Ebe Mak 10:1-52
-
Orọnmwẹ kevbe na na so orọnmwẹ gọ [divorce] (1-12)
-
Jesu fiangbe ibiẹka (13-16)
-
Ọta ne okpia ọkpa nọ fe nọ e Jesu re (17-25)
-
Emwi eso na gha sẹrae rhunmwuda Arriọba (26-31)
-
Jesu werriegbe tae yotọ, vbene irẹn khian ya wu hẹ (32-34)
-
Jems vbe Jọn do nọ emwi vbe obọ e Jesu (35-45)
-
Jesu dẹ emwa nibun werriegbe (45)
-
-
Jesu mu arhuaro ọkpa na tie ẹre Batimiọs egbe rran (46-52)
10 Ọ ghi kpa vba rre, ọ na gha die eke ne uwu ọghe Judia lae, vbe obọ nọkpa ọghe Jọdan, ẹre emwa na werriegbe gbẹbu vbe eke nọ ye. Zẹvbe nọ ka ru ẹre dee yi, ọ na werriegbe suẹn gha ma iran emwi.
2 Avbe Farisi keghi bu ẹre gha dee, ne iran do gualọ ọre ẹmwẹ ne unu, iran na nọ rẹn deghẹ uhi kue yọ, ne okpia gha khu ọvbokhan rẹn fua.*
3 Ọ na wanniẹn iran wẹẹ: “De iyi ne Mozis yi ne uwa?”
4 Iran na kha wẹẹ: “E Mozis kue yọ, ne okpia gha gbẹn ebe rhie ne ọvbokhan rẹn vbe ọ gha khian khu ẹre fua,* ọ ghi wẹẹ irẹn i ghi rhie.”
5 Sokpan, Jesu na tama iran wẹẹ: “Rhunmwuda ekhọe nọ wegbe ne uwa mwẹ, ẹre ọ si ẹre ne Mozis na gbẹn uhi na ne uwa.
6 Vbọrhirhighayehẹ, vbe Osanobua yi iran vbe ẹghẹ omuhẹn, ‘Ọ keghi yi iran okpia vbe okhuo.
7 Ọna ẹre ọ si ẹre ne okpia gha na sẹ erhae kevbe iyẹe rae,
8 iran eva ghi do gha re ọkpa,’* rhunmwuda ọni, iran i ghi re eva, sokpan, ọkpa ẹre iran ghi khin.
9 Nọnaghiyerriọ, emwi ne Osanobua kukugbe nẹ, we ne ọmwa rhọkpa ghẹ wannọẹn.”
10 Iran ghi dọlegbe sẹ owa nẹ, erhuanegbe ẹre na suẹn gha nọ rẹn ọta vbekpa ẹmwẹ na.
11 Ọ keghi tama iran wẹẹ: “Ọmwaikọmwa gha khu ọvbokhan rẹn fua,* ọmwa nii na ya rhie okhuo ọvbehe, te ọ ru orukhọ ghee ọvbokhan rẹn, te ọmwa vberriọ ru oghẹ.
12 Adeghẹ okhuo na vbe kpa sẹ ọdafẹn ọnrẹn rae,* ọ na ya rọnmwẹ ọdọ ọvbehe, te okhuo nii vbe ru oghẹ.”
13 Emwa keghi suẹn gha viọ ibiẹka gie ẹre, nọ ya obọ kaan iran, sokpan, erhuanegbe ẹre na gha gu iran gui.
14 Jesu ghi bẹghe emwi ne iran ru, ohu na muẹn, ọ na tama iran wẹẹ: “Wa sẹ ibiẹka nii rae, ne iran bu mwẹ gha dee; wa ghẹ da iran obọ yi, rhunmwuda, egbe emwa vberriọ, ẹre ọ yan Arriọba Osanobua.
15 Ne I ta ẹmwata ma uwa, ọmwaikọmwa nọ ma rhan obọ miẹn Arriọba Osanobua yi, vbe na ghee ọvbokhan, ọmwa vberriọ i sẹtin laọ.”
