Ebe Mak 15:1-47
15 Ọ ghi wa rre owiẹ fioro, avbe ọkaolotu ohẹn kevbe ediọn kevbe avbe skraib* keghi koko do iko; na wa kha wẹẹ, emwa hia ni rre iko e Sanhẹdrin* ẹre ọ gba do iko nii. Iran ghi gba e Jesu obọ* nẹ, iran na muẹn kpa, ẹre iran na muẹn gie Pailet.
2 Ẹre Pailet na ghi nọ rẹn wẹẹ: “Wẹ ọre Ọba ọghe Ivbi e Ju ra?” Jesu na wanniẹn ọnrẹn wẹẹ: “Wẹ tobọ ruẹ ẹre ọ tae.”
3 Sokpan, avbe ọkaolotu ohẹn kegha ba ẹre ifiẹzọ ughughan.
4 Ẹre Pailet na werriegbe suẹn gha nọ rẹn ọta, ọ na wẹẹ: “Wẹ ma miẹn ẹmwẹ zẹ wanniẹn iran ra? Wẹ ma họn ifiẹzọ ọrhẹnrhẹn ne iran ba ruẹ re na?”
5 Sokpan, Jesu ma ghi werriegbe zẹ ẹmwẹ wanniẹn ọnrẹn; ọna keghi kpa e Pailet odin.
6 Ẹghẹ ke ẹghẹ ne iran ya do ugie, ẹre Pailet ya fan oleghan ọkpa, ne ivbi ẹvbo hoo na fan fua.
7 Vbe ẹghẹ na kha na, okpia ọkpa na tie ẹre Barabas kegha rre eghan, ke irẹn kevbe emwa eso ni sọtẹ daa arriọba, ni vbe do izigha vbe uwu ẹghẹ ne iran ya sọtẹ.
8 Ugbẹnvbe emwa ghi gbẹbu nẹ, iran na suẹn gha tama e Pailet nọ ru emwi nọ ka ru dee yi ne iran.
9 Ọ na wanniẹn iran wẹẹ: “Wa hoo ne I fan Ọba ọghe Ivbi e Ju ne uwa ra?”
10 Rhunmwuda, e Pailet rẹnrẹn wẹẹ, igbọvo ẹre ọ ya avbe ọkaolotu ohẹn muẹn bu irẹn gha dee.
11 Sokpan, avbe ọkaolotu ohẹn keghi kpikpi emwa ni gbẹbu, ne iran tama rẹn nọ fan e Barabas ne iran, nọ gha te ya fan e Jesu.
12 E Pailet na werriegbe nọ iran wẹẹ: “Vbe uwa ghi we ne I ru okpia na hẹ, ne uwa tie ẹre Ọba ọghe Ivbi e Ju?”
13 Iran na werriegbe datu wẹẹ: “Kan rẹn mu erhan!”*
14 Sokpan, e Pailet keghi nọ iran wẹẹ: “Vbọzẹ? De emwi dan nọ ru?” Sokpan, iran na kakabọ tọn urhu mu, iran na gha go wẹẹ: “Kan rẹn mu erhan!”*
15 Rhunmwuda ne Pailet na gha hoo nọ ru emwi nọ gha ya ẹko rhiẹnrhiẹn emwa ni gbẹbu, ọ na ghi fan e Barabas ne iran; ọ ghi we na gbe Jesu asan nẹ, ọ na ghi we na ya kan rẹn mu erhan.
16 Ivbiyokuo keghi rhie Jesu gha rrie otọ ẹghodo, ọni ọre owa e gọvinọ, iran na si ivbiyokuo hia koko.
17 Iran keghi rhuan ẹre ukpọn nọ baa,* iran na ya igban do ẹrhu ẹde mu rhu ẹre;
18 iran na suẹn gha tama rẹn wẹẹ: “U gha tọ, u kpẹẹ re, Ọba ọghe Ivbi e Ju!”
19 Deba ọni, iran na gha kinmwi ukpokpo ye ọre uhunmwu, iran na gha gie asẹn ku ọre; iran na vbe diguẹ ya uhunmwu rhanmwẹ otọ nẹẹn.
