Nokaro Na Gbẹn Gie Ivbi E Kọrint 15:1-58
-
Arhiọkpaegbe ọghe Kristi (1-11)
-
Arhiọkpaegbe ẹre amuẹtinyan ọghe ima hẹnhẹn egbe yan (12-19)
-
Arhiọkpaegbe ọghe Kristi ẹre ọ so igiẹ yọ wẹẹ emwa ni wulo gha rhiọ kpaegbe (20-34)
-
Egbe ọghe agbọn na, egbe ọghe orhiọn (35-49)
-
Egbe nẹi sẹtin wu kevbe egbe nẹi sẹtin kẹkẹ (50-57)
-
Na gha mwẹ emwi nibun na ru vbe iwinna Enọyaẹnmwa (58)
15 Banbanna nian etẹn, I hoo ne I ye uwa ẹre rre, iyẹn nọ maan ne I kporhu ẹre ma uwa, ne uwa miẹn yi, ne uwa vbe dayi gbain.
2 Iyẹn nọ maan nii ne I kporhu ẹre ma uwa, ẹre ọ vbe miẹn uwa fan nian, deghẹ uwa na ye daeyi gbain, sokpan a ma wẹẹ, te uwa do khian emwa iyayi kua kẹkan.
3 Emwi na ma mwẹ ẹre, rre usun emwi okaro ne I ma uwa ẹre, ọni nọ wẹẹ, e Kristi wu ye orukhọ ọghe ima zẹvbe ne Ebe Nọhuanrẹn khare;
4 a keghi ree ẹre, a na vbe huẹn ọnrẹn kpaegbe vbe ikpẹdẹ nogieha, zẹvbe ne Ebe Nọhuanrẹn khare;
5 kevbe wẹẹ, ọ rhiegbe ma e Sifas,* iyeke ọni, ọ na vbe rhiegbe ma iran Iweva nii.
6 Iyeke ọni, ọ keghi rhiegbe ma etẹn ni gberra iyisẹn vbe ihe isẹn (500) vbe uhukpa, nibun sẹ vbe uwu iran ye gu ima rrọọ do fi ebanban, agharhemiẹn wẹẹ, eso vbe wulo nẹ.*
7 Iyeke ọni, ọ keghi rhiegbe ma e Jems, ọ na vbe do rhiegbe ma avbe ukọ hia.
8 Sokpan, vbe okiekie ehia, ọ keghi rhiegbe ma mwẹ, vbene a miẹn wẹẹ, ọmọ nọ ma sẹ uki, ẹre irẹn rhiegbe ma.
9 Rhunmwuda, mẹ ẹre ọ ghi kanmwa sẹ vbe uwu avbe ukọ hia, I ma vbe sẹ na gha tie ẹre ukọ, rhunmwuda, te I ghaa zẹ iko ọghe Osanobua kpokpo.
10 Sokpan, rhunmwuda ẹse ne kpataki* ọghe Osanobua, ẹre I na re emwi ne I khin vbe ẹdẹnẹrẹ. Ẹse ne kpataki* nọ ru mẹ, ọ ma ru ẹre kua kẹkan, rhunmwuda, I kakabọ winna sẹ iran hia nikẹre; ọrheyerriọ, ẹ i re ẹtin obọ mwẹ ẹre I ya ru ẹre, sokpan, ẹse ne kpataki* ọghe Osanobua, ẹre ọ zẹe ighẹ I sẹtin ru vberriọ.
11 Vbọrhirhighayehẹ, ọre imẹ ẹre ọ ma uwa emwi, ra iran nọ, ọna ọre emwi ne ima kporhu ẹre, ọna ẹre uwa vbe yayi.
12 Sokpan, adeghẹ a kporhu ẹre khian wẹẹ, e Kristi rhiọ kpaegbe vbe idin, vbọ ghi zẹ ne eso vbe uwu uwa na kha wẹẹ, a i khian huẹn emwa ni wulo kpaegbe?
13 Adeghẹ ẹmwata gele nọ wẹẹ a i khian huẹn emwa ni wulo kpaegbe, ọni rhie ma wẹẹ, a ma huẹn e Kristi kpaegbe.
14 Sokpan, adeghẹ a ma huẹn e Kristi kpaegbe, ọni rhie ma wẹẹ, te ima kporhu kua kẹkan, amuẹtinyan ọghe uwa i vbe mwẹ esa hiehie.
