Arhie Maan Na Mu Ma E Jọn 21:1-27
21 I keghi vbe bẹghe ẹrinmwi ọgbọn kevbe agbọn ọgbọn; a ho ẹrinmwi nẹdẹ kevbe agbọn nẹdẹ bẹkun nẹ, okun i ghi vbe rrọọ.
2 I na vbe bẹghe ẹvbo nọhuanrẹn nii, nọ re Jerusalẹm Ọghe Ọgbọn, vbe ọ ke ehe ne Osanobua ye vbe ẹrinmwi tuorre dee, a keghi mu ẹre egbe zẹvbe ovbiọha na mu ẹre egbe khẹ ọdọ ẹre.
3 Ẹre I na ghi họn urhu nọ la nọ guan ke ẹkete nii rre wẹẹ: “Ghee oo! Ibọkpọ ọghe Osanobua rre ehe ne emwa nagbọn ye, Osanobua gha gu iran dia, iran ghi vbe gha re emwa rẹn. Osanobua tobọre ghi gu iran gha rrọọ.
4 Ọ gha khiẹn ameve hia hin aro iran rre. Uwu i khian ghi gha rrọọ, ra akhiẹ ra eve ra obalọ. A ho emwi nẹdẹ hia bẹkun nẹ.”
5 Ọmwa nii nọ tota ye ẹkete nii keghi kha wẹẹ: “Ghee oo! I ya emwi hia khian ọghe ọgbọn.” Ọ na vbe kha wẹẹ: “Gbẹnnẹ ẹmwẹ na yotọ, rhunmwuda, ẹmwẹ ẹmwata nọ gia mu ẹtin yan ẹre nọ.”
6 Ọ na vbe tama mwẹ wẹẹ: “Ọ sunu nẹ oo! Mẹ ọre Alfa kevbe Omega,* omuhẹn kevbe ufomwẹ. Ọmwaikọmwa ne ovbamẹ gbe, I gha sa amẹ arrọọ nọ lẹẹ ladian vbe okuta nẹẹn vbe ọghe ọhẹ.
7 Ọmwaikọmwa nọ khọnmiotọ, emwi na hia gha sẹ ọre obọ, mẹ ghi gha re Osanobua ẹre, ọ ghi vbe gha re ovbi mwẹ.
8 Sokpan, nọ ne avbe avbiẹrẹ, emwa nẹi mwẹ amuẹtinyan, iran ni yin uyinmwẹ osọnnọ nọ ma maan, avbe izigha, iran ni gbe alama oghẹ,* iran ni gu orhiọn dan mu obọ, iran ni ga ẹbọ kevbe avbe ọhọnhoghe hia, emwi na khian ya ha iran osa ọre odighi ne erhẹn vbe sọlfọ* na giẹn. Emwi na ya ọna kha, ọre uwu nogieva.”
9 Ọkpa vbe odibosa ihinrọn nii ni da ọkpan ihinrọn yi, ni vuọn ne orueghe ihinrọn nokiekie kegha dee, ọ na tama mwẹ wẹẹ: “Larre, I gha ma ruẹ ovbiọha nọ re amwẹ Oteghe Ohuan nii.”
10 Ẹre ọ na ghi ya ẹtin orhiọn nọhuanrẹn mu mwẹ gha rrie oke nọkhua nọ kakabọ yo, ọ na ma mwẹ ẹvbo nọhuanrẹn nii, nọ re Jerusalẹm, vbe ọ tuorre ke ehe ne Osanobua ye vbe ẹrinmwi dee,
11 uyi Osanobua vbe gha gu ẹre. Ọ na gha fi wainwain vbe na ghee okuta ighobioye nọ kakabọ hin usi, ọ na yevbe okuta e giaspa nọ fi wainwain vbe na ghee kristal.
12 Ọ kegha mwẹ ekẹn nọkhua na gbe lẹga ẹre, nọ kakabọ yo, ọ kegha mwẹ urho iweva (12), odibosa iweva (12) na gha rre evba, ọkpọkpa vbe uwu iran na gha rre dọmwadẹ onurho nii, a keghi gbẹnnẹ eni uniẹn iweva (12) ọghe Ivbi Izrẹl ye avbe urho nii.
13 Urho eha kegha rre odẹ ekẹn,* eha na gha rre odẹ okuọ,* eha na gha rre odẹ ahọ,* eha na vbe gha rre odẹ orrie.*
14 Ekẹn na gbe lẹga ẹvbo nii kegha mwẹ okuta iweva (12) na ya gbe ẹyotọ, a keghi vbe gbẹnnẹ eni iweva (12) ọghe ukọ iweva (12) ọghe Oteghe Ohuan nii lele iran.
15 Ọmwa nii nọ ghaa gu mwẹ guan keghi da erhan ọghe igoru yi zẹvbe emwi na ya mwa emwi, nọ mieke na yae mwa ẹvbo nii kevbe urho ni rrọọ, kẹ kevbe ekẹn na gbe lẹga ẹre.
