Ebe Luk 3:1-38
3 Ọ ghi rre ukpo nogie ekesugie (15) ne Taibiriọs Siza ke khaevbisẹ, vbe ẹghẹ ne Pọntiọs Pailet na gha re gọvinọ ọghe Judia, e Hẹrọd* na vbe gha khaevbisẹ yan ikinkin* ọghe Galili, e Filip ighẹ ọtiọnrẹn na vbe gha khaevbisẹ yan ikinkin ọghe ẹvbo Ituria kevbe Trakonaitis, e Laisenias na vbe gha khaevbisẹ yan ikinkin ọghe Abilini,
2 vbe ẹghẹ ọghe ọkaolotu ohẹn ighẹ Anas kevbe Keyafas, Osanobua keghi gu e Jọn ne ovbi e Zẹkaraia guan* vbe uwu ato.
3 Ẹre Jọn na gha rrie ẹvbo hia ni lẹga e Jọdan, ọ na gha tama emwa, ne iran dinmwiamẹ, ne iran ya rhie ẹre ma wẹẹ iran fi werriẹ nẹ, na mieke na ya orukhọ ọghe iran bọ iran,
4 zẹvbe na gbẹn ọnrẹn ye ebe Aizaia ne akhasẹ wẹẹ: “A keghi họn urhu ọghe orhunmwu ọkpa vbe uwu ato, nọ ghaa datu wẹẹ: ‘Wa dọlọ odẹ ọghe Jehova* yi! Wa ya avbe odẹ ọghẹe khian enọ diae.
5 A gha ran iya hia fẹẹrẹ, a ghi dunmwu oke nekherhe kevbe nikhua hia sotọ; avbe odẹ ni gọe gha khian enọ diae, avbe odẹ ni ye kpannọkpannọ ghi do khian enọ rriẹ;
6 emwa nagbọn* hia ghi miẹn imiẹnfan ọghe Osanobua.’”*
7 Vbe emwa ghi gha bu ẹre rre nọ dinmwi iran ye amẹ, ọ na suẹn gha tama iran wẹẹ: “Wa ne ivbi ivbiẹkpo,* a ghi tama uwa, emwi ne uwa gha ru, ne uwa mieke na miẹn uhunmwu vbe izohu nọ dee?
8 Nọnaghiyerriọ, wa gi uyinmwẹ uwa rhie ẹre ma wẹẹ, wa gele zobọ vbe orukhọ na ru. Wa ghẹ suẹn gha tama egbe uwa wẹẹ, ‘Ivbi Ebraham ẹre ima khin.’ Ne I tama uwa, Osanobua gha sẹtin viọ emọ ladian vbe avbe okuta na, ne Ebraham.
9 Vbene ẹmwata, a viọ ughanmwa lele dọmwadẹ ẹzi erhan nẹ. Nọnaghiyerriọ, erhan ke erhan nẹi mọ ọmọ nọ maan, a gha tọn ọnrẹn gbe otọ, a ghi fi ẹre fi uwu erhẹn.”
10 Ẹre emwa ni gbẹbu na gha nọ rẹn wẹẹ: “Vbọ ghi khẹke ne ima ru nian?”
11 Ọ na ghi wanniẹn iran wẹẹ: “We ne ọmwa nọ mwẹ ẹwu eva* mu ọkpa ne ọmwa nẹi mwẹ; ọmwa nọ mwẹ evbare ghi vbe ghae ne nẹi mwẹ.”
12 Uhiẹn, iran ni koko igho uhunmwu na vbe bu ẹre gha dee, nọ dinmwi iran ye amẹ, iran na nọ rẹn wẹẹ: “Ọmamwaemwi, de emwi ne ima gha ru?”
13 Ọ na tama iran wẹẹ: “Wa ghẹ miẹn emwa igho nọ gberra igho uhunmwu, na we na gha hae.”
14 Deba ọni, avbe ivbiyokuo na vbe gha nọ rẹn wẹẹ: “De emwi ne ima gha ru?” Ọ na tama iran wẹẹ: “Wa ghẹ yagha ọmwa rhọkpa,* wa ghẹ vbe ba ọmwa rhọkpa ifiẹzọ ohoghe, sokpan, wa ghi gi emwi na viọ ne uwa,* gha sẹ uwa ọkẹn.”
15 Na kha na, emwa rhie aro ye odẹ gha khẹ nẹ, iran na gha ta ẹmwẹ e Jọn vbe ekhọe wẹẹ, “Ẹ i re irẹn ẹre ọ kue re nene Kristi?”
16 E Jọn keghi rhie ewanniẹn ne iran hia, ọ na wẹẹ: “Nọ ne imẹ, amẹ ẹre I dinmwi uwa yi, sokpan, ọmwa nọ wegbe sẹ mwẹ dee, I ma sẹ nọ gha rhan irri nọ rre ibata ẹre. Irẹn gha dinmwi uwa ye uwu orhiọn nọhuanrẹn kevbe erhẹn.
