ABỌ 4
Ekhọe Nọ Bu Abe Gbe Ọmwa—‘Kpe Mwẹ Huan Hin Orukhọ Mwẹ Rre’
“Iwinna ọghe ọgbọn ni miẹn, keghi wa ye emwi maan sayọ ne ẹgbẹe mwẹ vbe odẹ ọghe ikpakpa, sokpan ọ na vbe ya mwẹ gha mwẹ obọ vbe avbe uyinmwẹ ughughan nọ ma gba. I na do gha do ugie emwi ukpo, I na vbe gha mwẹ obọ vbe otu azẹ, uhiẹn I na do gha yo esọsi. Vbe ọwara ukpo 40, ẹre I wa ya hẹwẹ vbe ugamwẹ zẹvbe Osẹe Jehova. Vbene ọ ya gha kpẹẹ yọ kpẹẹ yọ, erriọ I ya gha roro ẹre sayọ wẹẹ, e Jehova i khian ghi sẹtin yabọ mwẹ. I na gha roro ẹre wẹẹ, I i khian sẹtin yabọ egbe mwẹ. I kue rẹn ne ẹmwata nẹ amaiwẹ, I ke ba uhunmwu ye ehe ne odẹ i ye.”—Martha.
EKHỌE nọ bu abe gbe ọmwa keghi re ihẹ nọ gha sẹtin dee yan ọmwa. Ọba e Devid keghi gbẹn wẹẹ: ‘Abakuru mwẹ ye lẹlẹlẹ vbe uhunmwu mwẹ, te ọ yevbe na ghe ihẹ nọ khua sẹ mwẹ gbe.’ (Psalm 38:4) Te Ivbiotu e Kristi eso ghi wa ye fuẹnrẹn rhunmwuda wẹẹ, iran khiẹ gberra egbe, vbene ekhọe iran na wa tama iran wẹẹ, e Jehova i khian yabọ iran ẹdẹ. (2 Kọrinti 2:7) Ebamiro vberriọ gba ra? Adeghẹ u dobọ ru orukhọ nọ wegbe, te uwẹ ghi wa khian rre ne Jehova sẹrriọ wẹẹ, irẹn i khian ghi yabọ ruẹ, ẹdẹ na wu ra? Ẹn ọ, ẹi re erriọ!
‘Wa Gima Do Ziro Kugbe’
E Jehova i fi iyeke gbe emwa orhukhọ ni roro iro fi uyinmwẹ werriẹ. Vbene ẹmwata, ọ keghi bu iran yo, nọ ru iyobọ ne iran! Vbe erre ọghe ọmọ nọ fu ukhu, Jesu keghi ye Jehova gie erha nọ mwẹ ahoẹmwọmwa ne ovbi ẹre kpa se ẹgbẹe ọre rae, ya gha do ẹki usakanmwẹ. Vbe ọ ghi zẹ kpẹẹ, ọmọ na, na ghi zọe vbe iro ne irẹn werriegbe gha die owa. ‘Urria gbaan ẹre [ọmọ nii] he ye, vbe erhae dẹghe ẹre. Itohan keghi guaekpa, ọ na rhulẹ bu ẹre, ọ gbae ginna egbe, ẹre ọ na fẹko mu unu soso ẹre unu.’ (Luk 15:11-20) Ekhọe ruẹ ọkpa khama ruẹ nu sikẹ e Jehova ra, vbene ekhọe ruẹ vbe obọ nọkpa na vbe khama ruẹ wẹẹ, u ye rre ‘urria gbaan’ ra? Zẹvbe na ghe erha ne Jesu guan kaan vbe erre ọghẹe, ẹnina keghi gu e Jehova kpa nọ ya ru iyobọ nuẹ. Ọ muegbe nọ ya gbe ọbokhian nuẹ.
Sokpan, deghẹ u na gha mwẹ ọnrẹn vbe orhiọn wẹẹ, orukhọ ruẹ wegbe gbe ra ọ bun gbe ne Jehova gha sẹtin yabọ ghi vbo? Lahọ muẹn roro itie ọghe Jehova na gbẹn ye ebe Aizaia 1:18, NW: “‘Larre nia, wa gima do ziro kugbe,’ erriọ e Jehova khare. ‘Orukhọ ọghe uwa gha dobọ gha baa raghoragho, I gha yae khian nọ fua vbene a ghe isonorhọ.’” Ai miẹn orukhọ nẹi gie Jehova yabọ, ọkhọnrẹn wẹẹ nẹ orukhọ nii yevbe na ghe orra nọ baa raghoragho nọ wu ye ukpọn nọfua.
E Jehova ma hoo ne u wa gha rrioya re khian, ighẹ ekhọe nọ fi ọmwa uwẹnrhiẹn. De vbene u khian ghi ya miẹn ayabọ nọ ke obọ Osanobua rre hẹ, nọ ye egbe rọkhọ mwa kevbe nọ ye ọmwa mwẹ ekhọe ọguọmwaziro nọhuanrẹn? Muẹn roro owẹ eva ne Ọba e Devid zẹ. Vbe okaro, ọ khare wẹẹ: ‘I gha miẹn orukhọ mwẹ kue ma Jehova.’ (Psalm 32:5) Yerre wẹẹ, e Jehova gie na tie ruẹ nẹ, nu gu irẹn guan vbe erhunmwu kevbe nu uwẹ vbọre ‘ziro kugbe.’ Miẹn ọnrẹn yi ighẹ itie nii. Miẹn orukhọ ruẹ kue ma e Jehova kevbe nu vbe mu iro ruẹ ma rẹn. Rhunmwuda emwi ne Devid ye aro miẹn, ọ sẹtin ye ilẹkẹtin na erhunmwu wẹẹ: ‘Kpe mwẹ huan hin orukhọ mwẹ rre. . . . ‘Udu nọ wagha kevbe ne hogha, Eo Osanobua, u i khian yan gbe ẹre.’—Psalm 51:2, 17.