20 Iran ghi yae gbogiẹ fo nẹ, iran na ban ukpọn nọ baa* nii hin ọnrẹn egbe rre, ẹre iran na ghi yọ ọre ukpọn rẹn. Iyeke ọni, iran na rhie ẹre gha rrie eke ne iran khian na kan rẹn mu erhan.
21 Deba ọni, ọ ghaa mwẹ okpia ọkpa na tie ẹre Saimọn ne Ovbi e Sairini, nọ re erha Alẹkzanda kevbe Rufọs; te okpia na ghaa ke igue dee. Ọ ghi la evba gberra, iran keghi gbagbae ye ọre egbe nọ mu erhan irrioya* ọghe Jesu.
22 Iran keghi rhie ẹre gha die eke ọkpa na tie ẹre Gọlgọta; emwi na yae kha vbe a gha zedu ẹre, ọre “Isi Ugboloko Uhunmwu.”*
23 Evba ẹre iran na te gha hoo ne iran mu ayọn na gua re nẹẹn wọn, emwi na ya gua ayọn nii kegha re ukhunmwu na tie ẹre mai; sokpan, ọ ma wọn.
24 Iran keghi kan rẹn mu erhan, ẹre iran na yan uta ya ghae ẹwu nọ yọ ke odukhunmwu, ne iran mieke na rẹn nọ gha sẹ edọmwadẹ ọghẹe obọ vbọ.
25 Na kha na, ughaẹdẹ* nogieha* ẹre iran ya kan rẹn mu erhan.
26 Iran keghi gbẹn ifiẹzọ na ba ẹre ye evba, emwi ne iran gbẹn yọ ọre: “Ọba ọghe Ivbi e Ju.”
27 Yevbesọni, iran keghi si oyi eva rrọ ye erhan vba, ọkpa na gha rre ọre obọ erha ọmwa, nọkpa na gha rre ọre obọ iye ọmwa.
28 * ——
29 Avbe ilavbodẹ kegha ya ukpẹ zaan rẹn, iran na gha fieghe uhunmwu, iran na gha kha wẹẹ: “Ha! Wẹ nọ wẹẹ, u gha ghi guọghọ ọgua Osa sotọ, u ghi werriegbe ya ikpẹdẹ eha bọe,
30 miẹn egbuẹ fan nian, ne u tuorre vbe erhan irrioya* na.”
31 Erriọ ẹre avbe ọkaolotu ohẹn kevbe avbe skraib* vbe yae gha gbogiẹ vbe uwu ẹbu iran, iran na gha kha wẹẹ: “Ọ miẹn emwa ọvbehe fan; sokpan, ọ ma sẹtin miẹn egbe ẹre fan!
32 We ne Kristi nọ re Ọba ọghe Izrẹl tuorre vbe erhan irrioya* nian, ne ima mieke na bẹghe ẹre, ne ima vbe yaeyi.” Uhiẹn, iran na vbe si rrọ ye erhan vbe eke nọ ye, na vbe gha ya ukpẹ zaan rẹn.
33 Ọ ghi rre ughaẹdẹ* nogie ehan,* ebiebi keghi so gba otọ nii hia, ọ te ya sẹ ughaẹdẹ* nogie ihinrin.*
34 Ọ ghi rre ughaẹdẹ* nogie ihinrin, Jesu keghi ya urhu nọ la datu wẹẹ: “Ẹli, Ẹli, lama sabaktani?” emwi na yae kha vbe a gha zedu ẹre, ọre: “Osanobua mwẹ, Osanobua mwẹ, vbọzẹ ne u na fi iyeke gbe mwẹ?”
35 Eso vbe uwu iran ni mudia ye ọkpẹn evba ghi họn ẹmwẹ na, iran na suẹn gha kha wẹẹ: “Ghee! Ọ gha tie Ẹlaija.”
36 Ẹre orhunmwu ọkpa na rhulẹ kpa, ọ na ya fi ihiọn ye uwu ayọn nọ kaẹn, ọ na ghi rhie ihiọn nii ye ukpokpo, ọ na muẹn ne Jesu nọ si ẹre wọn, ọ na wẹẹ: “Wa sẹrae! Na ghee ẹre deghẹ Ẹlaija gha rre do muẹn tuorre.”
