OSI keghi si emwa hia​​—⁠ya sẹ egbe emwa ọghe Osanobua. ọsihuan keghi gbẹn wẹẹ, ‘osi te gbe mwẹ uan.’ (Psalm 94:19) Jesu vbe kha wẹẹ, vbe ẹghẹ okiekie ẹdẹ, “osi ẹmwẹ agbọn” i khian gi emwa bẹghe odẹ ya ga e Jehova. (Luk 21:34) Uwẹ vbe vbo? Te iro ghi han ruẹ ra, rhunmwuda usẹ igho, ọlọghọmwa ọghe ẹgbẹe, ra emiamwẹ ra? De vbene Jehova khian ya ru iyobọ nuẹ hẹ ya sẹtin gu avbe ọlọghọmwa na loo?

Ima i mwẹ ẹtin obọ ima na ya gu osi suan. Ukọ Pọl gbẹn wẹẹ, ‘Ọlọghọmwa gba ima aro gba ima iyeke.’ ‘Emwi hia sunsun ye ima aro . . . ; a kuan ima ose yotọ.’ Ọrheyerriọ, ọ vbe kha wẹẹ, ‘a ma degbe ima odẹ ne ima ghẹ sẹtin ze obọ ze owẹ,’ ‘iro ma han ima’ kevbe wẹẹ, ‘a ma miẹn ima uhunmwu.’ De emwi nọ ru iyobọ ne ima ya gha mwẹ iziengbe? Ọ keghi re ‘ẹtin nọ sẹ ẹtin’​​—⁠ọni ọre ẹtin nọ ke obọ Osanobua ne Jehova nọ re Osa ne udazi ọghomwa rre.​​—⁠2 Kọrinti 4:​7-9.

Muẹn roro vbene u ya miẹn ‘ẹtin nọ sẹ ẹtin’ hẹ vbe ẹghẹ nọ gberra. U yerre vbene ọta nọ rhie igiọdu ne ọmwa ya ru iyobọ nuẹ hẹ, ya gbọyẹmwẹ yọ sayọ ighẹ ahoẹmwọmwa nẹi beghe ọghe Jehova ra? Amuẹtinyan ọghuẹ daa avbe eyan ọghe Jehova wegbe sayọ vbe ẹghẹ ne u na gha ma emwa emwi, vbekpa ayayẹro ọghe Paradais ra? Vbe ẹghẹ ke ẹghẹ ne ima ya yo iko kevbe ima na vbe gu emwa guan vbekpa emwi ne ima mu ẹtin yan, ẹrhiọn keghi la ima iwu ne ima ya sẹtin ziengbe osi ọghe ẹmwẹ agbọn, kevbe orhiọn ọghe ima ghi vbe sotọ, ne ima mieke na sẹtin ga e Jehova vbuwe ọyẹnmwẹ.

Vbene ẹmwata, u sẹtin do gha roro wẹẹ, te a wa zẹẹ yan ruẹ. Vbe igiemwi, e Jehova khama ima ne ima mue ne Arriọba ye okaro, kevbe na gha lelẹe vbe ẹghẹ hia, emwamwa ọghe iwinna ugamwẹ ọghe Osanobua. (Matiu 6:​33; Luk 13:24) Ọrheyerriọ, deghẹ ukpokpo, emiamwẹ, ra ọlọghọmwa ọghe ẹgbẹe wa wiẹn ruẹ ginna otọ vbo? Ra iwinna ruẹ miẹn ruẹ ẹghẹ kevbe ẹtin nọ te khẹke nu ya ru ọghe iko vbo? Adeghẹ emwi na wa gba otọ gba ukhunmwu nu gha ru ​​—⁠sokpan ẹghẹ kevbe ẹtin nu mwẹ i khian suẹ ya ruẹ⁠​—⁠iro sẹtin wa han ruẹ. Ọ gha kẹ, u kue gha roro ẹre wẹẹ, emwi ne Jehova gualọ vbe obọ ruẹ bun gbe.

E Jehova keghi mwẹ amuroro. Ẹi mwẹ ẹghẹ ọkpa ne irẹn ya yaro yọ vbe obọ ima ighẹ emwi ne ima i khian sẹtin rhie ladian. Irẹn vbe rẹn wẹẹ, ọ gha rhie ẹghẹ a te miẹn wẹẹ, ima miẹn uhunmwu vbe orhikhan ọghe ekhọe kevbe ọghe ikpakpa.​​—⁠Psalm 103:​13, 14.

