Iwinna Avbe Ukọ 26:1-32
26 Agripa keghi tama e Pọl wẹẹ: “A rhie ẹghẹ nuẹn nian, ne u ya zẹ enunu ruẹ.” E Pọl keghi niẹn obọ ẹre ladian, ọ na suẹn gha zẹ enunu ẹnrẹn, ọ na wẹẹ:
2 “Agripa ne Ọba, I wa ghọghọ wẹẹ, I mudia ye odaro ruẹ vbe ẹrẹna, ne I do zẹ enunu mwẹ vbekpa ẹzọ hia ne Ivbi e Ju gu mwẹ gui,
3 katekate ne u na wa kakabọ rẹn ilele hia ọghe Ivbi e Ju kevbe ẹzọ ughughan ne iran gui. Rhunmwuda ọni, I gha rinmwian ruẹ, ne u gbehọkotọ danmwehọ mwẹ.
4 “Ivbi e Ju hia rẹn vbene I ya ru emwi hẹ vbe uwu ẹbu emwa* mwẹ ke egbe ọvbokhan gha dee, kevbe vbene I ya ru emwi hẹ vbe Jerusalẹm.
5 Ọ kpẹẹ re ne iran rẹn mwẹ. Adeghẹ iran hoo ne iran gele sẹ osẹ, iran gha tama ruẹ wẹẹ, e Farisi ẹre I ka gha khin. Ma hia rẹnrẹn wẹẹ, otu na i ya ẹmwẹ ugamwẹ ku, iran ẹre ọ ghi muẹn yan uhunmwu sẹ.
6 Sokpan, emwi na gu bu ohiẹn mwẹ na, ọre rhunmwuda ne I na ya aro ye emwi ne Osanobua yan ma avbe erha mwa odede;
7 eyan na ẹre uniẹn iweva (12) ọghe emwa ima vbe ya aro yi wẹẹ Osanobua gha mu sẹ, zẹvbe ne iran ya ya egbe hia rhie ugamwẹ nọhuanrẹn nẹẹn vbe asọn vbe avan. Umogun, emwi ne ima ya aro yi na, ẹre Ivbi e Ju tie mwẹ ẹzọ ba.
8 “Vbọsiẹ ne eso vbe uwu uwa ma na sẹtin yayi wẹẹ, Osanobua huẹn emwa ni wulo kpaegbe?
9 Mẹ tobọ mwẹ te ka gha roro ẹre wẹẹ, te ọ khẹke ne I ru emwi hia vbene ẹtin mwẹ sẹ, ne I ya gbodan ghee Jesu ne Ovbi e Nazarẹt.
10 Ọna ọre emwi ne I ru vbe Jerusalẹm zẹẹ. I keghi khui emwa ni huanrẹn nibun ye eghan; avbe ọkaolotu ohẹn ẹre ọ rhie asẹ mẹ ne I ya ru vberriọ. A gha we na gbe iran rua, mẹ ghi vbe kue yọ.
11 Ẹghẹ hia ẹre I ya gha rri iran oya vbe sinagọg* ughughan, I na gha hia ne I kpikpi iran, ne iran siẹn iyayi ọghe iran; ohu iran mu mwẹ sẹrriọ wẹẹ, I na gha yo ẹvbo ughughan, I na ya gha kpokpo iran vbe odọ.
12 “Ọna ẹre I rhunmwuda ẹre gha rrie Damaskọs, vbe avbe ọkaolotu ohẹn ghi rhie asẹ kevbe ẹtin mẹ nẹ.
13 Umogun, vbe I ghi rre odẹ vbe I rrie Damaskọs vbe ẹghẹ ogiavan, ukpa nọ baa sẹ ovẹn keghi ke ẹrinmwi wan yan mwẹ kevbe emwa ni lele mwẹ khian.
14 Ma hia keghi dele gbe otọ, ẹre I na họn urhu ọkpa nọ zẹ e Hibru ma mwẹ wẹẹ: ‘Sọl, Sọl, vbọzẹ ne u na zẹ mwẹ kpokpo? Te uwẹ wa ya agbọn lọghọ egbuẹ, ne u na ya owẹ kinmwi ukpokpo nọ mwẹ ukpẹ.’*
15 I na ghi nọ rẹn wẹẹ: ‘Enọyaẹnmwa, de ọmwa ne u khin?’ Enọyaẹnmwa na tama mwẹ wẹẹ: ‘Mẹ ne Jesu ne u zẹ kpokpo nọ.
16 Sokpan, kpaegbe, ne u ya owẹ ruẹ mudia. Emwi ne I gu rhiegbe ma ruẹ, ọre ne I zẹ ruẹ zẹvbe ọguọmwadia mwẹ kevbe osẹ mwẹ, u ghi gha tama emwa, emwi ne aro ruẹ he sẹ vbekpa mwẹ, kevbe ne I khian vbe mu ma ruẹ vbe odaro.