17 Esọbiri nọ ya khan emwiokọ rre ọre obọ, te ọ khian yae kpe eke nọ na khan emwiokọ huan sẹsẹsẹ, ọ ghi koko e wit viọ la aza ọghẹe. Sokpan, nọ ne ibobo ẹre, ọ ghi ya erhẹn nai khian sẹtin dọyọ giẹn ọnrẹn rua.”
18 Ọ vbe rhie ibude nibun ọvbehe ne emwa, ọ na ye gha kporhu iyẹn nọ maan ma iran.
19 Sokpan, rhunmwuda ne Jọn na gu e Hẹrọd nọ ghaa khaevbisẹ gui ye ẹmwẹ e Hẹrodias ne amwẹ ọtiọnrẹn kevbe emwi dan hia ne Hẹrọd he ru,
20 e Hẹrọd keghi ru ọkhọ ọvbehe ba ehia nọ ka ru: Ọ na mu e Jọn khui ye eghan.
21 Vbe ẹghẹ ne emwa nii hia na gha dinmwiamẹ, Jesu na vbe dinmwiamẹ. Ugbẹnvbe ọ ghi na erhunmwu, ẹrinmwi keghi kie yotọ,
22 orhiọn nọhuanrẹn keghi rhiegbe ma vbe na ghee idu, ọ na do rhuẹ yan rẹn, ẹre urhu ọkpa na guan ke ẹrinmwi rre, ọ wẹẹ: “Wẹ ọre Ovbi mwẹ, ne I hoẹmwẹ ọnrẹn; I miẹn ruẹ yi nẹ.”
23 Vbe Jesu suẹn iwinna ọghẹe, odẹ ukpo ọgban (30) ẹre ọ ghaa ye; emwa keghi rẹn ọnrẹn zẹvbeovbi e Josẹf,ne ovbi e Hilai,
24 ne ovbi e Matat,ne ovbi e Livai,ne ovbi e Mẹlkai,ne ovbi e Janai,ne ovbi e Josẹf,
25 ne ovbi e Matataias,ne ovbi Emọs,ne ovbi e Nehọm,ne ovbi Ẹslai,ne ovbi e Nagahai,
26 ne ovbi e Meyat,ne ovbi e Matataias,ne ovbi e Sẹmiẹn,ne ovbi e Josẹk,ne ovbi e Joda,
27 ne ovbi e Joanan,ne ovbi e Risa,ne ovbi e Zẹrubabẹl,ne ovbi e Sie-atiẹl,ne ovbi e Nirai,
28 ne ovbi e Mẹlkai,ne ovbi Adai,ne ovbi e Kosam,ne ovbi Ẹlmedam,ne ovbi Ẹr,
29 ne ovbi Jesu,ne ovbi Ẹli-iza,ne ovbi e Jorim,ne ovbi e Matat,ne ovbi e Livai,
30 ne ovbi e Simiọn,ne ovbi e Judas,ne ovbi e Josẹf,ne ovbi e Jonam,ne ovbi Ẹlaiakim,
31 ne ovbi e Milia,ne ovbi e Mina,ne ovbi e Matata,ne ovbi e Netan,ne ovbi e Devid,
32 ne ovbi e Jẹsi,ne ovbi Obẹd,ne ovbi e Boaz,ne ovbi e Salmọn,ne ovbi e Nasiọn,
33 ne ovbi Aminadab,ne ovbi Anai,ne ovbi e Hẹzrọn,ne ovbi e Pirẹz,ne ovbi e Juda,
34 ne ovbi e Jekọb,ne ovbi Aizik,ne ovbi Ebraham,ne ovbi e Tira,ne ovbi e Nehọ,
35 ne ovbi e Sirọg,ne ovbi e Riu,ne ovbi e Pilẹg,ne ovbi Iba,ne ovbi e Siẹla,
36 ne ovbi e Ke-ainan,ne ovbi Apaksiad,ne ovbi e Siẹm,ne ovbi e Noa,ne ovbi e Lemẹk,
37 ne ovbi e Mẹtusẹla,ne ovbi Inọk,ne ovbi e Jerẹd,ne ovbi e Mahelalil,ne ovbi e Ke-ainan,
38 ne ovbi Inọs,ne ovbi e Sẹt,ne ovbi Adam,ne ovbi Osanobua.
Avbe Futnot
^ Vbe Grik, “na vbe gha re tẹtrak.” Ọni ọre, ọmwa ne ọba ọghe Rom zẹ, nọ gha khaevbisẹ yan ako eso vbe arriọba ọghẹe.
^ Vbe Grik, “ẹmwẹ Osanobua keghi bu e Jọn ne ovbi e Zẹkaraia rre.”
^ Ya ghee Apẹndis A5.
^ Vbe Grik, “efun.”
^ Ra “odẹ ne Osanobua ya miẹn emwa fan.”
^ Ra “ẹyẹn.”
^ Ra “ẹwu ọvbehe.”
^ Ra “Wa ghẹ gbe ọmwa rhọkpa rhu.”
^ Ra “emwi na ha uwa ẹre.”
