi ya izinegbe kevbe ọghọ vbe ute rhan otọ re ma iran. Ne u ya rẹn vbene u gha ya ru ọna hẹ, kpee VIDIO na.

E VIDIO: Ya Ọghọ Vbe Ute Rhan Otọ Emwi Ne U Yayi (2:01)

Tie Matiu 7:12, iyeke ọni, uwa ghi ziro yan avbe inọta na:

Zẹvbe nọ rre ako na, ọ khẹke ne u tama emwa ruẹ vbe uwu ẹgbẹe nẹi ga e Jehova, ne iran ghẹ ghi do ugie ne iran do ra?
De emwi ne u gha sẹtin ru, ne u ya gi ẹgbẹe ruẹ rẹn wẹẹ, u ye hoẹmwẹ iran agharhemiẹn wẹẹ, u i deba iran vbe ugie ne iran do?

6. E Jehova hoo ne ima gha ghọghọ

E Jehova hoo ne ima gha deba ẹgbẹe ima kevbe avbe ọse ima sọyẹnmwẹ egbe. Tie Asan-Ibo 8:15, iyeke ọni, uwa ghi ziro yan inọta na:

De vbene ako na ya rhie ẹre ma hẹ wẹẹ, e Jehova hoo ne ima gha ghọghọ?

E Jehova hoo ne emwa rẹn gha sọyẹnmwẹ kugbe. Kpee VIDIO na, ne u ya rẹn vbene ọna ya rhie egbe ma hẹ vbe asikoko ọghe etẹn ni ke ẹvbo ughughan rre.

E VIDIO: Odẹ Na Ya Mu Ọghọ Ye Etẹn Egbe Vbe Asikoko Ọghe Uhunmwu Otagbọn (5:40)

Tie Galatia 6:10, iyeke ọni, uwa ghi ziro yan avbe inọta na:

Deghẹ ima ma deba emwa do ugie, ọni rhie ma wẹẹ ima i ghi sẹtin ‘ru ẹse’ ne emwa ra?
De nọ gha ya ruẹ sọyẹnmwẹ sẹ? Ẹse ne u ru vbe ẹghẹ na ya do ugie nọ ra, ra ẹse ne u ya ekhọe obọ ruẹ ru?
Avbe Osẹe Jehova nibun zẹdia ru emwamwa, ne ivbi iran ya sọyẹnmwẹ egbe, iran vbe dẹ emwi ne ivbi iran vbe ẹghẹ ne ivbi iran ma te ya aro yi. U ghaa mwẹ emọ, de emwi eso kpataki ne u gha sẹtin ru ne iran?

EMWA ESO KEGHI KHA WẸẸ: “Ai lele vbene ugie ya suẹn hẹ. Ọ keghi re ẹghẹ na ya deba ẹgbẹe kevbe avbe ọse sọyẹnmwẹ egbe.”

Vbua khian tama ọmwa vberriọ?

OLIKA ẸMWẸ

E Jehova hoo ne ima gha deba ẹgbẹe ima kevbe avbe ọse ima sọyẹnmwẹ egbe. Sokpan ọ ma hoo ne ima gha do ugie ni sọnnọ irẹn.

Ogbewerriẹ

De inọta eso ne ima gha nọ, nọ gha ya ima rẹn ugie nẹi yẹẹ e Jehova?
Vbe ima khian ya ru iyobọ ne ẹgbẹe ima kevbe avbe ọse ima hẹ, ne iran ya rẹn evbọzẹe ne ima i na deba iran do ugie eso?
Vbua ya rẹn hẹ wẹẹ, e Jehova hoo ne ima gha ghọghọ kevbe ne ima gha sọyẹnmwẹ egbe?

Ẹdẹ na ruẹ iruẹmwi na fo:

Emwi Ne U Gha Ru

Loo emwi ne u ruẹ re vbe iruẹmwi na, ya mu ukpa mu uwerhẹn ghee ẹre, deghẹ ọ khẹke ne u deba emwa gha do ugie ne iran mobọ do vbe ẹdogbo ne u ye.

Emwi Ọvbehe Ne U Gha Ru:

Emwi Ọvbehe Ne U Gha Ru