Ebe Luk 8:1-56
-
Ikhuo ni lele Jesu khian (1-3)
-
Erre ọghe ọkemwiokọ (4-8)
-
Emwi ne Jesu rhunmwuda ẹre gha zẹ erre (9, 10)
-
Jesu rhan otọ erre ọghe ọkemwiokọ (11-15)
-
A i sẹtin rhu ukpa, na gue ẹre ginna otọ (16-18)
-
Iye Jesu kevbe etiọnrẹn (19-21)
-
Jesu dobọ okpẹhoho yi (22-25)
-
Jesu khulo avbe orhiọn dan la uwu avbe elẹdẹ (26-39)
-
Ovbi e Jerọs nokhuo; okhuo ọkpa ya obọ kaan ukpọn ne Jesu yọ ke odukhunmwu (40-56)
8 Vbọ ma he kpẹẹ vba, Jesu kegha lele dọmwadẹ ẹvbo khian, kevbe dọmwadẹ igue, ọ na gha kporhu iyẹn nọ maan ọghe Arriọba Osanobua. Iran Iweva nii vbe gha lelẹe khian,
2 erriọ ẹre ikhuo eso nọ mu ẹre egbe rran, nọ vbe khulo orhiọn dan hin iran egbe rre, vbe gha lelẹe khian. Usun iran ọre: e Meri na ghaa tie ẹre Magdalin, ne orhiọn dan ihinrọn ladian vbe egbe ẹre;
3 e Joana ne ọvbokhan e Kuza, e Kuza na, ẹre ọ ghaa re ọka iwinna vbe owa e Hẹrọd; e Suzana; kevbe ikhuo nibun ọvbehe, ni ghaa ya emwi ne iran mwẹ ru iyobọ ne Jesu kevbe erhuanegbe ẹre.
4 Emwa nibun ghi si egbe koko, deba emwa ni ke dọmwadẹ ẹvbo bu ẹre gha dee, ọ na zẹ erre ọkpa ma iran wẹẹ:
5 “Ọkemwiokọ ọkpa keghi ya kọ ikpẹ emwiokọ. Zẹvbe nọ ya kọ emwiokọ nii, eso na kharha ku abọ odẹ, emwa keghi ya owẹ mamaẹn ginna otọ, avbe ahianmwẹ ni tin vbe orere iso na do rhọ iran re.
6 Eso na kharha ye uhunmwu okuta; iran ghi zọọ ladian nẹ, iran na kakaa, rhunmwuda, iran ma miẹn amẹ.
7 Eso na kharha ye uwu igban; avbe igban nii vbe emwiokọ nii ghi gba waan rre, avbe igban nii na khuakhua iran gbua.
8 Sokpan, eso na kharha ye otọ nọ maan; iran ghi zọọ ladian nẹ, iran na suẹn gha mọ. Ọmọ ne iran mọ, na ya iyisẹn (100) bun sẹ na ya kọ.” Ọ ghi ta ẹmwẹ na hia nẹ, ọ na kha wẹẹ: “Ọmwa nọ mwẹ ehọ na ya họn ẹmwẹ, gi ẹre họn.”
9 Sokpan, erhuanegbe ẹre na nọ rẹn, emwi nọ ya erre na kha.
10 Ọ na wẹẹ: “Nọ ne uwa, a kue yọ ne uwa rẹn otọ ẹmwẹ oro nọhuanrẹn ọghe Arriọba Osanobua. Sokpan, nọ ne emwa nikẹre, erre ẹre a ya gu iran guan, na mieke na miẹn wẹẹ, iran gha rhan aro yotọ, iran i bẹghe emwi rhọkpa; iran gha họn ẹmwẹ, iran i rẹn emwi na yae kha.
11 Emwi na ya erre nii kha na khin: Ikpẹ emwiokọ nii keghi re ẹmwẹ Osanobua.
12 Ikpẹ ni kharha ku abọ odẹ, ọre emwa ni họn ẹmwẹ nii, sokpan, vbe iyeke ọni, Esu keghi rre do rhie ẹmwẹ nii hin iran ekhọe rre, ne iran ghẹ mieke na yayi, na miẹn iran fan.
13 Ikpẹ ni kharha ye uhunmwu okuta, ọre emwa na miẹn wẹẹ, iran ghi wa họn ẹmwẹ nii, iran na wa ya oghọghọ miẹn ọnrẹn yi, sokpan, ẹmwẹ nii ma gbọzinian vbe ekhọe iran. Iran keghi yayi vbe ovbi ẹghẹ kherhe, sokpan, ọ ghi sẹ ẹghẹ edanmwẹ, iran na dele kua.