15 Yevbesọni, adeghẹ ẹmwata gele nọ wẹẹ, a i khian huẹn emwa ni wulo kpaegbe, ọni vbe rhie ma wẹẹ, emwa ni sẹ osẹ ohoghe khian vbekpa Osanobua ẹre ima khin, te ima ghi vbe ba Osanobua ohoghe vberriọ, rhunmwuda, ma tae khian wẹẹ, ọ huẹn e Kristi kpaegbe vbe idin, vbene ọ ma na gele huẹn ọnrẹn kpaegbe.
16 Rhunmwuda, adeghẹ ẹmwata gele nọ wẹẹ, a i khian huẹn emwa ni wulo kpaegbe, ọni rhie ma wẹẹ, a ma huẹn e Kristi kpaegbe.
17 Deba ọni, adeghẹ a ma huẹn e Kristi kpaegbe, ọni rhie ma wẹẹ amuẹtinyan ọghe uwa i mwẹ esa; ọ vbe rhie ma wẹẹ, te uwa ye fuẹn vbe uwu orukhọ ọghe uwa.
18 Ọni vbe rhie ma wẹẹ, nọ ne emwa ni gu e Kristi rrọọ vbe akugbe ni wulo nẹ,* ọghe iran wa vbe fo nẹ vberriọ.
19 Adeghẹ agbọn na ọkpa ẹre ọ na mwẹ esa ighẹ emwi ne ima rhunmwuda ẹre ya e Kristi yi, ọni rhie ma wẹẹ, vbe uwu emwa hia nọ khẹke na gha gbe ọsọre na, ma ẹre ọ ghi wa khọọ sẹ.
20 Sokpan, ẹmwata nọ rrọọ ọre wẹẹ, a huẹn e Kristi kpaegbe vbe idin; vbe uwu emwa hia ni he wulo,* irẹn ọre ọmọ nokaro.
21 Ugbẹnvbe a miẹn wẹẹ, obọ orhunmwu ọkpa ẹre uwu la rre, erriọ ẹre arhiọkpaegbe ọghe emwa ni wulo khian vbe la obọ orhunmwu ọkpa rre.
22 Zẹvbe na miẹn wẹẹ, Adam ẹre ọ si ẹre ne emwa hia na wulo, emwa hia gha vbe khian enọ rrọọ rhunmwuda e Kristi.
23 Ọkade ọkade ẹre a khian ya huẹn dọmwadẹ ọghẹe kpaegbe: E Kristi ne ọmọ nokaro ẹre ọ ka rhiọ kpaegbe, iyeke ọni, iran ni re ọghe Kristi ghi do rhiọ kpaegbe vbe ẹghẹ ne Kristi gha ya rre.
24 Iyeke ọni, ufomwẹ ghi do rre, vbe Kristi gha mu Arriọba nii ye obọ Osanobua nẹ, nọ re Osa ọghẹe kevbe Erhae. Ẹghẹ nii, ọ ghi ya arriọba hia, ọdakha hia kevbe ẹtin hia khian ena ho bẹkun.
25 Rhunmwuda, ẹ i mwẹ ọ ma khaevbisẹ zẹvbe ọba, a te miẹn wẹẹ Osanobua viọ eghian ọghẹe hia ye ototọ owẹ ọre.
26 Oghian nokiekie na khian wabọ ọre rua ọre uwu.
27 Osanobua “viọ emwi hia ye ototọ owẹ ọre.” Sokpan, nọ na wẹẹ ‘a viọ emwi hia ye ototọ ẹre,’ ọ dewarorua wẹẹ, a ma ka Ọmwa nii nọ viọ emwi hia ye ototọ ẹre ba ẹre.
28 Sokpan, a gha ghi viọ emwi hia ye ototọ ẹre nẹ, Ọmọ ghi vbe rhiegbe ẹre ye ototọ Osanobua nọ viọ emwi hia ye ototọ irẹn, ẹghẹ nii, Osanobua ghi wa gha khaevbisẹ yan emwa hia.*
29 Vbe ẹ i re erriọ, iran ni dinmwiamẹ ne iran mieke na gha re emwa ni wulo ghi vbo? Vbe iran khian ghi khian hẹ? Adeghẹ a i khian zẹdẹ huẹn emwa ni wulo kpaegbe, vbọ ghi zẹ ne iran na dinmwiamẹ vbe odẹ vberriọ?