16 Ọ keghi viọ ibiẹka nii ye ekuabọ ọre, ọ na suẹn gha fiangbe iran, ọ na vbe viọ obọ yan iran.
17 Ọ ghi khian vbe odẹ, okpia ọkpa na rhulẹ bu ẹre, ọ na fan fi iguẹ vbe odaro ọre, ọ na nọ rẹn wẹẹ: “Ọmamwaemwi Nọ Maan, de emwi ne I gha ru, ne arrọọ ọghe etẹbitẹ mieke na sẹ mwẹ obọ?”
18 Jesu na tama rẹn wẹẹ: “Vbọzẹ ne u na tie mwẹ ọmwa nọ maan? Ọmwa rhọkpa i rrọọ nọ maan, vbọ gberra Osanobua ọkpa.
19 U rẹn uhi nọ rre otọ nian: ‘Ghẹ do izigha, ghẹ ghẹẹ,* ghẹ rhaa, ghẹ sẹ osẹ ohoghe, ghẹ mu ọmwa rhọkpa ru, rhie ọghọ ne erhaa kevbe iyuẹ.’”
20 Okpia nii na ghi tama rẹn wẹẹ: “Ọmamwaemwi, ke egbe ọvbokhan gha dee, ẹre I ke lele avbe uhi na hia.”
21 Jesu ghi ghee ẹre, ẹmwẹ ọnrẹn na yẹẹ ọre rua, ọ na tama rẹn wẹẹ, “Emwi ọkpa ẹre ọ ghi kẹ ruẹ yi: Ya khiẹnnẹ emwi ne u mwẹ, u ghi ghae igho ne u miẹn vbọ ne ivbiogue, ẹghẹ nii, u ghi gha mwẹ ẹfe vbe ẹrinmwi; iyeke ọni, u ghi bu mwẹ gha dee, ne u do gha lele mwẹ khian.”
22 Ewanniẹn ne Jesu rhie nẹẹn keghi gbe ẹre egbe, ọ na gele dae, ẹre ọ na ghi kpa, rhunmwuda, ẹfe nọ mwẹ i re nekherhe.
23 Jesu ghi ghee ehe hia lẹga nẹ, ọ na tama erhuanegbe ẹre wẹẹ: “U miẹn vbene ọ gha lọghọ hẹ, ne emwa ni mwẹ igho la Arriọba Osanobua!”
24 Sokpan, ẹmwẹ nọ tae na, keghi kpa erhuanegbe ẹre odin. Jesu na ghi kha wẹẹ: “Emọ, u miẹn vbene ọ lọghọ hẹ, a ke sẹtin la Arriọba Osanobua!
25 Ọ gha khuẹrhẹ sẹ, ne kamẹl la uvun olodẹ gberra, ne ọmwa nọ fe sẹtin la Arriọba Osanobua.”
26 Ẹmwẹ nọ tae na, na kakabọ kpa iran odin, iran na ghi tama rẹn wẹẹ:* “A gha kue miẹn ọmwa nọ gha sẹtin miẹn fan?”
27 Jesu keghi ghee iran aro, ọ na tama iran wẹẹ: “Vbe odaro emwa nagbọn, emwi nẹi khian sẹtin sunu nọ, sokpan, ẹ i re erriọ ẹre ọ ye ne Osanobua, rhunmwuda, a i miẹn emwi nẹi gi Osanobua ru.”