14 Nọ ne ikpẹ ni kharha ye uwu igban, ena ọre emwa ni họn ẹmwẹ nii, sokpan, osi, ẹfe, kevbe orhiẹnrhiẹn agbọn ma gi iran bẹghe odẹ, rhunmwuda ọni, iran na khian ena khuakhua gbua, iran ma ghi sẹtin mọ ọmọ rhọkpa nọ wo.*
15 Nọ ne ikpẹ ni kharha ye otọ nọ maan, iran na ọre emwa na miẹn wẹẹ, iran ghi ya ekhọe esi kevbe ekhọe nọ maan họn ẹmwẹ nii nẹ, iran na daeyi, iran na gha zin egbe zẹvbe ne iran ya mọ.
16 “A i miẹn ọmwa nọ gha rhu ukpa nẹ, ọ ghi ya emwi gue ẹre, ra ọ ghi ya muẹn ye ototọ ebẹdi, sokpan, te ọ gha muẹn yan erhan ọmukpa, ne emwa ni la owa mieke na bẹghe awanwan ọghe ukpa nii.
17 Emwi ọkpa i rrọọ nọ rre ẹkhokho, nai khian miẹn vbe okiekie; emwi ọkpa i vbe rrọọ na fẹko rhie lẹre, nai khian rẹn vbe okiekie, kevbe nẹi khian vbe ladian vbe idagbo.
18 Nọnaghiyerriọ, wa gha yegbe vbe nọ dekaẹn vbene uwa ya danmwehọ hẹ, rhunmwuda, ọmwaikọmwa nọ ka mwẹ, a ghi viọ ba ẹre nẹẹn; sokpan, ọmwaikọmwa nẹi ka mwẹ, uhiẹn, emwi ne irẹn te roro ighẹ irẹn mwẹ nii, a ghi miẹn ọnrẹn ẹre.”
19 Iyẹe kevbe etiọnrẹn nikpia keghi bu ẹre gha dee, sokpan, iran ma sẹtin sẹ eke nọ ye, rhunmwuda emwa ni ma ye evba.
20 Iran na ghi tama rẹn wẹẹ: “Iyuẹ kevbe etuẹn nikpia mudia ye orere, iran hoo ne iran miẹn ruẹ.”
21 Ọ keghi wanniẹn iran wẹẹ: “Iran na, ni danmwehọ ẹmwẹ Osanobua, ni vbe yae ru emwi, ọre iye mwẹ kevbe etẹn mwẹ.”
22 Ọ ghi rre ẹdẹ ọkpa, Jesu kevbe erhuanegbe ẹre keghi la okọ; Jesu na tama iran wẹẹ: “Wa gi ima fian odighi rra gha rrie obọ nọkpa.” Ẹre iran na suẹn okhian.
23 Sokpan, vbe iran ghi gua okọ khian, Jesu na suẹn gha vbiẹ. Okpẹhoho nọ mu emwi rhia, na suẹn gha la vbe odighi nii, amẹ na suẹn gha vba la uwu okọ, sẹrriọ wẹẹ, te ọ khian ghi te zẹ ẹbe.
24 Ẹre iran na ya huẹn ọnrẹn, iran na tama rẹn wẹẹ: “Ọmamwaemwi, Ọmamwaemwi, te ima khian wulo na!” Ẹre ọ na kpaegbe, ọ na we ne ẹhoho kevbe amẹ nii nọ vba yo vba rre wa dobọ yi, iran na ghi dobọ yi, ehe hia na do ye hii.
25 Iyeke ọni, ọ na nọ iran wẹẹ: “Amuẹtinyan ọghe uwa vbo?” Sokpan, orrirri keghi gbe ku iran, iran na yan unu ruan, ẹre iran na gha gu egbe guan wẹẹ: “De ọmwa ne ọna gele khin? Ọ ghi wa gu ẹhoho kevbe amẹ guan, iran ghi wa vbe họn ẹmwẹ nẹẹn.”
26 Iran na ghi gua okọ gha rrie eghute* vbe ikinkin ọghe Gẹrasa, nọ rre obọ nọ mu aro daa e Galili.
27 Vbe Jesu ghi wa rhie owẹ sotọ, okpia ọkpa ne orhiọn dan loo, nọ ke ẹvbo nii rre keghi miẹn ọnrẹn. Ẹ i re eban ẹre okpia na ghi yọ ukpọn sẹ, ẹ i vbe dia owa ya, sokpan, eke ne avbe uvun okuta ni rre itẹ ye, ẹre ọ dia.
28 Ọ ghi wa bẹghe Jesu, ọ na rhie so, ọ na de fianmwẹ otọ vbe odaro ọre, ọ na ya urhu nọ la kha wẹẹ: “Vbọ kaan mwẹ kaan ruẹ, Jesu ne Ovbi Osanobua Nọ Yo Sẹ? Lahọ wowo, ghẹ rriọ mwẹ oya.”
