IRUẸMWI 59
U Gha Sẹtin Zin Egbe Ukpokpo
Ẹi mwẹ Ivbiotu e Kristi hia ma werriẹ aro daa igbodan kevbe ukpokpo. Ọ khẹke ne ọna gha ya ohan mu ima ra?
1. Vbe ima ya rẹn hẹ wẹẹ, a gha kpokpo ima?
E Baibol wẹẹ: “Emwa hia ni hoo ne iran gha yin uyinmwẹ nọ yẹẹ Osanobua, vbe a ya egbe ba e Kristi, a gha zẹ iran kpokpo.” (2 Timoti 3:12) Emwa kegha zẹ Jesu kpokpo rhunmwuda, ọ ma gha re ọkpa vbe agbọn Esu. Ma i vbe re ọkpa vbe agbọn Esu, nọnaghiyerriọ, ẹi kpa ima odin vbe arriọba emwa nagbọn kevbe ugamwẹ ohoghe ghaa zẹ ima kpokpo.—Jọn 15:18, 19.
2. Vbe ima khian ya mu egbe yotọ khẹ ukpokpo hẹ?
Ọ khẹke ne amuẹtinyan ne ima mwẹ daa e Jehova wegbe sayọ nia. Zẹ ẹghẹ kọ, ne u ya gha na erhunmwu kevbe ne u ya gha tie Baibol vbe ẹdẹgbegbe. Gha yo iko vbe ẹghẹ hia. U ghaa ru vberriọ, u ghi sẹtin ya udinmwẹ werriẹ aro daa ukpokpo nọ rhirhi gha khin, ọ gha khọnrẹn nọ ke obọ emwa vbe uwu ẹgbẹe ruẹ rre. Ukọ e Pọl na wa gha zẹ kpokpo vbe ẹghẹ hia khare wẹẹ: “Nọyaẹnmwa ọrọre nọ yọ mwẹ obọ, ohan i ghi mu mwẹ.”—Hibru 13:6.
Ma ghaa kporhu vbe ẹghẹ hia, ọ gha ya ima gha mwẹ udinmwẹ sayọ. Ikporhu keghi ya amuẹtinyan ne ima mwẹ daa e Jehova wegbe sayọ, ọ vbe ru iyobọ ne ima, ne ima ghẹ gha mu ohan emwa nagbọn. (Itan 29:25, NW) U ghaa ya udinmwẹ kporhu nia, ọ gha ru iyobọ nuẹn, ne u ye gha kporhu, uhiẹn vbe arriọba gha mu awua ye iwinna ima.—1 Tẹsalonaika 2:2.
3. De ere ne ima miẹn vbọ vbe ima ghaa zin egbe ukpokpo?
Vbene ẹmwata, ẹi rhiẹnrhiẹn ima vbe a ghaa zẹ ima kpokpo, sokpan ma gha sẹtin zin egbe ẹre, amuẹtinyan ọghe ima ghi do wegbe sayọ. Ma ghi vbe do sikẹ e Jehova sayọ, vbe ima gha bẹghe vbene ọ ya ru iyobọ ne ima hẹ, vbe ẹghẹ ne ima te ya gha roro ẹre wẹẹ, ọghe ima fo nẹ. (Tie Jems 1:2-4.) Ọ wa da e Jehova vbe ima ghaa rri oya, sokpan ẹko keghi rhiẹnrhiẹn ọnrẹn vbe ima gha sẹtin zin egbe. E Baibol wẹẹ: “Adeghẹ uwa zin egbe oya ne uwa re, vbe uwa ma ba emwi rhọkpa ku ru, Osanobua gha fiangbe uwa yọ.” (1 Pita 2:20) Arrọọ ọghe etẹbitẹ, ẹre Jehova khian ya fiangbe emwa hia ni zin egbe sẹ ufomwẹ. Vbe ẹghẹ nii, ai khian gha zẹ ọmwa kpokpo rhunmwuda wẹẹ, ọ rre ugamwẹ ẹmwata.—Matiu 24:13.
GUALỌ OTỌ RE SAYỌ
Gia ziro yan evbọzẹe ne u khian na gha mwẹ ilẹkẹtin wẹẹ, u gha sẹtin gha ya ẹkoata ga e Jehova vbe u ghaa werriẹ aro daa ukpokpo, ma gha vbe ziro yan ere ne u gha lae miẹn.
4. U gha sẹtin zin egbe vbe ẹgbẹe ruẹ ghaa zẹ ruẹ kpokpo
Jesu rẹnrẹn wẹẹ, emwa eso vbe uwu ẹgbẹe ima gha hia, ne iran da ima obọ yi, ne ima ghẹ ghi ga e Jehova. Tie Matiu 10:34-36, iyeke ọni, uwa ghi ziro yan inọta na:
-
De emwi nọ gha sẹtin sunu, vbe ọmwa vbe uwu ẹgbẹe gha wẹẹ irẹn khian ga e Jehova?
Ne u ya rẹn vbene ọna ya gele sunu hẹ, kpee VIDIO na, iyeke ọni, uwa ghi ziro yan inọta nọ lelẹe.
-
De emwi ne u gha ru deghẹ ọmwa ruẹ vbe uwu ẹgbẹe ra ọse ruẹ na gha hia, nọ mu ruẹ ekhọe rhia, ne u ghẹ ghi ga e Jehova?
