Iwinna Avbe Ukọ 15:1-41

KPẸRE

Ẹmwẹ arhuẹ si imuanẹmwẹ vbe Antiọk (1, 2)
Ẹmwẹ na mu gie eniwanrẹn ni rre Jerusalẹm (3-5)
Ediọn kevbe avbe ukọ gba do iko (6-21)
Ebe ne ẹbu nọ su gbẹn rre (22-29)
- Gban egbe ne esagiẹn (28, 29)
Ebe na gbẹn rhie igiọdu ne etẹn ni rre iko ughughan (30-35)
E Pọl vbe Banabas wannọ egbe (36-41)

15 Ikpia eso keghi ke Judia rre, iran na suẹn gha ma etẹn emwi, iran na wẹẹ: “Vbe ẹ i re te uwa rhuẹ re zẹvbe nọ gua ilele ọghe Mozis ro, wa i khian sẹtin miẹn fan.” ² Ẹmwẹ na keghi si ẹzọ kevbe imuanẹmwẹ ye uwu ẹkpo iran kevbe Pọl vbe Banabas, ẹre a na ghi we ne Pọl vbe Banabas kevbe emwa ọvbehe eso bu avbe ukọ kevbe ediọn ni rre Jerusalẹm, ne iran ya mu ẹmwẹ* na ma iran. ³ Vbe etẹn ni rre iko ghi su iran sẹ odẹ nẹ, ikpia nii na ghi mu uhunmwu daa e Fonisia kevbe Sameria, iran na gha tama etẹn vbene emwa ọghe agbẹnvbo ọvbehe ya do khian emwa iyayi hẹ; ọna keghi ya etẹn hia gha sọyẹnmwẹ. ⁴ Iran ghi sẹ e Jerusalẹm, etẹn ni rre iko vba, avbe ukọ kevbe ediọn keghi rhan obọ miẹn iran yi; iran ni rre na, keghi tama iran emwi nibun ne Osanobua loo iran ya ru. ⁵ Sokpan, eso vbe uwu iran ni ka gha rre otu ọghe avbe Farisi, ni ghi do khian emwa iyayi, keghi kpaegbe vbe aga ne iran tota yi, iran na wẹẹ: “Te ọ khẹke na rhuẹ iran, a ghi vbe tama iran, ne iran gha lele Uhi e Mozis.” ⁶ Ẹre avbe ukọ kevbe ediọn na ghi si egbe koko, ne iran ghee ẹmwẹ na ghee. ⁷ Vbe iran ghi zẹ tae yo tae rre,* e Pita keghi kpaegbe, ọ na tama iran wẹẹ: “Iho mwa kevbe etẹn mwẹ, wa rẹnrẹn wẹẹ, vbe ẹghẹ nọ kpẹẹ fua, mẹ ẹre Osanobua zẹ vbe uwu ẹbu uwa, ne emwa ọghe agbẹnvbo ọvbehe la unu mwẹ họn iyẹn nọ maan, ne iran vbe yayi. ⁸ Osanobua nọ rẹn ekhọe, keghi rhie ẹre ma wẹẹ irẹn miẹn iran yi, lekpa nọ na rhie orhiọn nọhuanrẹn ne iran, zẹvbe nọ vbe rhie ne ima. ⁹ Ọ keghi rhie ẹre ma wẹẹ aro ọkpa ẹre ọ ya ghee ima vbe iran, ọ na kpe ekhọe iran huan rhunmwuda amuẹtinyan ne iran mwẹ. ¹⁰ Nọnaghiyerriọ, vbọzẹ ne uwa na danmwẹ Osanobua ghee, ne uwa na kun ihẹ nọkhua ne avbe erhuanegbe na? Ihẹ ne avbe erha ima odede, ra ima tobọ ima ma sẹtin mu! ¹¹ Sokpan, emwi ne ima yayi ọre wẹẹ, ẹse ne kpataki* ne Enọyaẹnmwa e Jesu ru ne ima, ẹre ọ zẹe