IRUẸMWI 49
De Vbene Ẹgbẹe Ruẹ Khian Ya Gha Mwẹ Oghọghọ Hẹ?—Abọ 1
Emwa ni da ru orọnmwẹ keghi hoo ne ọyẹnmwẹ nọ ghaa sẹ iran vbe ẹdẹ orọnmwẹ ghẹ fo vbe otọ. Ọ gha gele sẹtin gha yerriọ. Ivbiotu e Kristi ni kpẹẹ nẹ vbe orọnmwẹ, ni vbe hia ne iran gha lele adia ni rre Baibol rẹnrẹn wẹẹ, ọdọ vbe amwẹ gha gele sẹtin gha sọyẹnmwẹ.
1. De ibude ne Baibol rhie ne avbe ọdọ?
Ọdọ ẹre Jehova zẹ, nọ gha re uhunmwuta ẹgbẹe. (Tie Ẹfisọs 5:23, NW.) E Jehova hoo nọ gha ru azẹ nọ gha ya agbọn maan ẹgbẹe ọre. E Baibol tama avbe ọdọ wẹẹ: “Wa gha hoẹmwẹ amwẹ uwa.” (Ẹfisọs 5:25) Vbe a ya ọna kha? Okpia nọ hoẹmwẹ amwẹ ọnrẹn keghi ya obọ esi muẹn vbe owa kevbe orere. Ọ keghi gbogba ga ọvbokhan rẹn, ọ kpemehe emwi nọ gualọ nẹẹn vbe odẹ ọghe ikpakpa, ọ vbe ru emwi nọ yae ghọghọ. (1 Timoti 5:8) Sẹ ehia, ọ keghi ru iyobọ nẹẹn ya deziẹn vbe odẹ ọghe orhiọn. (Matiu 4:4) Vbe igiemwi, ọ ghi gha gu ọvbokhan rẹn na erhunmwu, ọ ghi vbe gu ẹre gha tie Baibol. Ọdọ nọ ya obọ esi mu ọvbokhan rẹn vbenian, keghi sikẹ e Jehova sayọ.—Tie 1 Pita 3:7.
2. De ibude ne Baibol rhie ne ikhuo ni rre owa ọdọ?
E Baibol wẹẹ ne okhuo “gha ya ọghọ nọ sẹ otọ ẹko ne ọdọ re.” (Ẹfisọs 5:33, NW) Vbe ọ khian ya ru ọna hẹ? Ọ ghi gha muẹn roro, avbe akpa esiesi ne arowa re mwẹ kevbe ẹrhiọn nọ loo ya gbaroghe irẹn vbe emọ. Ọ gha vbe sẹtin gha ya ọghọ ne ọdọ re, deghẹ ọ na gha ku obọ gbe ba azẹ ne ọdọ re ru, ọ ghi gha ya ọghọ vbe ute gu ẹre guan, ọ ghi vbe gha ta ẹmwẹ ọnrẹn nọ maan, ọ gha khọnrẹn wẹẹ, ọdọ re i ga e Jehova.
3. De vbene ọdọ vbe amwẹ gha ya sẹtin sikẹ egbe sayọ hẹ?
E Baibol ghi guan kaẹn ọdọ vbe amwẹ, ọ na wẹẹ: “Iran eva ghi do khian ọkpa.” (Matiu 19:5) Ọna rhie ma wẹẹ, te iran gha hia vbe odẹ ke odẹ, ne emwi rhọkpa ghẹ la uwu ẹkpo iran. Odẹ ne iran gha ya sẹtin ru ọna, ọre ne iran gha mwẹ ẹghẹ ne egbe, iran ghi vbe gha ya ahoẹmwọmwa fannọ otọ ẹko ma egbe. Vbọ gberra e Jehova, ọ ma khẹke ne iran hoẹmwẹ ọmwa ọvbehe ra emwi ọvbehe sẹ ogieva iran. Ọ vbe khẹke ne iran gha begbe, ne iran ghẹ do sikẹ ọmwa ọvbehe vbe odẹ nọ ma khẹke.
GUALỌ OTỌ RE SAYỌ
Gia ziro yan ilele eso ni rre Baibol nọ gha ya ọdọ vbe amwẹ sikẹ egbe sayọ.
4. Avbe ọdọ—wa hoẹmwẹ amwẹ uwa, wa ghi vbe gha ya obọ esi mu iran
E Baibol wẹẹ “ne ikpia gha hoẹmwẹ amwẹ iran, zẹ vbene iran hoẹmwẹ ikinnegbe iran.” (Ẹfisọs 5:28, 29) Vbe a ya ọna kha? Kpee VIDIO na, iyeke ọni, uwa ghi ziro yan inọta nọ lelẹe.
-
De odẹ eso ne ọdọ gha ya rhie ẹre ma wẹẹ, irẹn hoẹmwẹ amwẹ ọnrẹn kevbe wẹẹ irẹn ya obọ esi muẹn?
Tie Kọlose 3:12, iyeke ọni, uwa ghi ziro yan inọta na:
-
De vbene ọdọ gha ya sẹtin rhie avbe akpa na ma hẹ vbe orọnmwẹ ọghẹe?
