Ebe Luk 12:1-59
-
Eyist ọghe avbe Farisi (1-3)
-
Wa gha mu ohan Osanobua, ẹ i re emwa nagbọn (4-7)
-
Na miẹn kue wẹẹ, a rẹn e Kristi (8-12)
-
Erre ọghe okpia ọkpa nọ fe, nọ re akpa vbe abobo (13-21)
-
Ghẹ ghi si osi (22-34)
-
Oghẹn nekherhe (32)
-
-
Na gha bodẹ (35-40)
-
Ọguọmwadia nọ gia mu ẹtin yan kevbe nẹi gia mu ẹtin yan (41-48)
-
Jesu ma rhie ọfunmwegbe rre, sokpan, te ọ rre do si iwannegbe (49-53)
-
Ọ khẹke na rẹn otọ vbene ẹghẹ khare (54-56)
-
Na gha ru adọlọ (57-59)
12 Vbe ẹghẹ na kha na, ẹbu emwa ni re arriaisẹn nibun keghi si egbe koko, iran bun sẹrriọ wẹẹ, iran na gha ya owẹ rhilo egbe. Jesu na ka suẹn gha gu erhuanegbe ẹre guan, ọ na wẹẹ: “Wa gha begbe vbe egbe eyist ọghe avbe Farisi, nọ re uyinmwẹ okeke.
2 Sokpan, emwi ọkpa i rrọọ na fẹko rhie lẹre, nai khian wee rua vbe okiekie; emwi ẹkhokho rhọkpa i vbe rrọọ, nai khian rẹn vbe okiekie.
3 Nọnaghiyerriọ, emwi ne uwa rhirhi ta vbe uwu ebiebi, a gha họẹn vbe idagbo,* emwi ne uwa fẹko ta vbe ughugha ọghe uwa, a gha ke uhunmwu owa wewe ẹre.
4 Yevbesọni, I tama uwa nian avbe ọse mwẹ, wa ghẹ gha mu ohan emwa ni sẹtin gbe ikinnegbe, nẹi sẹtin ru emwi rhọkpa gberra ọni.
5 Sokpan, I gha gie ọmwa nọ khẹke ne uwa gha mu ohan rẹn ma uwa: Wa gha mu ohan Ọmwa nii, nọ mwẹ asẹ na ya fi ọmwa fi e Gẹhẹna* vbe ọ gha gbe ọmwa rua nẹ. Vbene ẹmwata, I tama uwa nian, wa gha mu ohan Ọmwa nii.
6 Agiẹghẹ eva nọ ma sẹ emwi,* ẹre a ya dẹ ahianmwẹ ne giẹrẹ isẹn na tie ẹre sparro, ra ẹ i re erriọ? Ọrheyerriọ, ọkpa i rrọọ vbe uwu iran ne Osanobua mianmian.*
7 Uhiẹn, ọ rẹn inu eto nọ rre uwa uhunmwu. Wa ghẹ gi ohan mu uwa; wa hin usi sẹ e sparro nibun.
8 “I tama uwa nian wẹẹ, ọmwaikọmwa nọ tae sirra emwa wẹẹ, irẹn rẹn mwẹ, Ovbi ọmwa gha vbe sirra avbe odibo Osanobua tae wẹẹ, irẹn rẹn ọnrẹn.
9 Sokpan, ọmwaikọmwa nọ siẹn mwẹ sirra emwa, Ovbi ọmwa gha vbe siẹn ọnrẹn sirra avbe odibo Osanobua.
10 Ọmwaikọmwa nọ ta ẹmwẹ dan vbekpa Ovbi ọmwa, a gha yabọe, sokpan, ọmwaikọmwa nọ fi unu gie orhiọn nọhuanrẹn, a i khian yabọe.
11 Iran gha viọ uwa gha die odaro iko ọgbakha,* odaro avbe ukọ arriọba, kevbe odaro emwa ni rre ukpo ọdakha, wa ghẹ si osi ba ẹmwẹ vbene uwa khian ya zẹ enunu uwa, ra ẹmwẹ ne uwa gha ta,
12 rhunmwuda, orhiọn nọhuanrẹn gha ma uwa ẹmwẹ nọ khẹke ne uwa ta vbe ẹghẹ nii zẹẹ.”
13 Ẹre orhunmwu ọkpa vbe uwu ẹbu vba na tama rẹn wẹẹ: “Ọmamwaemwi, tama ọtẹn mwẹ nokpia nọ ghae ukhu nọ khẹke nọ sẹ mwẹ obọ mẹ.”