29 (Rhunmwuda, te Jesu ghaa tama orhiọn dan* nii nọ kpa hin egbe okpia nii rre. Ẹghẹ nibun ẹre orhiọn dan nii he ya mu okpia nii gba;* ẹ i re avbiẹ inugba ẹre emwa te ya ọgiọrọ kevbe igaza* rrọ ọre, iran ghi vbe gha ghee ẹre nẹ ghẹ fan egbe ẹre, sokpan, ọ ghi giagia ọgiọrọ kevbe igaza nii kua, orhiọn dan nii ghi sua ẹre gha rrie ehe nọ divbiẹ.)
30 Jesu keghi nọ rẹn wẹẹ: “Vba tie ruẹ?” Ọ na wẹẹ: “Oghẹn,”* rhunmwuda, orhiọn dan nọ la uwu egbe ẹre i re avbiẹ.
31 Iran na gha rinmwiaẹn, nẹ ghẹ khulo iran gha rrie uwu uvun nẹi mwẹ otọ.*
32 Vbe ẹghẹ na kha na, oghẹn elẹdẹ nibun kegha rri evbare vbe uhunmwu oke nọ rre evba. Ẹre avbe orhiọn dan nii na gha rinmwiaẹn, nọ gi iran la uwu avbe elẹdẹ nii, ẹre ọ na we ne iran gha khian.
33 Ẹre avbe orhiọn dan nii na ladian hin egbe okpia nii rre, iran na la uwu avbe elẹdẹ nii, oghẹn elẹdẹ nii hia na ghi khọn gha rrie eke ne oke na han, iran na ke evba kharha ku uwu odighi; iran na ghi wulo ye uwu amẹ.
34 Sokpan, emwa ni gbaroghe avbe elẹdẹ nii ghi miẹn emwi nọ sunu, iran keghi lẹẹ fua, iran na ya na iyẹn na vbe orere ẹvbo kevbe ikinkin nii.
35 Ẹre emwa na vẹ ladian, ne iran ya ya aro iran bẹghe emwi nọ sunu. Iran keghi bu e Jesu gha dee, iran ghi rre, iran na miẹn okpia nii ne avbe orhiọn dan lahin ọnrẹn egbe rre. Na kha na, ọ hẹ ukpọn yọ, aro vbe hian rẹn, ọ tota ye akharha e Jesu; iran ghi miẹn ọnrẹn, ohan na suẹn gha mu iran.
36 Emwa ne aro iran sẹ emwi nọ sunu, na ghi tama iran, vbene a ya mu okpia nii, ne orhiọn dan te gha loo egbe rran hẹ.
37 Iyeke ọni, emwa nibun ni ke ikinkin ọghe Gẹrasa rre, keghi tama e Jesu nọ kpa hin eke ne iran ye rre, rhunmwuda, ohan kegha mu iran ẹsẹsẹmwẹse. Ẹre Jesu na ghi ya la okọ, nọ mieke na kpa.
38 Vbọrhirhighayehẹ, okpia nii ne avbe orhiọn dan lahin ọnrẹn egbe rre, kegha rinmwiaẹn ne irẹn lelẹe, sokpan, Jesu na we ne okpia nii gha khian, ọ na wẹẹ:
39 “Gha rrie owa, ne u gha tama emwa, emwi ne Osanobua ru nuẹn.” Ẹre ọ na gele kpa, ọ na gha yae wewe khian vbe orere ẹvbo nii hia, ighẹ emwi ne Jesu ru nẹẹn.
40 Jesu ghi werriegbe rre, emwa nibun keghi rhan obọ miẹn ọnrẹn yi, rhunmwuda, te iran hia wa gha khẹ ọre.
41 Okpia ọkpa na tie ẹre Jerọs keghi rre; ọkpa vbe usun iran ni rre ukpo ọdakha vbe sinagọg* ẹre okpia na ghaa khin. Ọ keghi fan fi iguẹ* vbe akharha e Jesu, ọ na gha rinmwiaẹn nọ gha die owa irẹn,
42 rhunmwuda, te ọmokhuo ọkpa kẹkan* nọ mwẹ khian ghi wu; odẹ ukpo iweva (12) ẹre ọmokhuo nii ghaa ye.
Vbe Jesu ghi khian, emwa ni bi lelẹe khian kegha ya egbe wiẹn ọnrẹn.
43 Ọ ghaa mwẹ okhuo ọkpa ne esagiẹn ghaa tue; ukpo iweva (12) ẹre ọ ye, ne okhuo na ke khuọnmwi emianmwẹ na. Ọ ma miẹn ọmwa nọ sẹtin sinmwi ẹnrẹn.