Ukpogieva, e Devid miẹn iyobọ vbe obọ Natan ne akhasẹ ne Osanobua zẹ kevbe nọ ya zihe egbe. (2 Samuẹl 12:13) Vbe ẹdẹnẹrẹ, e Jehova zẹẹ ediọn nẹ a ma re emwi ye iko, ne iran ru iyobọ nẹ emwa orukhọ ni roro iro fi uyinmwẹ werriẹ, ya werriegbe do gha gu e Jehova ru ọse. U gha gu avbe ediọn guan, iran ghi loo evbagbẹn nọhuanrẹn ya ru iyobọ nuẹ, iran ghi vbe ye ekhọe hia na erhunmwu nuẹ, ne orhiọn ruẹ mieke na sotọ, ne ekhọe ruẹ ghẹ ghi gu ruẹ gui, kevbe wẹẹ, iran ghi vbe ru iyobọ nuẹ ne egbe rhan ruẹ vbe odẹ ọghe orhiọn.—Jems 5:14-16.
E Jehova hoo nu gha mwẹ ekhọe ọguọmwaziro nọhuanrẹn, ne orhiọn ruẹ mieke na sotọ
‘Oghọghọ Nọ ne Ọmwa ne Osanobua Ya Orukhọ Ọghẹe Ma Rẹn’
Vbene ẹmwata, u sẹtin roro ẹre wẹẹ, nu miẹn orukhọ ruẹ kue ma Osanobua ne Jehova kevbe nu gu ediọn guan vbekpa re, keghi re usun emwi nọ ghi lọghọ sẹ. E Devid wa vbe gha mwẹ egbe iziro vberriọ. Irẹn ‘da unu yi’ vbe ẹghẹ eso vbene ọ ma na ta orukhọ ọghẹe ladian. (Psalm 32:3) Vbe iyeke ọni, ọ keghi do bẹghe ẹre wẹẹ, ere rrọọ ne irẹn na miẹn orukhọ ọghe irẹn kue, kevbe ne irẹn na dọlọ uyinmwẹ ọghe irẹn yi.
Ere kpataki ne Devid miẹn ọre ne irẹn na werriegbe gha mwẹ ọyẹnmwẹ. Irẹn keghi gbẹn wẹẹ: ‘Oghọghọ nọ ne ọmwa ne Osanobua ya orukhọ ọghẹe ma rẹn, kevbe ọmwa na ya orukhọ ọghẹe bọ.’ (Psalm 32:1) Ọ na vbe na erhunmwu wẹẹ: Eo Jehova, ‘rhan akhuarhavbunu mwẹ ruan, ne I mieke na gha ya unu mwẹ rhie urhomwẹ nuẹ.’ (Psalm 51:15) Rhunmwuda ne orhiọn rẹn na ghi sotọ, kevbe wẹẹ, ọ gbọyẹmwẹ ye ayabọ ọghe Osanobua, egbe na ghi guaekpa nọ gha tama emwa ọvbehe vbekpae Jehova.
E Jehova hoo nu gha mwẹ ekhọe ọguọmwaziro nọhuanrẹn, ne orhiọn ruẹ mieke na sotọ. Irẹn ma hoo ne u gha tama emwa vbekpa irẹn kevbe emwamwa ọghe irẹn vbene ekhọe ruẹ na bu abe gbuẹ, sokpan ẹkoata kevbe ọyẹnmwẹ nọ dinmwi, ẹre irẹn hoo nu ya gha tae. (Psalm 65:1-4) Yerre wẹẹ, irẹn khare ne u bu irẹn gha dee “ne orukhọ ọghe uwa mieke na gha re na kpe kua, ne ẹghẹ ne egbe ya fu ọmwa rre mieke na ke obọ e Jehova tobọre rre.”—Iwinna 3:19, NW.
Emwi nọ wa sunnu daa e Martha ẹre ọ nikhin. Irẹn keghi kha wẹẹ: “Ovbimwẹ nokpia kegha viọ avbe Watchtower kevbe Awake! gu mwẹ. Kherhe kherhe, I na werriegbe do gu obọ e Jehova. Emwi nọ ghi wa lọghọ mwẹ sẹ na ru, vbe ẹghẹ ne I ya werriegbe gha bu e Jehova dee, ọre ne I nọ ayabọ ye orukhọ hia ne I he ru. Sokpan vbe okiekie, I na ghi do nọ e Jehova vbe erhunmwu nọ yabọ mwẹ. A gha kha wẹẹ ukpo 40 ẹre ọ gberra I ke werriegbe bu e Jehova gha dee, te a muan rẹn. Emwi nọ sunnu da mwẹ keghi re osẹ nọ rhiẹre ma wẹẹ, ẹi mwẹ vbene ọ gha kpẹẹ sẹ hẹ ne ọmwa ya sẹ e Jehova rae, te ẹkpotọ ọvbehe ye kie nẹ nọ ya werriegbe do ga Osanobua, kevbe nọ do gha re ọmwa ne irẹn werriegbe hoẹmwẹ ọnrẹn.”