30 Vbọ ghi zẹ ne ima na rhie uhunmwu mwẹ atata obọ vbe ẹghẹ hia?
31 Ẹdẹgbegbe ẹre I ya miẹn egbe mwẹ vbe agbanmwẹ idin. Ẹmwata ẹre ọna wa khin, te ọ wa vbe yevbe uhiomwẹ ne I ya uwa ne etẹn mwẹ hio, rhunmwuda ne uwa na re eguọmwadia Enọyaẹnmwa e Kristi Jesu.
32 Adeghẹ I gu avbe aranmwẹ ni khọọ gbinna vbe Ẹfisọs vbene emwa ọvbehe vbe ye,* de ere nọ rrọọ mẹ? Adeghẹ ẹmwata gele nọ wẹẹ, a i khian huẹn emwa ni wulo kpaegbe, ọni nọ wẹẹ, ma ghi vbe deba emwa gha kha wẹẹ, “Wa gia gha re, na gha da, rhunmwuda, akhuẹ, ma hia wulo kua.”
33 Wa ghẹ gi ọmwa rhọkpa mu uwa rẹrẹ.* Emwa dan na gu mu obọ ẹre ọ mu uyinmwẹ esi rhia.
34 Wa dọlegbe rhie ẹwaẹn ye uhunmwu, ne uwa gha ru emwi nọ maan; wa ghẹ gha ru orukhọ. Eso vbe uwu uwa i mwẹ irẹnmwi ọghe Osanobua. Te I ta ẹmwẹ na ma uwa, ne ekhue egbe uwa mieke na gha mu uwa.
35 Vbọrhirhighayehẹ, ọmwa sẹtin gha nọ wẹẹ: “Vbe a khian ya huẹn emwa ni wulo kpaegbe hẹ? De aro egbe ne iran khian gha mwẹ vbe a gha huẹn iran kpaegbe?”
36 Wẹ ne akpa vbe abobo! U gha kọ emwiokọ, ẹ i re te emwiokọ nii ka wu nẹ ọ ke zọọ ra?
37 U gha khian kọ emwiokọ, ọre wit nọ ra emwiokọ ọvbehe, ikpẹ kẹkan ẹre u khian rhie ye otọ, ẹ i re emwi ne emwiokọ nii gha khian vbe ọ gha waan nẹ, ẹre u khian kọ;
38 sokpan, Osanobua ẹre ọ rhie egbe ne emwiokọ nii, zẹvbe nọ gualọe yi, ọ ghi rhie egbe ọghe dọmwadẹ emwiokọ ne iran.
39 Efun egbe ughughan ẹre a miẹn, a miẹn ọghe emwa nagbọn, a miẹn ọghe ẹmila, a miẹn ọghe ahianmwẹ, a vbe miẹn ọghe ehẹn.
40 Egbe ọghe emwa ni rre ẹrinmwi rrọọ, egbe ọghe emwa ni rre agbọn na vbe rrọọ; egbe ọghe emwa ni rre ẹrinmwi mwẹ ose ọghẹe, vbene egbe ọghe emwa ni rre agbọn na, na vbe mwẹ ose ọghẹe.
41 Ovẹn mwẹ ose ọghẹe, uki, ose ọvbehe, avbe orhọnmwẹ, ose ọvbehe, uhiẹn, ose ọghe avbe orhọnmwẹ vbe lughaẹn ne egbe.
42 Erriọ vbe ye ne arhiọkpaegbe ọghe emwa ni wulo. A gha mu iran ye otọ vbe iran gha wu, iran ghi kẹkua; a gha ghi huẹn iran kpaegbe, iran ghi do gha mwẹ egbe nẹi sẹtin kẹkẹ.
43 A gha mu iran ye otọ, iran ghi ye khọrhiọn khọrhiọn; a gha ghi huẹn iran kpaegbe, iran ghi ye mose mose. A gha mu iran ye otọ, iran ghi ye vburriẹ vburriẹ; a gha ghi huẹn iran kpaegbe, iran ghi do gha mwẹ ẹtin.
44 Egbe ọghe agbọn na ẹre iran mwẹ vbe a gha mu iran ye otọ; sokpan, a gha huẹn iran kpaegbe, iran ghi do gha mwẹ egbe ọghe orhiọn. Adeghẹ a miẹn egbe ọghe agbọn na, ọni rhie ma wẹẹ, a vbe miẹn egbe ọghe orhiọn.