ighẹ ima miẹn fan, zẹvbe ne iran vbe ye.” ¹² Ẹre emwa hia ni gbẹbu ye evba na ghi gbẹdọ, iran na suẹn gha danmwehọ e Banabas vbe Pọl zẹvbe ne iran ya gha na iyẹn emwi ọyunnuan ughughan ne Osanobua loo iran ya ru, vbe uwu ẹbu emwa ọghe agbẹnvbo ọvbehe. ¹³ Iran ghi guan fo nẹ, e Jems na ghi kha wẹẹ: “Iho mwa kevbe etẹn mwẹ, wa danmwehọ mwẹ. ¹⁴ Zẹvbe ne ima họẹn ban, e Simiọn wa tae ta isi ẹre, vbene Osanobua ya suẹn gha mwẹ ẹghẹ ne ivbi agbẹnvbo ọvbehe, nọ mieke na zẹ emwa ni khian gha ya eni ẹnrẹn wan egbe vbe uwu ẹbu iran. ¹⁵ Ọna wa vbe gua ẹmwẹ ne avbe Akhasẹ tae ro, nọ khare wẹẹ: ¹⁶ ‘Vbe iyeke avbe emwi na hia, I gha werriegbe rre, ne I do mu ibọkpọ* ọghe Devid nọ te de kpaegbe; I ghi dọlọ ehe nọ te rhia yi, I ghi werriegbe bọe, ¹⁷ ne emwa ni ghi dekẹe mieke na gha ya ekhọe hia gualọ e Jehova,* ke iran kevbe emwa ọghe agbẹnvbo hia, ni ghi ya eni mwẹ wan egbe nẹ. Mẹ ne Jehova* ẹre ọ tae, mẹ ẹre ọ vbe ru avbe emwi na, ¹⁸ ne I tae yotọ ke ẹghẹ nọ kpẹẹ re gha dee.’ ¹⁹ Vbe ọghe imẹ, I ma hoo na zẹdẹ kpokpo emwa ọghe agbẹnvbo ọvbehe ni do khian eguọmwadia Osanobua. ²⁰ Emwi na gha wa ru, ọre na gbẹn ebe gie iran, na tama iran wẹẹ, ne iran gban egbe ne emwi ke emwi nọ ghi ginna ẹbọ nẹ, alama oghẹ,* aranmwẹ na khiẹn ọnrẹn ẹho gbua,* kevbe esagiẹn. ²¹ Ke ẹghẹ nọ kpẹẹ fua gha dee, ẹre emwa ke ya ẹmwẹ ne Mozis gbẹnnẹ kporhu vbe ẹvbo ughughan, rhunmwuda, ẹdẹ ikẹtin hia ẹre a ya tie ẹmwẹ nọ gbẹnnẹ ladian vbe sinagọg.”* ²² Ẹre avbe ukọ kevbe ediọn, kevbe etẹn hia ni rre iko na ghi tae wẹẹ, iran gha zẹ ikpia eso vbe uwu ẹbu iran, ne iran gie iran lele Pọl vbe Banabas gha rrie Antiọk; ẹre iran na gie Judas na ghaa tie ẹre Basabas, kẹ kevbe Sailas. Iran na rre usun emwa ni ghaa mu asanikaro vbe uwu ẹbu etẹn. ²³ Iran keghi gbẹn ebe ne iran, ne iran rhie gha khian. Emwi ne iran gbẹn na khin: “Ma ne avbe ukọ kevbe ediọn ni re etiẹn uwa, ẹre ọ gbẹn ebe na gie uwa ne etẹn ima nẹi re Ivbi e Ju, ni rre Antiọk, e Siria kevbe Silisia: Ma tuẹ uwa hia oo! ²⁴ Ma họn wẹẹ, emwa eso vbe uwu ẹbu ima bu uwa gha dee, do gha ta ẹmwẹ eso ya kpokpo uwa orhiọn, iran na gha hoo ne iran bibi uwa odẹ, sokpan, ẹ i re ima ẹre ọ gie iran. ²⁵ Rhunmwuda