17 I gha miẹn ruẹ fan vbe obọ Ivbi e Ju, kevbe obọ ivbi agbẹnvbo ọvbehe ne I khian gie ruẹ bu.
18 U ghi ya rhan iran aro, u ghi viọ iran ladian hin uwu ebiebi rre gha die ukpa, u ghi fannọ iran vbe obọ ẹtin ne Setan ya mu iran gba, iran ghi bu Osanobua gha dee, na mieke na ya orukhọ ọghe iran bọ iran, iran ghi vbe miẹn afiangbe nọ khian sẹ emwa na kpe huan obọ, rhunmwuda ne iran na mu ẹtin yan mwẹ.’
19 “Ọba Agripa, vbe Jesu ghi gu mwẹ guan vbe umian nọ ke ẹrinmwi rre ne I miẹn na, I ma he ẹmwẹ ye ọre obọ,
20 sokpan, I keghi suẹn gha kporhu, e Damaskọs ẹre I na suẹn. Iyeke ọni, I na ya kporhu ma iran ni rre Jerusalẹm. Erriọ ẹre I vbe ya kporhu la otọ e Judia hia, I na vbe bu emwa ni rre agbẹnvbo ọvbehe, I na gha kporhu ma iran, ne iran ro iro fi uyinmwẹ werriẹ, ne iran bu Osanobua gha dee, ne iran vbe gha ru emwi nọ rhie ẹre ma wẹẹ iran gele fi werriẹ nẹ.
21 Ọna ẹre ọ si ẹre ne Ivbi e Ju na mu mwẹ vbe uwu ọgua Osa, iran na gha hoo ne iran gbe mwẹ ruan.
22 Sokpan, rhunmwuda ne Osanobua na mudia mẹ, ẹre ọ zẹe ighẹ I ye rrọọ do sẹ ẹdẹnẹrẹ, ne I na ye sẹtin kporhu ma emwa hia, ke ni kpọlọ, ke ni kanmwa. Emwi ne I kporhu ẹre ma gberra emwi ne avbe Akhasẹ kevbe Mozis tae wẹẹ ọ gha sunu—
23 ọni nọ wẹẹ, e Kristi gha rri oya, kevbe wẹẹ, zẹvbe ọmwa okaro nọ khian rhiọ kpaegbe vbe idin, ọ gha ya ẹmwẹ ukpa wewe ma Ivbi e Ju, kevbe agbẹnvbo ọvbehe.”
24 Zẹvbe ne Pọl ya zẹ enunu ẹnrẹn, e Fẹstọs na wa van muẹn, ọ na wẹẹ: “E Pọl, I ma yayi wẹẹ ẹrherhe ruẹ kue ye gba! U tie ebe gbe, ọni ẹre ọ khian ghi si emwẹmwẹ yọ ruẹ egbe na!”
25 Sokpan, e Pọl keghi kha wẹẹ: “E Fẹstọs ne Evbavba, ẹrherhe mwẹ wa gba, sokpan, ẹmwata ne uhunmwu ẹmwẹ ẹre I ta, I wa rẹn emwi ne I ta.
26 Ọba ne imẹ gu guan sin rẹn otọ emwi hia ne I ta, ọni ẹre ọ si ẹre ne I na si agbada vbe unu guan na; mẹ rẹnrẹn wẹẹ, ọkpa i rrọọ nọ ma rẹn vbe avbe emwi na hia, rhunmwuda, erhọkpa na ru vbe ẹkhokho i rrọọ.
27 Agripa ne Ọba, wẹ ya emwi ne avbe Akhasẹ tae yi ra? I rẹnrẹn ighẹ u yayi.”
28 Sokpan, Agripa keghi tama e Pọl wẹẹ: “Vbe nẹi khian ghi kpẹẹ gbe, u gha fi mwẹ ekhọe werriẹ, ne I khian Ovbi Otu e Kristi.”
29 Ẹre Pọl na ghi kha wẹẹ: “Ọre ovbi ẹghẹ kherhe ẹre ọ rhie re, ra ẹghẹ nọ taẹn nọ, erhunmwu ne I na gie Osanobua ọre wẹẹ, ne u do gha ye vbene imẹ ye, ke uwẹ kevbe emwa hia ne I danmwehọ mwẹ vbe ẹrẹna. Sokpan, I ma ya ọna kha wẹẹ, na vbe ya ọgiọrọ rrọ uwa oo!”
30 Ẹre ọba na ghi kpaegbe, ke irẹn kevbe gọvinọ kevbe Bẹnis, kevbe emwa ni tota ke iran.
31 Vbe iran khian ghi ladian, iran na gha gu egbe guan vbe odẹ, iran na wẹẹ: “Okpia na ma ru emwi rhọkpa na gha gbe ẹre rua ba, ra na khian gu muẹn ye eghan.”
32 Agripa na ghi tama e Fẹstọs wẹẹ: “Vbe ẹ i re nọ na kẹ okpia na ya kha wẹẹ, irẹn hoo na mu ẹzọ irẹn gha rrie ọghe Siza, a gha te wa faẹn fua.”
Avbe Futnot
^ Ra “ivbi ẹvbo.”
^ Ọni ọre, owa ugamwẹ ọghe Ivbi e Ju.
^ Ọni ọre, ukpokpo nọ mwẹ ukpẹ ne sioro na ya su aranmwẹ.