28 E Pita na ghi tama rẹn wẹẹ: “Ghee ima nian, ma sẹ emwi hia ne ima mwẹ rae, ẹre ima na leluẹ.”
29 Jesu keghi kha wẹẹ: “Ne I ta ẹmwata ma uwa, ọmwa rhọkpa i rrọọ nọ sẹ owa rae, ra etẹn nikpia, ra etẹn nikhuo, ra iye, ra erha, ra emọ, ra otọ rhunmwuda mwẹ, kevbe rhunmwuda iyẹn nọ maan,
30 nẹi khian miẹn ena hia werriegbe igba iyisẹn (100) vbe ẹghẹ na nian, ọre owa nọ oo, ra etẹn nikpia, etẹn nikhuo, iye, emọ, otọ, deba ukpokpo, arrọọ ọghe etẹbitẹ ghi vbe sẹ ọre obọ vbe agbọn nọ dee.*
31 Sokpan, emwa nibun ni te ke odaro gha ke iyeke, ni te ke iyeke ghi do ke odaro.”
32 Iran ghi rre odẹ, vbe iran rrie Jerusalẹm, Jesu keghi ke odaro ne iran; iran keghi yan unu ruan, sokpan, ohan na suẹn gha mu emwa ni lele iran khian. Jesu na werriegbe viọ iran Iweva nii ghee efọnkpa, ọ na suẹn gha tama iran, avbe emwi na ni khian sunu daa irẹn, ọ na wẹẹ:
33 “Ghee ẹre! Te ima rrie Jerusalẹm na; ma gha sẹ evba, a gha mu Ovbi ọmwa gie avbe ọkaolotu ohẹn kevbe avbe skraib.* Iran ghi bu ohiẹn uwu gbe ẹre, iran ghi vbe rhie ẹre ne emwa nẹi re Ivbi e Ju,
34 iran nii ghi yae gbogiẹ, iran ghi tulo asẹn yan rẹn, iran ghi ya asan bolo ẹre egbe, iran ghi vbe gbe ẹre rua; sokpan, ọ ghaa rre ikpẹdẹ eha, ọ ghi rhiọ kpaegbe.”
35 E Jems vbe Jọn, ne ivbi e Zẹbẹdi keghi bu ẹre gha dee, iran na tama rẹn wẹẹ: “Ọmamwaemwi, ma hoo ne u ru emwi ne ima rhirhi nọ ruẹ re ne ima.”
36 Ọ na nọ iran wẹẹ: “De emwi ne uwa hoo ne I ru ne uwa?”
37 Iran na wanniẹn ọnrẹn wẹẹ: “Gi ima tota ke ruẹ vbe Arriọba ruẹ,* ọkpa ghi gha rre obọ erha ọmwa ruẹ, ọkpa ghi vbe gha rre obọ iye ọmwa ruẹ.”
38 Sokpan, Jesu keghi tama iran wẹẹ: “Wa ma rẹn emwi ne uwa nọ na. Wa gha sẹtin wọn vbe ukpu ne imẹ na wọn na ra?* Wa gha vbe sẹtin dinmwiamẹ vbene imẹ vbe ya dinmwiamẹ na ra?”
39 Iran na wẹẹ: “Ma gha sẹtin.” Ẹre Jesu na tama iran wẹẹ: “Wa gha wọn vbe ukpu ne imẹ na wọn na,* a gha vbe dinmwi uwa ye amẹ vbe odẹ na ya dinmwi imẹ ye amẹ.
40 Sokpan, ọghe na tota ye obọ erha ọmwa mwẹ, ra obọ iye ọmwa mwẹ, ẹ i re imẹ ẹre ọ tae, sokpan, emwa na mwamwaẹn khẹ, ẹre ọ khian tota yọ.”
41 Iran igbe ni dekẹe ghi họn ẹmwẹ na, ohu e Jems vbe Jọn na suẹn gha mu iran.
42 Sokpan, Jesu keghi tie iran, ọ na tama iran wẹẹ: “Wa rẹnrẹn wẹẹ, emwa na rẹnrẹn ye eni khaevbisẹ vbe uwu agbọn, ẹre ọ ta ẹmwẹ nọ sẹ vbe egbe emwa ne iran kha yan, erriọ ẹre emwa ni rre ukpo ọdakha vbe ya obọ yẹnyẹn emwa ni rre ototọ iran mu otọ.
