Ebe Luk 1:1-80

KPẸRE

Emwi na gbẹn gie Tiofilọs (1-4)
E Gebriẹl tae yotọ wẹẹ, a gha biẹ e Jọn ne Ọ Dinmwi Ọmwa Ye Amẹ (5-25)
E Gebriẹl tae yotọ wẹẹ, a gha biẹ e Jesu (26-38)
E Meri mu otuẹ gie Ẹlizabẹt (39-45)
E Meri keghi rhie urhomwẹ gie Jehova (46-56)
A biẹ e Jọn, a vbe he ẹre eni (57-66)
Ẹmwẹ akhasẹ ne Zẹkaraia tae (67-80)

1 Emwa nibun hia nẹ, ne iran gualọ otọ emwi hia ni gele sunu, ne iran vbe gbẹnnẹ ọnrẹn yotọ; ekhọe hia ẹre ima vbe ya ya avbe emwi na yi. ² Erriọ ẹre iran ne aro iran sẹ ọre vbe ẹghẹ omuhẹn, ni vbe gha re ukọ ni ya iyẹn nii wewe, wa vbe ya tae ma ima. ³ E Tiofilọs ne okpọmwa, mẹ tobọ imẹ na vbe ta mu olọ yan rẹn wẹẹ, I gha gbẹn emwi hia guẹ ọkade ọkade, rhunmwuda, I gualọ otọ emwi hia nẹ, zẹvbe ne iran wa ya sunu zẹẹ, ke omuhẹn ọnrẹn gha dee, ⁴ ne u mieke na rẹn wẹẹ, emwi hia na ya ẹmwẹ ne unu ma ruẹ ẹre, ẹmwata ne uhunmwu ẹmwẹ nọ. ⁵ Vbe ẹghẹ ọghe Hẹrọd* ne ọba ọghe Judia, ọ ghaa mwẹ ohẹn ọkpa na tie ẹre Zẹkaraia, nọ ghaa rre usun avbe ohẹn ni rre oka ọghe Abaija. Eni ọvbokhan rẹn kegha re Ẹlizabẹt; ọkpa vbe usun emọ ikhuo na biẹ vbe uniẹn ọghe Erọn ẹre ghaa nọ. ⁶ Emwa esi ẹre iran eva ghaa khin vbe odaro Osanobua; te iran wa gha ya ekhọe hia lele uhi e Jehova* hia kevbe ilele ọghẹe. ⁷ Sokpan, iran ma gha mwẹ ọmọ, rhunmwuda, agan ẹre Ẹlizabẹt ghaa khin; yevbesọni, iran eva vbe khian ọmaẹn nẹ. ⁸ Vbe ọ ghi winna iwinna ohẹn na we ne oka ọghe iran gha ru vbe odaro Osanobua, ⁹ ọ keghi la owa ọghe Jehova,* nọ ya giẹn eturari vbọ ghi sẹ ọre egbe, zẹvbe ne avbe ohẹn ka ru ẹre ke ẹghẹ gha dee. ¹⁰ Vbe uwu ẹghẹ na ya gha giẹn eturari nii, emwa hia ni gbẹbu ye orere kegha na erhunmwu. ¹¹ Odibo e Jehova* keghi rhiegbe ma rẹn, ọ na mudia ye obọ erha ọmwa ọghe ogiukpo na na giẹn eturari. ¹² Sokpan, e Zẹkaraia ghi wa miẹn ọnrẹn, udu ẹre na kpan fi ẹko, ohan na gha muẹn. ¹³ Vbọrhirhighayehẹ, odibosa nii keghi tama rẹn wẹẹ: “Ghẹ gi ohan mu ruẹ, e Zẹkaraia, rhunmwuda, Osanobua họn utumwẹ* ruẹ nẹ; nọnaghiyerriọ, ọvbokhan ruẹ ighẹ Ẹlizabẹt gha biẹ ọmokpia nuẹn, u ghi gha tie ẹre Jọn. ¹⁴ Te u khian gha sọyẹnmwẹ, ẹko ruẹ ghi vbe vuọn ne oghọghọ, ẹko gha vbe rhiẹnrhiẹn emwa nibun vbe a gha biẹ ọre, ¹⁵ rhunmwuda, okpọmwa khian gha nọ vbe odaro e Jehova.* Sokpan, we nẹ ghẹ ya ayọn kaan unu, ra emwi ke emwi na ghi wọn nẹ, nọ gbe ọmwa; te ọ khian vuọn ne orhiọn nọhuanrẹn, uhiẹn a ke biẹ ọre.