44 Ọ keghi la iyeke rre, ọ na ya obọ kaan ehọ ukpọn ne Jesu yọ ke odukhunmwu, vbe ọwara ọkpa nii, esagiẹn nọ te tue ẹre, keghi dobọ yi.
45 Jesu na ghi nọ wẹẹ: “Gha ya obọ kaan mwẹ?” Vbe uwu ẹghẹ ne iran ya gha siẹn wẹẹ, iran ma ya obọ kaan rẹn, e Pita na ghi kha wẹẹ: “Ọmamwaemwi, wẹ ma miẹn vbene emwa ma rhu ruẹ hẹ, kevbe vbene iran ya ya egbe wiẹn ruẹ hẹ?”
46 Sokpan, Jesu keghi kha wẹẹ: “Ọmwa ya obọ kaan mwẹ, rhunmwuda, I rẹnrẹn wẹẹ, ẹtin eso lahin mwẹ egbe rre.”
47 Vbe okhuo nii ghi bẹghe ẹre wẹẹ, emwi ne irẹn ru vẹ nẹ, ọ na ghi ladian, ọ na gha guọ zẹzẹzẹ, ọ keghi fan fi iguẹ* vbe odaro e Jesu, ọ na gha sirra emwa hia ta emwi nọ si ẹre ne irẹn na ya obọ kaan rẹn, kevbe vbene egbe ya rran irẹn hẹ vbobọvbobọ nii.
48 Sokpan, Jesu na tama rẹn wẹẹ: “Ovbi mwẹ, amuẹtinyan ruẹ mu ruẹ egbe rran nẹ. Gha khian, ọfunmwegbe gu ruẹ rrọọ.”
49 Vbe ọ wa ye guan nii, orhunmwu ọkpa na gie ẹre uhunmwu, keghi ke owa okpia nii nọ rre ukpo ọdakha vbe sinagọg* rre, ọ na wẹẹ: “Ovbuẹ nokhuo wu nẹ; ghẹ ghi zẹdẹ kpokpo Ọmamwaemwi.”
50 Jesu ghi họn ẹmwẹ na, ọ na wanniẹn ọnrẹn wẹẹ: “Ghẹ fian afianma,* sokpan, wa gha mwẹ amuẹtinyan, a gha miẹn ọnrẹn fan.”
51 Ọ ghi sẹ owa nii, ọ ma kue ne ọmwa rhọkpa lelẹe la owa, vbọ gberra e Pita, e Jọn, e Jems, erha ọmokhuo nii kevbe iyẹe.
52 Sokpan, emwa hia ni rre evba kegha viẹ, iran na gha kinmwi ẹwẹ, zẹvbe ne iran ya khiẹ ye ẹmwẹ ọmokhuo nii. Ẹre Jesu na ghi tama iran wẹẹ: “Wa ghẹ ghi viẹ, rhunmwuda, ọmokhuo na ma wu, sokpan, te ọ vbiẹ.”
53 Vbe ọ ghi ta ẹmwẹ na, iran na suẹn gha giẹ ọre, rhunmwuda, iran rẹnrẹn wẹẹ, ọ wu nẹ.
54 Sokpan, Jesu keghi rhie ọmọ nii obọ, ọ na tama rẹn wẹẹ: “Ọmọ, kpaegbe!”
55 Orhiọn rẹn* na werriegbe rre, ọ na kpaegbe vbe ọwara ọkpa nii; Jesu na ghi we ne iran gualọ evbare nẹẹn, nọ re.
56 Na kha na, evbibiẹ ọre ma sẹtin ghọghọ! Sokpan, Jesu keghi tama iran, ne iran ghẹ tama ọmwa rhọkpa emwi nọ sunu.
Avbe Futnot
^ Ra “biẹ ọmọ esi.”
^ Ra “okhiẹ ẹzẹ.”
^ Vbe Grik, “orhiọn nọ ma huan.”
^ Ọ sẹtin vbe gha re, “Ọ kpẹẹ re ne orhiọn dan nii ghi ya muẹn gba.”
^ Ọni ọre, fetters.
^ Ra “Ligiọn.” Ọni ọre, oka ọghe ivbiyokuo e Rom nẹdẹ. Sokpan, evba yae kha vbe ako na ọre oghẹn.
^ Vbe Grik, “abis.”
^ Ọni ọre, owa ugamwẹ ọghe Ivbi e Ju.
^ Ra “de gbe otọ.”
^ Vbe Grik, “ukpọmọkpa.”
^ Ra “de gbe otọ.”
^ Ọni ọre, owa ugamwẹ ọghe Ivbi e Ju.
^ Ra “Ghẹ gi ohan mu ruẹ.”
^ Ra “Ẹtin nọ da arrọọ ọghẹe yi.”