16 Ẹvbo nii kegha re umwọnmwẹ vbe igienenẹ, vbene ọ ya kakabọ yo, erriọ ẹre ọ vbe ya vbẹ. Ọ keghi ya erhan nii mwa ẹvbo nii, ọ na gha re ibiriki ọkpa i rrọọ vbe iyenẹ yan iyisẹn eha nọ ya yan arriaisẹn ọkpa (1,379);* utanmwẹ ọnrẹn, uvbẹmwẹ ọnrẹn kevbe uyomwẹ ọnrẹn keghi re umwọnmwẹ.
17 Ọ na vbe mwa ekẹn na gbe lẹga ẹre, ọ kegha re ibata igbe nọ ya yan iyisẹn eva (210);* vbene emwa nagbọn ya mwa emwi, erriọ ẹre odibosa nii vbe ya mwa rẹn.
18 E giaspa ẹre a ya gbe ekẹn lẹga ẹre, igoru na ma ya emwi gua, nọ ye sẹnrẹn vbe na ghee ughegbe, ẹre a ya ru emwi hia ni rre ẹvbo nii.
19 Okuta ighobioye ughughan ẹre a ya gbe ẹyotọ ekẹn na gbe lẹga ẹvbo nii: e giaspa ẹre a ya ru ẹyotọ nokaro, nogieva na gha re safaia, nogieha na gha re kalsidoni, nogienẹ na gha re ẹmirad,
20 nogie isẹn na gha re sadoniks, nogie ehan na gha re sadiọs, nogie ihinrọn na gha re krisolait, nogie erẹnrẹn na gha re bẹril, nogie ihinrin na gha re topaz, nogie igbe na gha re krisoprez, nogie owọrọ na gha re haiyasint, nogie iweva na gha re amẹtist.
21 E pẹl* iweva (12) ẹre a ya ru urho iweva (12) ni rrọọ; e pẹl* ọkpọkpa ẹre a ya ru edọmwadẹ urho ni rrọọ. Igoru na ma gua, nọ ye sẹnrẹn vbe na ghee ughegbe, ẹre a ya so ukpo na wa mobọ la vbe ẹvbo nii.
22 I ma bẹghe ọgua Osa vbe ẹvbo nii, rhunmwuda, e Jehova* ne Osanobua ne Oghodua kevbe Oteghe Ohuan nii, ọre ọgua Osa nọ rrọọ.
23 Esa i rrọọ ne ovẹn gha ya yunmwu yan ẹvbo nii, ra ne uki gha ya baa yan rẹn, rhunmwuda, uyi ọghe Osanobua ẹre ọ ghaa re awanwan nọ rre ẹvbo nii; Oteghe Ohuan nii, ẹre ọ vbe gha re ukpa nọ rrọọ.
24 Ukpa nọ rrọọ, ẹre avbe agbẹnvbo khian ya gha bẹghe odẹ ne iran la khian, avbe ọba ni rre uhunmwu otagbọn ghi mu uyi nọ rre iran egbe gha die uwu ẹvbo nii.
25 Ẹghẹ hia ẹre a khian ya gha kie avbe urho ni rre ẹvbo nii yotọ, rhunmwuda, a i khian ghi gha miẹn asọn, avan ọkpa ẹre a khian ghi gha miẹn.
26 Iran gha mu uyi kevbe ọghọ nọ rre agbẹnvbo egbe gha die ẹvbo nii.
27 Sokpan, emwi ke emwi nọ ghi mwẹ awua nẹ, kevbe ọmwaikọmwa nọ ghi ru emwi osọnnọ nẹ kevbe nọ ru ero i khian sẹtin la ẹvbo nii; emwa na gbẹnnẹ eni iran ye ebe na kiri ọghe arrọọ ọghe Oteghe Ohuan nii ọkpa, ẹre ọ khian laọ.
Avbe Futnot
^ Ra “Mẹ ọre A kevbe Z.” Alfa ọre ikpẹmwẹ nokaro vbe abidi ọghe Ivbi e Grik. Omega na gha re nokiekie.
^ Ọni ọre, okuta nọ kakabọ tọn vbe na ghee erhẹn.
^ Ọni ọre, east.
^ Ọni ọre, north.
^ Ọni ọre, south.
^ Ọni ọre, west.
^ Ra “stediọm 12,000.” Ọni ọre, odẹ ekilomita 2,220. E stediọm ọkpa ọre emita 185 (ibata 606.95). Ya ghee Apẹndis B14.
^ Ra “ekiubit 144.” Ọni ọre, odẹ emita 64. Ya ghee Apẹndis B14.
^ Te ọ yevbe ivie nọ fi wainwain, emwi ighobioye vbe nọ. Uwu ughughọn ọghe egilẹ na miẹn vbe okun ra ẹzẹ ẹre a na miẹn ọnrẹn.
^ Te ọ yevbe ivie nọ fi wainwain, emwi ighobioye vbe nọ. Uwu ughughọn ọghe egilẹ na miẹn vbe okun ra ẹzẹ ẹre a na miẹn ọnrẹn.
^ Ya ghee Apẹndis A5.