* ¹⁶ Ọ gha ru iyobọ ne Ivbi Izrẹl nibun ya werriegbe bu e Jehova* ne Osa ọghe iran gha dee. ¹⁷ Deba ọni, ọ gha ke odaro ne Osanobua, ọ ghi gha mwẹ orhiọn kevbe ẹtin ne Ẹlaija ghaa mwẹ, ọ ghi fi ekhọe ọghe avbe erha emọ werriẹ khian ọghe ibiẹka,* ọ ghi vbe ya emwa ni zẹ utun vbe ehọ, khian emwa ni ghi ya ẹwaẹn ru emwi, zẹvbe ne emwa ata vbe ye, ne iran mieke na gha re emwa ni mu egbe yotọ khẹ e Jehova.”* ¹⁸ E Zẹkaraia keghi tama odibosa nii wẹẹ: “Vbia khian ya rẹn hẹ wẹẹ, ọna gha gele sunu? Mẹ khian ọmaẹn nẹ, ọvbokhan mwẹ vbe kpẹẹ agbọn nẹ.” ¹⁹ Odibosa nii na wanniẹn ọnrẹn wẹẹ: “Mẹ ọre Gebriẹl, odaro Osanobua ẹre I mudia yi vbe ẹghẹ hia; te a gie mwẹ ne I do gu ruẹ guan, ne I vbe do na iyẹn nọ maan na ma ruẹ. ²⁰ Sokpan, u gha khian odin, u i khian ghi gha guan, ọ te ya sẹ ẹdẹ ne ẹdẹrriọ ne avbe emwi na khian ya sunu, rhunmwuda, u ma ya ẹmwẹ mwẹ yi; ẹmwẹ na miẹn wẹẹ, ọ gha sunu vbe ẹghẹ na wa mwamwa yọ zẹẹ.” ²¹ Vbe ẹghẹ na kha na, emwa mudia khẹ e Zẹkaraia, ọ na wa kpa iran odin wẹẹ, te ọ khian ghi kpẹẹ gbe vbe uwu ọgua Osa. ²² Ọ ghi ladian, ọ ma sẹtin gu iran guan, iran na ghi la evba rẹn wẹẹ, emwi nọ miẹn vbe uwu ọgua Osa sẹ ọre.* Obọ ẹre ọ ghi ya gha gu iran guan, ugbẹnvbe ọ ma ghi sẹtin gha guan. ²³ Ẹghẹ nọ ya winna iwinna nọhuanrẹn* vbe uwu ọgua Osa ghi gba nẹ, ọ na gha rrie owa. ²⁴ Ikpẹdẹ eso ghi gberra nẹ, Ẹlizabẹt ne ọvbokhan rẹn na suẹn gha hanmwa; Ẹlizabẹt ma kpa hin owa rre vbe ọwara uki isẹn, ọ na wẹẹ: ²⁵ “Ọna ọre emwi ne Jehova* ru mẹ vbe ẹghẹ na. Ọ ye mwẹ rre, ọ na do ban ukpọn ozan hin mwẹ ẹkun rre vbe uwu ẹbu emwa nagbọn.” ²⁶ Ẹko Ẹlizabẹt ghi rre uki ehan, Osanobua keghi gie odibo ẹre ighẹ e Gebriẹl gha rrie ẹvbo ọkpa na tie ẹre Nazarẹt vbe Galili. ²⁷ Ọ na gie ẹre bu ọvbokhan uvbi ọkpa nọ ma rẹn okpia, na ya ne okpia ọkpa na tie ẹre Josẹf, nọ ke igiowa ọghe Devid rre; eni uvbi nii ọre Meri. ²⁸ Odibosa nii ghi bu ẹre rre, ọ na tama rẹn wẹẹ: “I tuẹre, wẹ ne ẹmwẹ ọnrẹn yẹẹ Osanobua ẹsẹse; e Jehova* gu ruẹ rrọọ.” ²⁹ Ẹmwẹ ne odibosa nii tae kegha kpokpo ẹre vbe orhiọn, ọ na gha hoo nọ rẹn aro otuẹ nọ tuẹ irẹn re na. ³⁰ Ẹre odibosa nii na ghi tama rẹn wẹẹ: “Ghẹ mu ohan, Meri, rhunmwuda, ẹmwẹ ruẹ wa yẹẹ Osanobua. ³¹ Ghee ẹre! u gha hanmwa, u ghi biẹ ọmokpia; u ghi gha tie ẹre Jesu. ³² Okpọmwa khian gha nọ, a ghi gha tie ẹre Ovbi Enọ Yo Sẹ; Osanobua ne Jehova* gha mu ẹkete ọghe erhae ighẹ e Devid nẹẹn, ³³ ọ ghi rri Ọba yan owa e Jekọb vbe ẹdẹdẹmwẹdẹ, Arriọba ọghẹe i khian sẹ ufomwẹ.” ³⁴ Sokpan, e Meri keghi tama odibosa