Iwinna Avbe Ukọ 22:1-30
22 “Iho mwa, etẹn mwẹ kevbe avbe erha mwẹ, wa danmwehọ ẹmwẹ ne I khian ta ya zẹ enunu mwẹ.”
2 Ugbẹnvbe iran ghi họn wẹẹ, ọ zẹ e Hibru ma iran, iran hia na werriegbe gbẹdọ, ọ na ghi kha wẹẹ:
3 “Ovbi e Ju ẹre I khin, e Tasọs nọ rre Silisia ẹre a na biẹ mwẹ, sokpan, ẹvbo na ẹre I na yo owebe; e Gameliẹl ẹre ọ ma mwẹ emwi. Te a wa ma mwẹ emwi ẹsẹse, ne I mieke na gha lele Uhi ọghe avbe erha ima odede zẹvbe nọ wa ya rre otọ zẹẹ. Te imẹ wa rhiegbe ye ugamwẹ Osanobua ẹsẹsẹmwẹse, zẹvbe ne uwa ni rre emwa vbe ẹdẹnẹrẹ vbe ye.
4 Te I wa gha zẹ emwa ni rre Odẹ na kpokpo, erriọ ẹre I vbe ya gha mwẹ obọ vbe uwu ọghe iran; I gha ghi munọ ikpia vbe ikhuo, I ghi ya hẹ iran ku eghan.
5 Ogie ohẹn kevbe avbe ediọn ni rre ẹvbo gha sẹtin sẹ osẹ ye ẹmwẹ ne I ta na. Iran ẹre ọ gbẹn ebe rhie mẹ, ne I rhie gie avbe ọkaolotu Ivbi e Ju ni rre Damaskọs, ẹre I na gha khian, ne I ya ya ọgiọrọ* rrọ emwa iyayi ni rre evba, ne I hẹ iran gha die Jerusalẹm, na do rri iran oya.
6 “Sokpan, vbe ẹghẹ ne I ya gha rre odẹ, vbe I ghi sikẹ e Damaskọs nẹ vbọ ghi bu ẹghẹ ogiavan, ukpa nọ kakabọ baa keghi ke ẹrinmwi wan yan mwẹ vbe udomwurri,
7 I keghi de gbe otọ, I na họn urhu ọkpa nọ tama mwẹ wẹẹ: ‘Sọl, Sọl, vbọzẹ ne u na zẹ mwẹ kpokpo?’
8 I na ghi wanniẹn ọnrẹn wẹẹ: ‘Enọyaẹnmwa, de ọmwa ne u khin?’ Ọ na tama mwẹ wẹẹ: ‘Mẹ ne Jesu ne Ovbi e Nazarẹt, ne u zẹ kpokpo nọ.’
9 Emwa ne ima gba gha rre evba bẹghe ukpa nọ wan yan mwẹ, sokpan, iran ma họn urhu ọmwa nọ ghaa gu mwẹ guan.
10 I na ghi nọ rẹn wẹẹ: ‘Enọyaẹnmwa, de emwi nọ khẹke ne I ru nian?’ Enọyaẹnmwa na ghi tama mwẹ wẹẹ: ‘Kpaegbe, ne u la e Damaskọs; u gha sẹ evba, a gha tama ruẹ emwi hia na mwamwa yotọ khẹ ruẹ ne u gha ru.’
11 Ugbẹnvbe a miẹn wẹẹ, I ma gha bẹghe emwi rhọkpa, rhunmwuda awanwan ọghe ukpa nọ rhie yọ mwẹ aro, emwa ne ima gba khian ẹre ọ ghi rhie mwẹ obọ sẹ e Damaskọs.
12 “Ọ ghaa mwẹ okpia ọkpa na tie ẹre Ananaias, ọmwa nọ mwẹ imuohan Osanobua kevbe nọ lele Uhi, ẹre okpia na ghaa khin, erriọ ẹre Ivbi e Ju hia ni rre ẹvbo nii vbe ya gha ta ẹmwẹ ọnrẹn ẹse.
13 Ọ na ghi bu mwẹ gha dee. Ọ na mudia ke mwẹ, ọ na tama mwẹ wẹẹ: ‘E Sọl ne ọtẹn mwẹ, dọlegbe gha bẹghe!’ Vbe I ghi tọn aro mu vbe ọwara ọkpa nii, I na bẹghe ẹre.
14 Ọ na wẹẹ: ‘Osanobua ọghe avbe erha ima odede zẹ ruẹ nẹ, ne u do rẹn iho ọghẹe, ne u vbe do bẹghe ọmwa ata nii, ne u vbe họn ẹmwẹ nọ ke unu ẹnrẹn ladian,
15 rhunmwuda, osẹ ọghẹe ẹre u khian gha khin, te u khian gha tama emwa hia, emwi hia ne aro ruẹ sẹ kevbe ne ehọ ruẹ họẹn.