Vbe igiemwi, muẹn roro, vbene Jehova ya gbaroghe Ẹlaija ne akhasẹ hẹ. Vbe ẹghẹ ne Ẹlaija ya lẹẹ gha rrie ato rhunmwuda ohanmumwẹ kevbe egbewọmwẹ, e Jehova gu ẹre gui ra, kevbe ọ yaa re, nọ werriegbe ya suẹn iwinna rẹn ra? Ẹn o. Igbava ẹre Jehova gie odibo bu Ẹlaija nọ ya fẹko huẹn ọnrẹn kevbe nọ rhie evbare nẹ. Uhiẹn vbe iyeke ikpẹdẹ 40 vbe Jehova ru ọni nẹ, Ẹlaija na ye gha si osi, kevbe ohan na ye gha muẹn. De emwi ọvbehe ne Jehova ru nọ ya ru iyobọ nẹ? Vbe okaro, e Jehova keghi rhiẹre ma wẹẹ irẹn gha sẹtin gbogba ga re. Ukpogieva, e Jehova keghi loo “ovbi urhu ne rọkhọ” ya fu ẹre ẹko rre. Vbe  okiekie, e Jehova keghi giẹ rẹn wẹẹ, emwa arriasẹn nibun ọvbehe rrọọ ni ye ẹkoata ga Osanobua. Vbe ọ ma ghi kpẹẹ vba, Ẹlaija na werriegbe suẹn gha zọghae vbuwe iwinna akhasẹ. (1 Ọba 19:​1-​19) De iruẹmwi nọ ladian vbọ? Vbe ẹghẹ ne ẹtin ya fo Ẹlaija rhunmwuda osi, e Jehova keghi ye obọ ẹnina muẹn, kevbe ọ na mwẹ iziengbe vbe egbe ẹre. E Jehova ma he fiwerriẹ. Ọ wa ye gbaroghe ima vbe odẹ vberriọ.

Emwi nu rẹnrẹn wẹẹ, u gha sẹtin ru vbe ugamwẹ ọghe Jehova ẹre ọ khẹke nu gha mu roro. Ghẹ ye emwi nu gha sẹtin ru vbe ẹghẹ na nia, ya gie emwi nu te gha ru vbe ẹghẹ nọ gberra. Vbe igiemwi: Ọmwa nọ rhulẹ ọghe osuan, nọ ghi hẹwẹ vbe ulẹ nọ ya muegbe yotọ vbe inu uki ra ukpo nọkhin, i khian wa ye uhukpa werriegbe suẹn iku isasegbe nii, nọ ka ru dee yi. Nọghayayerriọ, ọ suẹn gha fian okhuo ne kherhe kherhe ne egbe ẹre, nọ ya gha koko ẹtin kevbe iziengbe. Ivbiotu e Kristi keghi yevbe emwa ni rhulẹ. Iran keghi muegbe yotọ vbene iran na mwẹ evba kọnrẹn ne iran rhie aro tua. (1 Kọrinti 9:24-27) Vbọzẹ ne u ma na wa khu ẹre, ighẹ evba kọnrẹn ọkpa ọghe orhiọn ne obọ ruẹ gha sẹtin wa rherhe vba, vbe ẹghẹ na nia? Vbe igiemwi, u sẹtin fian okhuo ne egbuẹ, ọghe na suẹn gha yo ọkpa vbe iko na do. Nọ e Jehova vbe erhunnwu nọ ru iyobọ nuẹ nu sẹtin musọe vbe nọ dekaan evba kọnrẹn ọghuẹ. Zẹvbe ne ẹrhiọn werriegbe ya la ruẹ iwu vbe odẹ ọghe orhiọn, u ghi do ‘danmwẹ ọnrẹn ghe kevbe nu bẹghe vbene Jehova maan hẹ.’ (Psalm 34:⁠8) Yerre wẹẹ, emwi ke emwi nu ru, ne u ya rhiẹre ma ahoẹmwọmwa ọghuẹ daa e Jehova​​—⁠ẹi mwẹ vbene ọ gha kherhe sẹ hẹ​​—⁠aro nọ ghaan ẹre ọ khian ya ghee ẹre.​—⁠Luk 21:​1-4.

De vbene e Jehova ya ru iyobọ ne June hẹ ya werriegbe bu irẹn gha dee? Irẹn tama ima wẹẹ: “I na gha na erhunmwu gie Jehova vbe ẹghẹ hia, I na gha rinmwiaẹn nọ ru iyobọ mẹ. Vbe uwe asẹ nii, amwẹ ovbi mwẹ na gu mwẹ guan vbekpa asikoko ọkpa na khian doo vbe ẹvbo ni ye. I na tamuolọyan rẹn ne I yo ẹdẹ ọkpa vbe ne asikoko. U miẹn vbene ẹko sẹ mwẹ ọyẹnmwẹ hẹ, ne I na werriegbe bu emwa ọghe Jehova gha dee! Asikoko nii, keghi wa gha re aguakpa ne I wa khẹ ke ẹdọ gha dee. Nia, I werriegbe ga e Jehova nẹ vbuwe ọyẹnmwẹ. Te arrọọ mwẹ ghi wa mwẹ evbọ demu sayọ. Eban imẹ rẹn vbene ọ ru ekpataki sẹ hẹ ne I gha rre uwe ẹbu etẹn mwẹ, kevbe ne I ghẹ zẹ egbe mwẹ hiẹn usun rre. I wa ghọghọ wẹẹ, ọ ye kẹ mwẹ ya werriegbe gha dee.”