nii wẹẹ: “Vbe ọna khian ya sẹtin sunu hẹ, ugbẹnvbe a miẹn wẹẹ, I ma he rẹn okpia?” ³⁵ Odibosa nii na ghi wanniẹn ọnrẹn wẹẹ: “Orhiọn nọhuanrẹn gha tuorre yan ruẹ, ẹtin ọghe Enọ Yo Sẹ ghi hin yan ruẹ. Rhunmwuda ọni, a ghi gha tie ọmọ nii, nọhuanrẹn, kevbe Ovbi Osanobua. ³⁶ Vbe ghee oo! Ẹlizabẹt ne ọtuẹn hanmwa ọmokpia, agharhemiẹn wẹẹ ọ khian ọmaẹn nẹ, okhuo ne agbọn tie ẹre agan, uki ehan ẹre ẹko ẹre ghi ye na; ³⁷ rhunmwuda, emwi ọkpa i rrọọ ne Osanobua ta, nẹi khian sẹtin ru.”* ³⁸ E Meri na ghi kha wẹẹ: “Ghee mwẹ! ọviẹn e Jehova* ẹre I khin! Gi ẹre sunu daa mwẹ zẹvbe ne u tae.” Ẹre odibosa nii na ghi kpa sẹrae. ³⁹ Vbe iyeke ọni, e Meri keghi zẹgiẹ kpa gha rrie ẹvbo ọkpa nọ rre uhunmwu oke vbe otọ e Juda, ⁴⁰ ọ ghi la owa e Zẹkaraia, ọ na tuẹ Ẹlizabẹt. ⁴¹ Sokpan, Ẹlizabẹt ghi wa họn otuẹ ọghe Meri, ọmọ nọ rre ọre ẹko na wa gua kpa; Ẹlizabẹt na wa vuọn ne orhiọn nọhuanrẹn, ⁴² ọ na ghi datu wẹẹ: “Ọmwa na fiangbe ẹre u khin vbe uwu ẹbu ikhuo, te a vbe fiangbe ọmọ nọ rrọ ruẹ ẹko! ⁴³ Vbe a ghi na miẹn hẹ wẹẹ, a mu uyi na yọ mwẹ egbe, ne iye Enọyaẹnmwẹ na bu mwẹ gha dee? ⁴⁴ Ghee ẹre! vbe I ghi wa họn vbe u tuọ mwẹ, ọmọ nọ rrọ mwẹ ẹko na wa gua kpa, ọ na gha ghọghọ. ⁴⁵ Oghọghọ vbe nọ ne okhuo nii nọ yayi, rhunmwuda, emwi hia ne Jehova* tama rẹn, gha wa sunu zẹvbe na wa ya tae zẹẹ.” ⁴⁶ E Meri na ghi kha wẹẹ: “I* rhie uyi gie Jehova,* ⁴⁷ te orhiọn mwẹ wa vuọn ne oghọghọ, rhunmwuda Osanobua ne Ọmiọnmwafan mwẹ, ⁴⁸ nọ na ye mwẹ rre, mẹ ne ọviẹn ọnrẹn na ma te ka yọ. Ke ẹghẹ na kpa, ọmwa nọ ghọghọ ẹre orre hia khian ghi ka mwẹ yi, ⁴⁹ rhunmwuda ẹse nọkhua, ne Ọmwa nii nọ re olẹtin ru mẹ. Eni ẹnrẹn keghi re nọhuanrẹn; ⁵⁰ ke orre ya fi orre, irẹn keghi tohan emwa ni mu ohan rẹn. ⁵¹ Ọ ya ekuabọ ne olọ ọghẹe winna iwinna ọyunnuan; ọ zagha iran kua ighẹ emwa ni tọn egbe mu vbe emwamwa ne iran mwamwa vbe ekhọe. ⁵² Ọ silo iran ni wegbe tuorre vbe ẹkete, ọ na tọn emwa ni ma sẹ emwi rhọkpa mu; ⁵³ ọ ya emwi nọ maan vuọn ẹko emwa ne ohanmwẹ gbe, ọ na gi emwa ni fe, fi abọ gha rrie. ⁵⁴ Ọ rre do ru iyobọ ne Izrẹl ne ọguọmwadia ẹre, ọ ma mianmian itohan ọghẹe, ⁵⁵ nọ wẹẹ irẹn khian mwẹ ghee Ebraham kevbe ivbi ẹre* vbe etẹbitẹ. Ọna ọre emwi nọ tama avbe erha ima odede.” ⁵⁶ Odẹ uki eha, ẹre Meri gbe vbe ọghe Ẹlizabẹt, iyeke ọni, ọ na gha rrie owa. ⁵⁷ Uki ghi sẹ Ẹlizabẹt nẹ, ọ na ghi biẹ ọmokpia. ⁵⁸ Emwa ni rre ẹdogbo ọghẹe kevbe ẹgbẹe ọre, ghi họn vbekpa itohan nọkhua ne Jehova* mwẹ daa