14 Jesu na ghi nọ rẹn wẹẹ: “Okpia na, de ọmwa nọ zẹ mwẹ, ne I gha re ọbuohiẹn ọghe uwa eva, ra nọ ghae ukhu ne uwa?”
15 Jesu na ghi tama iran wẹẹ: “Wa ghẹ fi aro rua, sokpan, wa gha begbe vbe egbe arovbẹmwẹ nọ rhirhi gha khin, rhunmwuda, ọ gha khọnrẹn ne ọmwa gha mwẹ emwi ọrhẹnrhẹn, emwi nọ mwẹ i sẹtin rhie arrọọ nẹẹn.”
16 Ẹre ọ na ghi zẹ erre ọkpa ma iran wẹẹ: “Otọ ọghe okpia ọkpa nọ fe, na wa maan emwiokọ ẹsẹse.
17 Ẹre nene okpia na suẹn gha gu egbe ẹre zẹ iro wẹẹ, ‘De emwi ne I khian ghi ru nian, ugbẹnvbe a miẹn wẹẹ, I i mwẹ eke ne I khian si emwiokọ mwẹ koko yi?’
18 Ọ na ghi kha wẹẹ, ‘Emwi ne I khian ru na khin: I gha guọghọ avbe aza mwẹ sotọ, I ghi bọlọ eni kpọlọ sẹ ne I ka mwẹ, I ghi silo emwiokọ mwẹ hia kevbe emwi ne I mwẹ hia yọ.
19 I ghi tama egbe mwẹ wẹẹ: “U si emwi ọrhẹnrhẹn ni maan koko ye aza nẹ, nọ gha mu ruẹ la ukpo nibun; si orhiọn koko, ne u gha re, ne u gha da, ne u vbe gha sọyẹnmwẹ egbe.”’
20 Sokpan, Osanobua keghi tama rẹn wẹẹ, ‘Wẹ ne akpa vbe abobo, vbe asọn na, a gha miẹn ruẹ uhunmwu.* De ọmwa nọ khian ghi yan okhuan ne u khuaẹn yotọ?’
21 Erriọ ẹre ọ khian gha ye ne ọmwa nii nọ si ẹfe koko ne egbe ẹre, sokpan, nọ ma fe vbe odaro Osanobua.”
22 Ọ na ghi tama erhuanegbe ẹre wẹẹ: “Ọni ẹre ọ si ẹre ne I na tama uwa nian wẹẹ, ne uwa ghẹ ghi si osi ye ẹmwẹ ẹdagbọn uwa, vbe nọ dekaẹn ẹmwẹ evba gha re, ra ukpọn ne uwa gha yọ ye egbe.
23 Rhunmwuda, arrọọ* hin usi sẹ evbare, egbe vbe hin usi sẹ ukpọn.
24 Wa gbarokotọ ghee avbe ahianmwẹ na tie ẹre revin: Iran i kọ, iran i rhọ; iran i mwẹ erru ra aza na si emwi koko yi; ọrheyerriọ, te Osanobua ye koko iran. Wa ma kakabọ hin usi sẹ avbe ahianmwẹ ra?
25 Gha nọ vbe uwu uwa, nọ gha si osi sẹrriọ wẹẹ, ọ ghi sẹtin rhie ekiubit* ọkpa ba ẹdagbọn rẹn?
26 Ugbẹnvbe a miẹn wẹẹ, wa i khian sẹtin ru emwi kherhe vberriọ, vbe uwa ghi si osi ye emwi nikẹre ba?
27 Wa gbarokotọ ghee vbene avbe obobo ya waan hẹ: Iran i miẹn ẹsọn, iran i vbe do ukpọn, sokpan, I tama uwa nian wẹẹ, vbene Sọlomọn ghi vbe hin usi sẹ, ukpọn nọ ghaa yọ ma mose vba ọkpa vbe uwu avbe obobo na.
28 Adeghẹ erriọ ẹre Osanobua ya yọ avbe irunmwu ni rre oha ukpọn, irunmwu na miẹn wẹẹ, iran ghaa rrọọ vbe ẹrẹna, akhuẹ, a hẹ iran ku uwu erhẹn nẹ, ọni vbe rhie ma wẹẹ, ẹ i mwẹ ọ ma yọ uwa ukpọn. Amuẹtinyan ọghe uwa kanmwa gbe!
29 Rhunmwuda ọni, wa ghẹ ghi gbinna igbinna evba gha re, evba gha da, wa ghẹ ghi vbe gha si osi gberra egbe;
30 ena hia ẹre emwa ni rre uwu agbọn ya egbe hia khu khian, sokpan, Erha uwa nọ rre ẹrinmwi rẹnrẹn wẹẹ, te ọ khẹke ne uwa gha mwẹ avbe emwi na.