5. Ikhuo—wa hoẹmwẹ ọdafẹn uwa, uwa ghi vbe gha rhie ọghọ ne iran
E Baibol wẹẹ ne okhuo gha rhie ọghọ ne ọdọ re, ọ gha khọnrẹn wẹẹ ọdọ re i ga e Jehova. Tie 1 Pita 3:1, 2, iyeke ọni, uwa ghi ziro yan avbe inọta na:
-
Deghẹ arowa ruẹ i ga e Jehova, ẹi mwẹ u ma gha hoo nọ do deba ruẹ vbe ugamwẹ e Jehova. De ne uwẹ roro wẹẹ ọ gha gele biẹ ọmọ esi? Ne u gha kporhu ma arowa ruẹ vbe ugbugbẹhia nọ ra, ra ne u gha mwẹ uyinmwẹ esi kevbe ne u gha rhie ọghọ nẹẹn? Vbua gu kha vberriọ?
Ọdọ vbe amwẹ gha ku obọ kugbe, iran gha sẹtin ru azẹ nọ maan. Vbọrhirhighayehẹ, ọ sẹtin sunu vbe ugbẹnso wẹẹ, okhuo ma kue ye azẹ ne ọdafẹn ọnrẹn ru. Ọ ghaa yerriọ, ọ ghi ya ọghọ vbe ute ta emwi nọ rre ọre ekhọe, sokpan ọ khẹke nọ yerre wẹẹ ọdọ re, ẹre Jehova rhie asẹ na, nọ gha ru azẹ ne ẹgbẹe ọre. Ọ khẹke nọ hia nọ ku obọ gbe ba azẹ ne ọdọ re ru. Ọ ghaa ru vberriọ, emwa hia vbe ẹgbẹe ọre ghi gha sọyẹnmwẹ. Tie 1 Pita 3:3-5, iyeke ọni, uwa ghi ziro yan inọta na:
-
Vbọ ye hẹ vbe ekhọe Jehova, vbe okhuo ghaa rhie ọghọ ne ọdọ re?
6. U gha sẹtin sọfurre ye ọlọghọmwa ni rre orọnmwẹ ruẹ
Ai miẹn orọnmwẹ ne ọlọghọmwa i ye. Nọnaghiyerriọ, te ọdọ vbe amwẹ gha ku obọ kugbe, ne iran ya sọfurre ye ọlọghọmwa nọ rhirhi rhie egbe ma vbe orọnmwẹ ọghe iran. Kpee VIDIO na, iyeke ọni, uwa ghi ziro yan inọta ni lelẹe.
-
Vbe vidio na, de emwi eso ni rhie ẹre ma wẹẹ, ọdọ vbe amwẹ na, ma ghi sikẹ egbe vbene ọ te gha ye?
-
De emwi ne iran ghi ru, nọ ghi ya iran werriegbe do sikẹ egbe sayọ?
Tie 1 Kọrinti 10:24 kevbe Kọlose 3:13, NW. Uwa gha tie dọmwadẹ ako na nẹ, uwa ghi ziro yan inọta na:
-
Ọdọ vbe amwẹ ghaa lele ibude na, vbọ khian ya ru iyobọ ne iran hẹ vbe orọnmwẹ ọghe iran?
E Baibol wẹẹ ne ima gha rhie uyi ne egbe. Ọna dekaẹn na gha ya obọ esi mu egbe, a ghi vbe gha rhie ọghọ ne egbe. Tie Rom 12:10, NW, iyeke ọni, uwa ghi ziro yan avbe inọta na:
-
Ọ gha de ọghe uyi ne ọdọ vbe amwẹ rhie ne egbe, de ọmwa nọ khẹke nọ ka gha zẹ owẹ nokaro? Vbua gu kha vberriọ?
EMWA ESO KEGHI KHA WẸẸ: “Mẹ vbe arowa mwẹ (ra ọvbokhan mwẹ) ma ghi sikẹ egbe vbene ọ ka ye.”
-
Vbua khian ya gi ọmwa vberriọ rẹn wẹẹ, e Baibol gha sẹtin ru iyobọ nẹẹn?
OLIKA ẸMWẸ
Ọdọ vbe amwẹ gha sẹtin gha mwẹ oghọghọ, vbe iran gha hoẹmwẹ egbe, iran na gha rhie ọghọ ne egbe, iran na vbe gha lele ilele ni rre Baibol.
Ogbewerriẹ
-
De emwi ne ọdọ gha ru, ne oghọghọ mieke na gha rre orọnmwẹ ọghe iran?
-
De emwi ne okhuo gha ru, ne oghọghọ mieke na gha rre orọnmwẹ ọghe iran?
-
Deghẹ u ru orọnmwẹ nẹ, de ilele nọ rre Baibol nọ gha ru iyobọ nuẹn ya sikẹ ogieva ruẹ sayọ?
RUẸ SAYỌ
Ghee emwi eso nọ gha ya ẹgbẹe ruẹ gha sọyẹnmwẹ arrọọ.
Ghee vidio ọghe ihuan na, nọ rhie ẹre ma, afiangbe na miẹn vbọ, vbe a ghaa lele adia ọghe Osanobua vbe orọnmwẹ.
Ghee evba yae kha, ne okhuo gha gbe uhunmwu kotọ ne arowa re.
“Ikhuo, Vbọzẹ Nọ Na Khẹke Ne Uwa Gha Gbe Uhunmwu Kotọ Ne Ọdafẹn Uwa?” (The Watchtower, May 15, 2010)
Ọdọ vbe amwẹ ọkpa ghaa mwẹ ọlọghọmwa ni wegbe sẹrriọ wẹẹ, iran na sọọ ebe orọnmwẹ. Vbọ ghi ru iyobọ ne iran?
Osanobua Ẹre Ọ Ru Iyobọ Ne Ima Ya Dọlegbe Gha Rrọọ Zẹvbe Ọdọ Vbe Amwẹ (5:14)
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