ẹre, iran na gu ẹre gha ghọghọ. ⁵⁹ Ọ ghi rre ikpẹdẹ nogie erẹnrẹn vba, iran na rre do rhuẹ ọmọ nii; iran khian te he ẹre eni erhae ighẹ e Zẹkaraia. ⁶⁰ Sokpan, iyẹe na wanniẹn wẹẹ: “Ẹo! e Jọn ẹre a khian gha tie ẹre.” ⁶¹ Ẹre iran na ghi tama rẹn wẹẹ: “Ọmwa rhọkpa i rre ẹgbẹe ruẹ, nọ khuẹnniẹn eni na.” ⁶² Iran na ghi ya obọ zedu ya nọ erhae, emwi nọ hoo na gha tie ọmọ nii re. ⁶³ Ọ na ghi we ne iran mu emwi gie irẹn ne irẹn gbẹn emwi yọ, ọ na ghi gbẹn ọnrẹn yọ wẹẹ: “E Jọn ọre eni ẹnrẹn.” Ẹre iran hia na yan unu ruan. ⁶⁴ Vbe ọwara ọkpa nii, ọ keghi dọlegbe suẹn gha guan,* aranmwẹ ọnrẹn na suẹn gha tọn mu, ọ na gha rhie urhomwẹ ne Osanobua. ⁶⁵ Orrirri keghi gbe ku emwa hia ni rre ẹdogbo ọghe iran, iran na suẹn gha ta emwi na hia khian vbe ẹvbo e Judia hia nọ rre uhunmwu oke. ⁶⁶ Emwa hia ni họn, kegha rria ẹmwẹ na vbe ekhọe iran wẹẹ: “De aro ọmwa ne ọmọ na khian gha khin?” Rhunmwuda, e Jehova* keghi rhie obọ ye ọre iyeke. ⁶⁷ E Zẹkaraia ne erhae keghi vuọn ne orhiọn nọhuanrẹn, ọ na suẹn gha ta ẹmwẹ akhasẹ, ọ na wẹẹ: ⁶⁸ “Urhomwẹ nọ ne Jehova* ne Osa ọghe Izrẹl, rhunmwuda, ọ ye emwa rẹn rre, ọ na vbe miẹn iran fan. ⁶⁹ Ọ gi igho ọghe imiẹnfan* zọọ ladian ne ima, vbe igiowa ọghe Devid ne ọguọmwadia ẹre, ⁷⁰ zẹvbe nọ la unu avbe akhasẹ ọghẹe nẹdẹ ni huanrẹn ya tae yotọ, ⁷¹ nọ na wẹẹ, irẹn gha miẹn ima fan vbe obọ eghian ima, kevbe obọ emwa hia ni khẹko ima; ⁷² ọ wẹẹ irẹn gha tohan ima rhunmwuda avbe erha ima odede, ọ gha vbe ye ẹre rre ighẹ ile ọghẹe nọhuanrẹn, ⁷³ ile nọ gu Ebraham ne erha mwa odede ta, ⁷⁴ ọ ghi kie ẹkpotọ ne ima ya gha rhie ugamwẹ nọhuanrẹn nẹẹn, vbene ohan i na mu ima, vbe ọ gha ghi miẹn ima fan nẹ, vbe obọ eghian ima. ⁷⁵ Ma ghi gha ya ẹkoata gae, ma ghi vbe gha lele uhi ọghẹe vbe ẹdagbọn ima hia. ⁷⁶ Sokpan, nọ ne uwẹ ne ovbi mwẹ, te a khian gha tie ruẹ akhasẹ ọghe Enọ Yo Sẹ, rhunmwuda, te u khian ke odaro ne Jehova,* ne u ya dọlọ avbe odẹ ọghẹe yi, ⁷⁷ ne u gi emwa ọghẹe rẹn wẹẹ, a gha miẹn iran fan, lekpa na gha na ya orukhọ ọghe iran bọ iran, ⁷⁸ rhunmwuda itohan nọkhua ọghe Osanobua mwa. Rhunmwuda itohan na, awanwan ọghe ẹdẹ gha ke odukhunmwu wan yan ima, ⁷⁹ ne ukpa mieke na baa yan emwa ni tota ye uwu ebiebi, kevbe ikinkin ne aghọnghọn ọghe uwu ye, nọ vbe dia ukpowẹ ọghe ima lele odẹ ọghe ọfunmwegbe.” ⁸⁰ Ọmọ nii keghi waan rre, orhiọn nọhuanrẹn na vbe yae wegbe, ọ na gha rre uwu ato rhinrin, ọ te do sẹ ẹdẹ nọ rhiegbe ẹre ladian, ne Ivbi Izrẹl bẹghe ẹre.