31 Sokpan, wa gha mu ẹmwẹ Arriọba ọghẹe karo, a gha viọ avbe emwi na ba ẹre ne uwa.
32 “Wa ghẹ gi ohan mu uwa, oghẹn nekherhe, rhunmwuda, Erha uwa kue yọ nẹ wẹẹ, irẹn gha mu Arriọba nii ne uwa.
33 Wa khiẹnnẹ emwi ne uwa mwẹ, ne uwa yae ru ẹse ne emwa ne obọ ma sẹ ọre.* Wa ru ẹkpo igho nẹi wiẹn, ọni ọre ẹfe nẹi fo nọ rre ẹrinmwi, ehe ne oyi i khian sẹtin sikẹ, arriukpa* i khian vbe sẹtin ya rri emwi vba.
34 Rhunmwuda, eke ne ẹfe ọghe uwa ye, ẹre ekhọe uwa khian vbe gha ye.
35 “Wa yọ ẹwu, ne uwa mu egbe yotọ,* ne uwa gi ukpa ọghe uwa gha baa,
36 wa ghi yevbe ikpia ni khẹ ẹghẹ ne arowa iran khian ya ke ugie orọnmwẹ rre, a i rẹn vbe ọ gha rre, ọ na sobọ, iran ghi kie urho nẹẹn vbe ọwara ọkpa.
37 Oghọghọ nọ ne eviẹn nii ne arowa iran do vba iran wẹẹ iran bodẹ! Ne I ta ẹmwata ma uwa, ọ gha yọ ukpọn na ya winna, ọ ghi we ne iran do tota ga eteburu, ọ ghi rre do gha ghae evbare ne iran.*
38 Ọ gha rre vbe ọ ghaa bu ẹghẹ ogiasọn,* uhiẹn ọ na rre vbe ọ gha gberra ẹghẹ ogiasọn* nẹ, ọ na vba iran wẹẹ iran mu egbe, oghọghọ nọ ne iran!
39 Sokpan, wa kọ ọna ye orhiọn, akpawẹ enọ yan owa rẹn ẹghẹ ne oyi ya dee, ẹ i ghẹ te kue ne oyi nii gbe urho la owa ẹre.
40 Erriọ ẹre ọ vbe khẹke ne uwa mu egbe yotọ, rhunmwuda, ẹghẹ ne uwa ma te ya aro yi, ẹre Ovbi ọmwa khian ya rre.”
41 Ẹre Pita na ghi nọ rẹn wẹẹ: “Enọyaẹnmwa, ma ọkpa ẹre uwẹ zẹ erre na ma ra, ra emwa hia nọ?”
42 Enọyaẹnmwa keghi kha wẹẹ: “Gha gele re ọguọmwadia* nọ gia mu ẹtin yan, nọ mwẹ ẹwaẹn,* ne arowa ẹre gha zẹ nọ gha gbaroghe eguọmwadia ni rre owa, nọ gha viọ evbare nọ sẹ omwa ne iran vbe ẹghẹ nọ khẹke?
43 U miẹn vbene ọviẹn nii gha ghọghọ hẹ, deghẹ arowa ẹre na do vba ẹre vbe ọ ru vberriọ!
44 Ne I ta ẹmwata ma uwa, arowa ẹre gha mu emwi hia fẹẹrẹ nọ mwẹ ye ọre obọ, nọ gha gbaroghe.
45 Sokpan, adeghẹ ọviẹn nii na tae vbe uwu ekhọe ọre wẹẹ, ‘Arowa mwẹ i khian he rre banbanna,’ a na ghi miẹn wẹẹ, ọ suẹn gha gbe eguọmwadia ni rre owa, ọ na gha re, ọ na gha da gbe egbe,
46 arowa ẹre ghi rre vbe ẹdẹ nọ ma ya aro yi kevbe ẹghẹ nọ ma rẹn. Ẹghẹ nii, ọ ghi rri ọre oya ne udẹn, oya ne ẹvbi, ọ ghi ru ẹre emwi na ru emwa nẹi họn ẹmwẹ* re.
47 A gha gbe ọviẹn nii asan nibun, rhunmwuda, ọ te rẹn emwi ne arowa ẹre gualọ,* sokpan, ọ ma ru ẹre, ọ ma vbe mu egbe yotọ.
48 Sokpan, ọviẹn nọ ma rẹn emwi ne arowa ẹre gualọ, nọ ya ru emwi nọ khẹke na gbe ọmwa asan yi, asan kherhe ẹre a khian gbe ẹre. Vbene ẹmwata, ọmwaikọmwa na viọ emwi nibun na, a gha vbe ya aro ye emwi nibun vbe obọ ẹre; ọmwa na vbe tama nọ gha gbaroghe emwi nibun, a gha vbe ya aro ye emwi nibun vbe obọ ẹre, ọ ghi kue bun sẹ vbene ọ te khẹke na ya aro yi.