45 Rhunmwuda, Ebe Nọhuanrẹn khare wẹẹ: “Okpia nokaro nọ re Adam keghi khian ọmwa* nọ rrọọ.” Sokpan, Adam nokiekie keghi khian orhiọn nọ rhie arrọọ ne ọmwa.
46 Vbọrhirhighayehẹ, ẹ i re egbe ọghe orhiọn ẹre ọ karo. Sokpan, ọghe agbọn na ẹre a ka miẹn, iyeke ọni, a ghi do miẹn ọghe orhiọn.
47 Agbọn na ẹre okpia nokaro ke rre, ekẹn ẹre a ya yi ẹre; okpia nogieva nọ rrọọ na ke ẹrinmwi rre.
48 Emwa ni rre agbọn na, na ya ekẹn yi, keghi yevbe ọmwa nii na ya ekẹn yi; iran ni rre ẹrinmwi keghi yevbe ọmwa nii nọ ke ẹrinmwi rre.
49 Zẹvbe ne ima te ka gha yevbe ọmwa nii na ya ekẹn yi, erriọ ẹre ima khian vbe gha yevbe ọmwa nii nọ ke ẹrinmwi rre.
50 Sokpan, ne I ta ọna ma uwa etẹn, efun kevbe esagiẹn i sẹtin la Arriọba Osanobua; emwi nọ sẹtin kẹkẹ i khian vbe sẹtin rri emwi nẹi sẹtin kẹkẹ vbe ukhu.
51 Gu mwẹ ta oro ọkpa ma uwa: Ma hia i khian wa wulo,* sokpan, a gha fi ima hia werriẹ;
52 udomwurri ẹre ọna khian ya sunu, vbe ibuanro ọkpa, vbe a gha kpee okpe nokiekie. Okpe nii gha ghi tu, a ghi huẹn emwa ni wulo kpaegbe, iran ghi gha mwẹ egbe nẹi sẹtin kẹkẹ, a ghi vbe fi ima werriẹ.
53 Emwi nọ sẹtin kẹkẹ ghi mu emwi nẹi sẹtin kẹkẹ yọ, emwi nọ vbe sẹtin wu ghi mu emwi nẹi sẹtin wu yọ.
54 Sokpan, vbe ẹghẹ ne emwi nọ sẹtin kẹkẹ gha ya mu emwi nẹi sẹtin kẹkẹ yọ, emwi nọ sẹtin wu na vbe mu emwi nẹi sẹtin wu yọ, ẹmwẹ na gbẹn yotọ ghi do sẹ, nọ khare wẹẹ: “A mi uwu re nẹ vbe etẹbitẹ.”
55 “Uwu, akhọnmiotọ ruẹ vbo? Uwu, obi ruẹ vbo?”
56 Obi nọ si uwu ọre orukhọ, emwi nọ ya orukhọ zẹ ẹtin ọre Uhi.*
57 Sokpan, a kpọnmwẹ Osanobua, nọ na lekpa Enọyaẹnmwa e Jesu Kristi rhie akhọnmiotọ ne ima!
58 Nọnaghiyerriọ etẹn mwẹ ni ghaan, wa mudia gbain, ne uwa ghẹ beghe. Wa gha mwẹ iwinna nibun ne uwa ru ne Enọyaẹnmwa vbe ẹghẹ hia; wa ghi yerre wẹẹ, ẹsọn ne uwa miẹn ne Enọyaẹnmwa, ẹ i re te uwa miẹn ọnrẹn kua kẹkan.
Avbe Futnot
^ A vbe tie ẹre Pita.
^ Ra “eso vbiẹ nẹ vbe uwu.”
^ Ra “ni vbiẹre vbe uwu.”
^ Ra “emwa hia ni vbiẹre vbe uwu.”
^ Vbe Grik, “Osanobua ghi gha re emwi hia ne emwa hia.”
^ Ọ sẹtin vbe gha re, “ba ẹmwẹ emwi ne emwa ọvbehe nikẹre vbe rhunmwuda ẹre gu iran gbinna.”
^ Ọ sẹtin vbe gha re, “Wa ghẹ mu egbe uwa rẹrẹ.”
^ Ra “e soul.”
^ Ra “vbiẹ vbe uwu.”
^ Ra “Uhi ẹre ọ rhie ẹtin ne orukhọ.”
