E Timoti kegha re igbama nọ ghaa mwẹ ẹkorhiẹnrhiẹnmwẹ nọ ya ru iyobọ ne emwa. Ọ mu okhian ye ehe nibun ya ru iyobọ ne emwa ọvbehe. Rhunmwuda ọna, irẹn kegha mwẹ arrọọ nọ vuọn ne oghọghọ. Ọ gha yẹẹ ruẹ nu rẹn vbekpa re ra?—

E Timoti keghi waan rre vbe ẹvbo na tiẹre Listra. Vbe ẹghẹ nọ na gha re ọvbokhan kherhe, Iyẹ nọkhua Lọis kevbe Iyẹ nekherhe Yunis, na ghi suẹn gha ma re emwi vbekpae Jehova. Zẹvbe ne Timoti ya gha waan dee, ọ na gha hoo nọ ru iyobọ ne emwa ọvbehe ya ruẹ vbekpae Jehova.

Vbe Timoti ye rre igbama, e Pọl na tama rẹn nọ lele irẹn gha rrie ehe ọvbehe ya kporhu. E Timoti keghi kha wẹẹ: ‘I kueyọ!’ Irẹn  keghi muegbe nọ gha khian, nọ ya ru iyobọ ne emwa ọvbehe.

E Timoti na lele Pọl gha rrie ẹvbo ọkpa vbe Masidonia na tiẹre Tẹsalonaika. Iran ke sẹtin sẹ evba, iran na khian la ehe nọ rre, iran ke do la okọ. Vbe ẹghẹ niran ghi ya sẹ evba, iran na doo ru iyobọ ne emwa nibun ya ruẹ vbekpae Jehova. Sokpan ohu iran na gha mu emwa eso, kevbe iran na gha hoo ne iran rrie ikuaengbe niran. Rhunmwuda ọni, e Pọl kevbe Timoti na ghi kpa hiẹn ẹvbo nii rre, iran na ya kporhu vbe ehe ọvbehe.

Vbe uki eso ghi gberra nẹ, e Pọl keghi tama e Timoti nọ werriegbe gha rrie Tẹsalonaika, nọ ya ghe vbene etẹn ni rre evba ye hẹ. Udinmwẹ nọkhua ẹre irẹn ghaa mwẹ nọ na sẹtin werriegbe gha rhie ẹvbo vberriọ ne ẹbe ye! Sokpan e Timoti na ye gha khian rhunmwuda ọ ghaa mu ẹmwẹ etẹn ni rre evba roro. Vbe ọ ghi ke ẹvbo nii rre, iyẹn nọma ẹre ọ ghi do na ma e Pọl. Etẹn ni rre Tẹsalonaika wa ye ga e Jehova ẹsẹsẹmwẹse!

Ukpo nibun ẹre Timoti wa ya winna lele Pọl. Vbe ẹghẹ ọkpa, e Pọl keghi gbẹn wẹẹ, e Timoti ọre ọmwa nọ ghi gbegba sẹ ne irẹn gha sẹtin gie, nọ ya ru iyobọ ne avbe iko. E Timoti keghi hoẹmwẹ emwa kevbe Jehova.

Wẹ hoẹmwẹ emwa ni rre uwẹ agbọn ra? U vbe hoo nu ru iyobọ ne iran ya ruẹ vbekpae Jehova ra?— U gha ru vberriọ, u gha sẹtin gha mwẹ arrọọ nọ vuọn ne oghọghọ zẹvbe nọ ghaa ye ne Timoti!