49 “Te I rre do mu erhẹn ye agbọn na; de emwi ọvbehe ne I ghi gualọ, ugbẹnvbe a miẹn wẹẹ, nene erhẹn suẹn gha baa nẹ?
50 Vbene ẹmwata, I mwẹ idinmwiamẹ ne I khian ya egbe miẹn, orhiọn mwẹ i khian sotọ, vbe ẹ i re te ọ fo nẹ!
51 Te uwa roro ẹre wẹẹ, te I rre do rhie ọfunmwegbe ye agbọn na ra? Ẹo! Ne I tama uwa, iwannegbe ẹre I rre do si.
52 Ke ẹghẹ na kpa, orhunmwu isẹn ni rre owa ọkpa ghi wannọ egbe, eha ghi gha gu eva khọn, eva ghi gha gu eha khọn.
53 Te iwannegbe khian gha rre uwu ẹkpo iran, erha ghi gha gu ọmokpia khọn, ọmokpia ghi gha gu erha khọn, iye ghi gha gu ọmokhuo khọn, ọmokhuo ghi gha gu iye khọn, iye ọdọ ghi gha gu amwẹ ọmọ khọn, amwẹ ọmọ ghi vbe gha gu iye ọdọ khọn.”
54 Iyeke ọni, Jesu na vbe tama emwa ni gbẹbu wẹẹ: “Wa gha bẹghe ẹre wẹẹ, amẹ bi vbe odẹ orrie,* uhukpa ẹre uwa ya kha wẹẹ, ‘Okpamẹ khian da,’ ọ ghi gele sunu vberriọ.
55 Wa gha vbe bẹghe ẹre wẹẹ, ẹhoho ọghe odẹ ahọ* hoho, wa ghi kha wẹẹ, ‘Ehe hia gha wa yọn vbe ẹrẹna,’ ọ ghi gele gha yerriọ.
56 Wa ne emwa okeke, wa sẹtin gha rhan otọ ama ne uhunmwu otagbọn kevbe iso rhie ma, vbọ ghi zẹ ne uwa ma na sẹtin rẹn otọ vbene ẹghẹ khare na?
57 Vbọzẹ ne uwa ma na vbe tobọ uwa rẹn emwi nọ khẹke ne uwa ru?
58 Vbe igiemwi, wẹ vbe ọmwa nọ tie ruẹ ẹzọ ghaa rrie ọghe nọ khaevbisẹ, u ghi hia vbe odẹ ke odẹ ne u gu ẹre ru adọlọ vbe uwa ghaa ye rre odẹ nii, nẹ ghẹ mieke na mu ruẹ gha rrie odaro ọbuohiẹn, ne ọbuohiẹn ghẹ ya mu ruẹ ye obọ ukọ nọ winna vbe ekọtu, ukọ nii ghi fi ruẹ fi eghan.
59 Ne I tama ruẹ, u i khian ladian vbe eghan nii hiehie, vbe ẹ i re te u zẹ igho hia fẹẹrẹ* ne u mwẹ fo nẹ.”
Avbe Futnot
^ Ra “vbe eke ne ukpa ye.”
^ Ra “Ekọẹn (coin) eva nọ ma sẹ emwi.” Vbe Grik, “Asarriọn ọkpa.” Ya ghee Apẹndis B14.
^ Ra “rhie aro gberra.”
^ Ọ sẹtin vbe gha re, “odaro e sinagọg.”
^ Ra “arrọọ.”
^ Ra “e soul.”
^ Ya ghee Apẹndis B14.
^ Te arriukpa na yevbe elabalaba.
^ Vbe Grik, “wa rhie ukugba gba.”
^ Ra “winna ne iran.”
^ Vbe Grik, “ẹghẹ nogieva na ya khẹ odẹ.” Ọna ọre ẹghẹ ne emwa ya khẹ odẹ vbe asọn, vbe odẹ ẹgogo ihinrin vbe asọn ya sẹ ẹgogo iweva vbe ogiasọn.
^ Vbe Grik, “vbe ẹghẹ nogieha na ya khẹ odẹ.” Ọna ọre ẹghẹ ne emwa ya khẹ odẹ vbe asọn, vbe odẹ ẹgogo iweva vbe ogiasọn ya sẹ ẹgogo eha vbe asọn.
^ Ra “ọmwa nọ gbaroghe owa.”
^ Ra “nọ waan.”
^ Ra “emwa na ma gba ẹko ẹre.”
^ Ra “emwi ne arowa ẹre we nọ ru.”
^ Ọni ọre, west.
^ Ọni ọre, south.
^ Ra “ekọẹn (coin) hia fẹẹrẹ.” Vbe Grik, “e lẹptọn nokiekie.” Ya ghee Apẹndis B14.