43 Ọ ma khẹke ne uwa gha yin vberriọ; sokpan, ọmwaikọmwa nọ hoo nọ gha re nọ kpọlọ vbe uwu ẹbu uwa, we nọ gha re ọguọmwadia uwa,
44 ọmwaikọmwa nọ vbe hoo nọ gha re okaro vbe uwu ẹbu uwa, we nọ gha re ọviẹn uwa hia.
45 Uhiẹn, Ovbi ọmwa ma rre na do gha gae, sokpan, te irẹn rre do ga emwa, nọ vbe ya arrọọ* ọghẹe dẹ emwa nibun werriegbe.”
46 Iran keghi sẹ e Jẹriko. Sokpan, vbe irẹn vbe erhuanegbe ẹre kevbe emwa ni bi lele iran khian, khian ghi ladian vbe Jẹriko, arhuaro ọkpa nọ rinmwian emwa emwi, na tie ẹre Batimiọs (ne ovbi e Timiọs), keghi tota ye ọkpẹn odẹ.
47 Ọ ghi họn wẹẹ Jesu ne Ovbi e Nazarẹt nọ, ọ na suẹn gha go, ọ na wẹẹ: “Jesu ne Ovbi e Devid, tohan mwẹ!”
48 Ẹre emwa nibun na suẹn gha gu ẹre gui, iran na we nọ gue unu ẹnrẹn; sokpan, ọ na werriegbe kakabọ gha go wẹẹ: “Ovbi e Devid, tohan mwẹ!”
49 Jesu keghi mudia, ọ na wẹẹ: “Wa tie ẹre gu mwẹ.” Iran na tie okpia nii ne arhuaro, iran na tama rẹn wẹẹ: “Si orhiọn koko!* Kpaegbe; ọ tie ruẹ.”
50 Ọ keghi fi ẹwu nọ yọ ke odukhunmwu fua, ọ na gua kpaegbe, ọ na bu e Jesu.
51 Ẹre Jesu na nọ rẹn wẹẹ: “De emwi ne u hoo ne I ru nuẹn?” Okpia nii nọ rhu aro na tama rẹn wẹẹ: “Raboni,* gu mwẹ dọlegbe gha bẹghe odẹ.”
52 Jesu na ghi tama rẹn wẹẹ: “Gha khian. Amuẹtinyan ruẹ mu ruẹ egbe rran nẹ.” Vbe ọwara ọkpa nii, ọ na suẹn gha bẹghe, ọ na ghi suẹn gha lele Jesu khian vbe odẹ.
Avbe Futnot
^ Emwi na guan kaẹn vbe emwa, ọre na wa so orọnmwẹ gọ fẹfẹfẹ (divorce), ẹ i re na khu ọmwa fua kẹkan.
^ Emwi na guan kaẹn vbe emwa, ọre na wa so orọnmwẹ gọ fẹfẹfẹ (divorce), ẹ i re na khu ọmwa fua kẹkan.
^ Vbe Grik, “efun ọkpa.”
^ Emwi na guan kaẹn vbe emwa, ọre na wa so orọnmwẹ gọ fẹfẹfẹ (divorce), ẹ i re na khu ọmwa fua kẹkan.
^ Ra “okhuo na vbe wẹẹ, irẹn i ghi rọnmwẹ ọdafẹn irẹn.”
^ Ra “ghẹ fi owẹ ye oha.”
^ Ọ sẹtin vbe gha re, “iran na gha gu egbe guan wẹẹ.”
^ Ra “iran ni ma emwa Uhi.”
^ Vbe Grik, “vbe uyi ruẹ.”
^ Vbe Grik, “wọn ukpu ne imẹ wọn na ra?”
^ Vbe Grik, “wọn ukpu ne imẹ wọn na.”
^ Ra “e soul.”
^ Ra “Gha mwẹ udinmwẹ.”
^ Evba yae kha ọre, “Ọmamwaemwi.”