37 Sokpan, Jesu keghi ya urhu nọ la rhie so, ọ na kpan udu.*
38 Ekọtin nọ rre ọgua Osa na wa sọọ ye ihe eva, ke odukhunmwu wa ya sotọ.
39 Ọkaokuo ọkpa nọ ke eke nọ mudia yi gha bẹghe Jesu, ghi miẹn emwi hia nọ sunu vbe ẹghẹ ne Jesu ya wu, ọ na wẹẹ: “Ovbi Osanobua ẹre okpia na te gele khin.”
40 Ikhuo vbe gha rre evba, ni vbe gha ke urria ghee emwi nọ sunu. Usun iran ọre Meri Magdalin, kevbe Meri ne iye Jems Ne Kherhe, nọ vbe re iye Josis; e Salomi vbe gha rre evba.
41 Iran na ẹre ọ ghaa lelẹe, iran ẹre ọ vbe gha ru iyobọ nẹẹn vbe ọ rre Galili. Ikhuo nibun ọvbehe ni lelẹe gha die Jerusalẹm vbe gha rre evba.
42 Ugbẹnvbe ọ ghi bu ẹghẹ ota nẹ, kevbe na na miẹn wẹẹ, ẹdẹrriọ ọre ẹdẹ Imuegbeyotọ, ọni ọre, a tie ẹre akhuẹ ọre Ẹdẹ Ikẹtin,
43 okpia ọkpa na tie ẹre Josẹf, ne Ovbi Arimatia keghi rre. Ọkpa vbe usun iran ni rre Ekọtu Ọghe Ivbi E Ju na wa rhie ọghọ na, ẹre okpia na ghaa khin; irẹn tobọ irẹn vbe gha mudia khẹ Arriọba Osanobua. Ọ na bu e Pailet, vbene ọ ma na gi ohan muẹn, ọ na we nọ mu ikun e Jesu ne irẹn.
44 Sokpan, e Pailet na gha roro ẹre deghẹ Jesu gele wu nẹ, rhunmwuda ọni, ọ na ghi tie ọkaokuo, ọ na nọ rẹn deghẹ Jesu wu nẹ.
45 Ọkaokuo nii ghi tama rẹn wẹẹ ọ wu nẹ, ọ na ghi kue ne Josẹf ya mu ikun ẹnrẹn.
46 Ọ keghi dẹ ukpọn e linẹn ọghe ighobioye,* iyeke ọni, ọ na mu ikun e Jesu tuorre, ẹre ọ na ya ukpọn e linẹn ọghe ighobioye nii vbuọ ọre, ọ na ya muẹn ye idin na fian ye uwu okuta; ọ na werriẹ okuta ya gue onurho idin nii.
47 Sokpan, e Meri Magdalin kevbe Meri ne iye Josis ma kpa, iran na ye gha ghee eke ne iran muẹn yi.
Avbe Futnot
^ Ra “iran ni ma emwa Uhi.”
^ Ọni ọre, ekọtu ọghe Ivbi e Ju.
^ Ra “gbalọ e Jesu.”
^ Ra “Gbe ẹre rua!”
^ Ra “Gbe ẹre rua!”
^ Ukpọn nọ baa na guan kaẹn mwa, ọre ukpọn nọ mwẹ ẹmu ne Ebo tie ẹre purple.
^ Ukpọn nọ baa na guan kaẹn mwa, ọre ukpọn nọ mwẹ ẹmu ne Ebo tie ẹre purple.
^ Ra “eke na tie ẹre Ugboloko Uhunmwu.”
^ Ọni ọre, odẹ ẹgogo ihinrin vbe owiẹ.
^ Ra “awa.”
^ Ya ghee Apẹndis A3.
^ Ra “iran ni ma emwa Uhi.”
^ Ra “awa.”
^ Ọni ọre, odẹ ẹgogo iweva vbe avan.
^ Ra “awa.”
^ Ọni ọre, odẹ ẹgogo eha vbe avan.
^ Ra “awa.”
^ Ra “ọ na hiọnrọn uhiọnrọnmwẹ nokiekie.”
^ Vbe Grik, “ukpọn e linẹn nọ mose.”