ọni, ma na ghi koko zẹ ọre vbe iro wẹẹ, ma gha zẹ ikpia eso bu uwa gha dee, ke iran kevbe Banabas vbe Pọl ne etẹn ima ni ghaan. ²⁶ Ena ọre ikpia ni rhie uhunmwu iran mwẹ atata obọ, ba ẹmwẹ eni Enọyaẹnmwa e Jesu Kristi. ²⁷ Ẹre ima na ghi gie Judas vbe Sailas bu uwa gha dee, ne iran mieke na ya unu iran ta ẹmwẹ nọ vbe rre ebe na ma uwa. ²⁸ Rhunmwuda, orhiọn nọhuanrẹn kevbe ima tobọ ima ma hoo na werriegbe kun ihẹ ọvbehe ne uwa, vbọ gberra avbe emwi ni wa ru ekpataki na: ²⁹ Wa gha gban egbe ne emwi na ya zọ ese gie ẹbọ, esagiẹn, aranmwẹ na khiẹn ọnrẹn ẹho gbua,* kevbe alama oghẹ.* Adeghẹ uwa na fẹko lele avbe ẹmwẹ na, agbọn gha maan uwa. Te ọ gha fu uwa egbe oo!”* ³⁰ Iran ghi gbe okhian ẹwerẹ ne iran nẹ, iran na kpa gha rrie Antiọk; iran ghi sẹ evba, iran na si etẹn hia koko, iran na rhie ebe nii ne iran. ³¹ Iran ghi tie ẹre nẹ, ẹko iran keghi vuọn ne oghọghọ ye ẹmwẹ igiọdu na. ³² Ugbẹnvbe a miẹn wẹẹ, akhasẹ ẹre Judas vbe Sailas vbe gha khin, iran keghi gu etẹn nii guan ẹsẹse, iran na rhie igiọdu ne iran, orhiọn na ghi la iran iwu. ³³ Iran ghi gbe ẹghẹ eso nẹ vba, etẹn ni rre evba keghi gbe okhian ẹwerẹ ne iran. Ẹre iran na ghi werriegbe bu emwa ni gie iran uhunmwu. ³⁴ * —— ³⁵ Sokpan, e Pọl vbe Banabas na ye gha rre Antiọk, iran na gha ya ẹmwẹ ọghe Jehova* kporhu iyẹn nọ maan ma emwa, iran na vbe gha ma emwa emwi, ke iran kevbe etẹn nibun ọvbehe. ³⁶ Ikpẹdẹ eso ghi gberra nẹ, e Pọl keghi tama e Banabas wẹẹ: “Gi ima werriegbe* mu otuẹ gie etẹn ni rre dọmwadẹ ẹvbo ne ima na ya ẹmwẹ ọghe Jehova* kporhu, ne ima vbe ya ghee vbene iran vbe ye hẹ.” ³⁷ E Banabas na wa gha hoo ne iran rhie Jọn na vbe tie ẹre Mak lele egbe. ³⁸ Sokpan, e Pọl ma hoo ne iran rhie ẹre lele egbe, ugbẹnvbe a miẹn wẹẹ, ọ kpa sẹ iran rae vbe Pamfilia, ọ ma vbe deba iran ru iwinna ne iran ru. ³⁹ Ohu keghi mu iran eva, ẹre ẹzọ na sa kua, iran na ghi wannọ egbe; e Banabas keghi rhie Mak lele egbe, iran na la okọ gha rrie Saiprọs. ⁴⁰ E Pọl keghi zẹ e Sailas, iran na kpa; ọni ọre vbe etẹn ghi mu ẹmwẹ e Pọl ye Jehova* obọ nẹ, iran na rinmwiaẹn nọ ru ẹse ne kpataki* nẹẹn. ⁴¹ E Pọl keghi mu otuẹ la e Siria kevbe Silisia, ọ na gha rhie igiọdu ne etẹn ni rre iko.