Tie Psalm 27:10 kevbe Mak 10:29, 30. Uwa gha tie dọmwadẹ ako na nẹ, uwa ghi ziro yan inọta na:
-
De vbene eyan na, gha ya sẹtin ru iyobọ nuẹn hẹ, vbe emwa vbe uwu ẹgbẹe ra avbe ọse ghaa kpokpo ruẹ ye ugamwẹ ne u rhie ne Jehova?
5. Ye gha ga e Jehova uhiẹn vbe u ghaa werriẹ aro daa ukpokpo
Ọmwa nẹi mwẹ udinmwẹ i sẹtin ga e Jehova vbe emwa ọvbehe ghaa kpokpo ẹre. Kpee VIDIO na, iyeke ọni, uwa ghi ziro yan inọta nọ lelẹe.
-
De emwi eso ne u miẹn vbe vidio na, nọ rhie igiọdu nuẹn?
Tie Iwinna 5:27-29 kevbe Hibru 10:24, 25. Uwa gha tie dọmwadẹ ako na nẹ, uwa ghi ziro yan inọta na:
-
Vbọzẹ nọ na ru ekpataki ne ima ye gha ga e Jehova, uhiẹn vbe arriọba gha mu awua ye iwinna ikporhu ọghe ima ra iko ne ima do?
6. E Jehova gha ru iyobọ nuẹn ya zin egbe
Avbe Osẹe Jehova vbe uhunmwu otagbọn hia, ke ọmaẹn ke ẹghele, keghi ya ẹkoata ga e Jehova, uhiẹn vbe a ghaa kpokpo iran. Ne u mieke na rẹn emwi nọ ru iyobọ ne iran, kpee VIDIO na. Iyeke ọni, uwa ghi ziro yan inọta nọ lelẹe.
-
Vbe vidio na, vbọ ru iyobọ ne etẹn na, ne iran na sẹtin zin egbe?
Tie Rom 8:35, 37-39 kevbe Filipai 4:13, NW. Uwa gha tie dọmwadẹ ako na nẹ, uwa ghi ziro yan inọta na:
-
De emwi ne u miẹn vbe ako na, nọ ya ruẹ mwẹ ilẹkẹtin wẹẹ, u gha sẹtin zin egbe edanmwẹ nọ rhirhi gha khin?
Tie Matiu 5:10-12, iyeke ọni, uwa ghi ziro yan inọta na:
-
Vbọ khian ya ruẹ gha ghọghọ uhiẹn vbe u ghaa werriẹ aro daa ukpokpo?
Eguọmwadia e Jehova nibun sẹtin zin egbe ukpokpo, iran na vbe musọe. Uwẹ gha vbe sẹtin!
EMWA ESO KEGHI KHA WẸẸ: “I ma yayi ighẹ I gha sẹtin zin egbe ukpokpo.”
-
De avbe ako ọghe Baibol ni gha sẹtin rhie igiọdu ne emwa vbenian?
OLIKA ẸMWẸ
Aro nọ ghaan ẹre Jehova ya ghee ẹrhiọn ne ima loo ya gae, uhiẹn vbe emwa ghaa zẹ ima kpokpo. Vbe ẹtin e Jehova, ma gha sẹtin zin egbe sẹ ufomwẹ!
Ogbewerriẹ
-
Vbọzẹ nọ na khẹke ne Ivbiotu e Kristi kọe ye orhiọn wẹẹ, a gha zẹ iran kpokpo?
-
De emwi ne u gha sẹtin ru nia, ne u ya mu egbe yotọ khẹ ukpokpo?
-
De emwi nọ gha ya ruẹ gha mwẹ ilẹkẹtin wẹẹ, u gha ye sẹtin gha ga e Jehova, uhiẹn vbe u ghaa werriẹ aro daa edanmwẹ nọ rhirhi gha khin?
RUẸ SAYỌ
Ghee vbene ọtẹn nokpia ọkpa nọ re igbama ya gi ima rẹn vbene Jehova ya ru iyobọ ne irẹn hẹ, nọ ghi zẹe ighẹ ọ sẹtin zin egbe vbe a muẹn ye eghan, rhunmwuda nọ ma na sinmwi oseghe ẹvbo.
Gha Mwẹ Iziengbe Agharhemiẹn Wẹẹ U Werriẹ Aro Daa Ukpokpo (2:34)
Ghee emwi nọ ru iyobọ ne ọdọ vbe amwẹ ọkpa ya sẹtin gha ya ẹkoata ga e Jehova vbe ọwara ukpo nibun, agharhemiẹn wẹẹ, iran werriẹ aro daa ukpokpo.
Ruẹ vbekpa vbene u gha ya sẹtin ya udinmwẹ werriẹ aro daa ukpokpo hẹ.
“Muegbe Yotọ Nia, Ne U Ya Werriẹ Aro Daa Ukpokpo” (Owa Ọkhẹ, July 2019)
De aro nọ khẹke ne ima ya gha ghee ukpokpo ne ima miẹn vbe uwu ẹgbẹe? Vbọ khian ru iyobọ ne ima ya sẹtin zin egbe ẹre?
“Umozo Ẹre Odẹ Ọghe Ẹmwata Rhie Rre, ‘Ẹi Re Ọfunmwegbe’” (Owa Ọkhẹ, October 2017)
You May Also Like
AVBE INỌTA NE EMWA MỌBỌ NỌ
Vbọre Iruẹmwi Ọghe Baibol?
Gualọ otọre, nu miẹn ewanniẹ ọghe avbe inọta ni dekaan emwamwa iruẹmwi e Biabol ọghọhẹ ọghomwa.