16 Nọnaghiyerriọ, vbua ye khẹ? Kpaegbe, ne u dinmwiamẹ, ne u gha datie eni ẹnrẹn, ne u mieke na kpe orukhọ ruẹ kua.’
17 “Vbe I ghi na erhunmwu vbe ọgua Osa vbe ẹdẹ ọkpa, vbe I ghi werriegbe sẹ e Jerusalẹm nẹ, I keghi miẹn umian.
18 Vbe umian nii, I keghi bẹghe Enọyaẹnmwa, ọ na tama mwẹ wẹẹ: ‘Zẹgiẹ kpa hin e Jerusalẹm rre, rhunmwuda, iran i khian rhan obọ miẹn ọnrẹn yi ighẹ ẹmwẹ ne u ya wewe vbekpa mwẹ.’
19 I na wẹẹ: ‘Enọyaẹnmwa, iran tobọ iran rẹnrẹn wẹẹ, ẹghẹ hia ẹre I ya gha yo e sinagọg* ughughan, I ghi munọ emwa ni ya ruẹ yi, I ghi hẹ iran ku eghan, I ghi vbe gbe iran asan;
20 I vbe gha rre evba vbe ẹghẹ na ya gbe Stivin ne osẹ ruẹ rua, mẹ ẹre ọ vbe rhie obọ yọ we na gbẹ ẹre rua, mẹ ẹre ọ vbe gha gbaroghe ẹwu na yọ ke odukhunmwu ọghe iran ni gbe ẹre rua.’
21 Ọrheyerriọ, ọ na tama mwẹ wẹẹ: ‘Gha khian, rhunmwuda, I gha gie ruẹ gha rrie avbe agbẹnvbo ni rre ehe nọ rree.’”
22 Iran na wa gbehọkotọ gha danmwehọ ọre, do fi ẹghẹ nọ ya ta ẹmwẹ nọ tae na. Ẹre iran na ghi tọn urhu mu, iran na wẹẹ: “Te a wa gbe ọmwa vbenian rua, ọ ma zẹdẹ khẹke nọ gha rre agbọn hiehie!”
23 Iran na gha go, iran na gha filo ẹwu ne iran yọ ke odukhunmwu kua, iran na gha zẹ ebubẹ ghee odukhunmwu.
24 Rhunmwuda ọni, ọkaokuo nii na we na mu e Pọl gha die ehe ne ivbiyokuo dia, ọ na we ne iran ya asan bolo ẹre egbe rua, nọ mieke na ta emwi nọ ru, ne irẹn mieke na rẹn evbọzẹe ne iran na wa go yan rẹn vbenian.
25 Sokpan, iran ghi niẹn e Pọl rua nẹ, ne iran gbe ẹre asan, e Pọl na ghi nọ ọkaolotu ivbiyokuo nọ mudia vba wẹẹ: “Zẹvbe ne uhi khare, ọ khẹke ne uwa gbe Ovbi e Rom* asan ra, vbene a ma na he bu ohiẹn gbe ẹre* ra?”
26 Ugbẹnvbe ọkaolotu ivbiyokuo nii ghi họn ẹmwẹ na, ọ na bu ọkaokuo nii gha khian, ọ na ya ta ẹmwẹ na ma rẹn, ọ na wẹẹ: “Vbua khian ghi ru nian? Rhunmwuda, Ovbi e Rom ẹre okpia na khin.”
27 Ẹre ọkaokuo nii na ghi bu e Pọl gha khian, ọ na ya nọ rẹn wẹẹ: “Tama mwẹ, Ovbi e Rom ẹre u khin ra?” E Pọl na wẹẹ: “Ẹẹn.”
28 Ọkaokuo nii na wanniẹn ọnrẹn wẹẹ: “I ke do sẹtin khian ọmọ otọ vbe Rom, igho ọrhẹnrhẹn ẹre I zẹ.” E Pọl na ghi wẹẹ: “Ovbi eseserese ẹre imẹ wa khin.”
29 Vbe ọwara ọkpa nii, emwa ni khian te gbe ẹre asan, ne iran vbe nọ rẹn ọta keghi sikẹ iyeke; afianma na suẹn gha fian ọkaokuo nii vbe ọ ghi rẹn wẹẹ, Ovbi e Rom ẹre Pọl khin kevbe wẹẹ, irẹn vbe ya ọgiọrọ rrọ ọre.
30 Rhunmwuda nọ na gha hoo nọ rẹn evbọzẹe ne Ivbi e Ju na ba e Pọl ifiẹzọ, ẹdẹ ghi gbe, ọ na fan e Pọl vbe eghan, ọ na we ne avbe ọkaolotu ohẹn kevbe emwa hia ni rre iko e Sanhẹdrin* si egbe koko. Ẹre ọ na we ne iran rhie Pọl gha dee, iran na do rhie ẹre mudia ye odaro iran.
Avbe Futnot
^ Ra “eghan.”
^ Ọni ọre, owa ugamwẹ ọghe Ivbi e Ju.
^ Ra “ọmwa nọ re ọmọ otọ vbe Rom.”
^ Ra “bu ohiẹn ọnrẹn.”
^ Ọni ọre, ekọtu ọghe Ivbi e Ju.
