Ebe Mak 9:1-50
-
Egbe Jesu fi werriẹ (1-13)
-
Jesu khu orhiọn dan hin ọmokpia ọkpa egbe rre (14-29)
-
Ọmwa ghaa mwẹ amuẹtinyan, a i miẹn emwi nọ gualọ nẹi khian sẹ ọre obọ (23)
-
-
Jesu werriegbe tae yotọ, vbene irẹn khian ya wu hẹ (30-32)
-
Avbe erhuanegbe gha muan ẹmwẹ ye ẹmwẹ ọmwa nọ kpọlọ sẹ (33-37)
-
Ọmwaikọmwa nọ ma gbodan ghee ima, obọ ọghe ima ẹre ọ ye (38-41)
-
Avbe okuta ni rrua ọmwa owẹ (42-48)
-
“Wa gha mwẹ umwẹ vbe uwu uwa” (49, 50)
9 Yevbesọni, ọ na tama iran wẹẹ: “Ne I ta ẹmwata ma uwa, emwa eso ni mudia vbe emwa na nian i khian wu hiehie, vbe ẹ i re te iran ka bẹghe Arriọba Osanobua nẹ, vbe ọ ghaa khaevbisẹ.”*
2 Ikpẹdẹ ehan ghi gberra nẹ, Jesu keghi rhie Pita, e Jems kevbe Jọn lele egbe, iran ọkpa na hin uhunmwu oke nọ kakabọ yo. Egbe Jesu keghi fi werriẹ sirra iran;
3 ẹwu nọ yọ ke odukhunmwu na suẹn gha fi wainwain, ọ na gha fua kẹkẹkẹ; ọmwaikọmwa nọ họ ukpọn vbe agbọn na i khian sẹtin họ ẹre nọ gha fua vberriọ.
4 Deba ọni, iran keghi bẹghe Ẹlaija kevbe Mozis vbe iran rhiegbe ma, iran na gha gu e Jesu guan.
5 Ẹre Pita na ghi tama e Jesu wẹẹ: “Rabai, ọ wa maan ne ima na rre emwa. Nọnaghiyerriọ, gi ima bọ ibọkpọ eha, ọkpa ọghuẹ, ọkpa ọghe Mozis, nọkpa ọghe Ẹlaija.”
6 E Pita ma ghi kue rẹn vbene ọ khian ru hẹ, rhunmwuda, te ohan wa gha mu iran.
7 Okuku keghi ladian, ọ na rhu gue iran. Iran keghi họn urhu ọkpa vbe uwu okuku nii, nọ khare wẹẹ: “Ọna ọre Ovbi mwẹ, ne I hoẹmwẹ ọnrẹn. Wa danmwehọ ọre.”
8 Vbe ọwara ọkpa nii, iran keghi ghee ehe hia lẹga, iran ma ghi miẹn ọmwa rhọkpa, vbọ gberra e Jesu ọkpa.
9 Vbe iran ghi tuorre dee vbe uhunmwu oke nii, Jesu keghi kakabọ kan rẹn ye iran ehọ, ne iran ghẹ ta emwi ne iran ya aro iran bẹghe ma ọmwa rhọkpa, a te miẹn wẹẹ, Ovbi ọmwa rhiọ kpaegbe vbe idin.
10 Iran keghi kọ ẹmwẹ nii ye ekhọe,* sokpan, iran na gha gu egbe zẹ iro vbekpa emwi nọ yae kha, nọ na wẹẹ irẹn gha rhiọ kpaegbe vbe idin.
11 Ẹre iran na suẹn gha nọ rẹn wẹẹ: “Vbọzẹ ne avbe skraib* na kha wẹẹ, Ẹlaija ẹre ọ khian ka rre?”
12 Ọ keghi tama iran wẹẹ: “Ẹlaija ẹre ọ khian gele ka rre do mwamwa emwi hia vbene ọ khẹke nọ gha ye; sokpan, vbe a ghi na miẹn hẹ wẹẹ, a gbẹn ọnrẹn yotọ wẹẹ, ẹ i mwẹ Ovbi ọmwa ma kakabọ rri oya, kevbe wẹẹ, a gha ru ẹre emwi oya?
13 Sokpan, I tama uwa nian wẹẹ, Ẹlaija gele rre nẹ; vbe ọ ghi rre, iran na gha ru ẹre vbene ọ rhirhi khọn iran, zẹvbe na gbẹn ọnrẹn yotọ vbekpa ẹre.”
14 Iran ghi sẹ eke ne erhuanegbe nikẹre ye, iran na bẹghe ẹre wẹẹ, emwa nibun wa ma ga iran, avbe skraib* na gha gu iran muan ẹmwẹ.
15 Sokpan, emwa hia ni gbẹbu ghi wa bẹghe Jesu, ọ na wa yan iran unu ruan, ẹre iran na rhulẹ bu ẹre ya tuẹ ọre.
16 Ẹre Jesu na nọ iran wẹẹ: “De emwi ne uwa gu iran muan ẹmwẹ yi?”
17 Ẹre ọkpa vbe uwu emwa ni gbẹbu na wanniẹn ọnrẹn wẹẹ: “Ọmamwaemwi, te I mu ovbi mwẹ guẹ, rhunmwuda, orhiọn dan nẹi guan* loo ẹre.
18 Ehe ke ehe nọ na muẹn, ọ ghi rhie ẹre fianmwẹ otọ, ọ ghi suẹn gha hu vbe unu,* ọ ghi gha rri akọn, orhiọn ghi vbe ni ẹnrẹn. I te tama erhuanegbe ruẹ ne iran khu orhiọn dan nii hin ọnrẹn egbe rre, sokpan, iran ma sẹtin.”
19 Jesu na ghi wanniẹn iran wẹẹ: “Eo, orre nẹi mwẹ amuẹtinyan! Inu ẹghẹ ẹre I khian ya gu uwa gha rrọọ? Inu ẹghẹ ẹre I khian vbe zin egbe lele uwa sẹ? Wa ya muẹn gu mwẹ.”
20 Iran keghi mu ọmọ nii gie ẹre, sokpan, orhiọn dan nii ghi wa bẹghe Jesu, ọ na wa rhie ọmọ nii fianmwẹ otọ, ahẹ na muẹn. Ọ ghi de gbe otọ, ọ na gha fuẹn yo fuẹn rre vbe otọ, ọ na gha hu vbe unu.*
21 Ẹre Jesu na nọ erhae wẹẹ: “Inu ẹghẹ ẹre ọ ghi ye na, nọ ke ru ẹre?” Erhae na wẹẹ: “Ke egbe ọvbokhan gha dee nọ,
22 ẹghẹ hia ẹre ọ ya fi ẹre fi uwu erhẹn kevbe uwu amẹ, nọ mieke na gbe ẹre rua. Lahọ, deghẹ ọ mwẹ emwi ne u gha sẹtin ru, tohan ima, ne u ru iyobọ ne ima.”
23 Jesu na ghi nọ rẹn wẹẹ: “Vbọzẹ ne u na kha wẹẹ, ‘Deghẹ ọ mwẹ emwi ne u gha sẹtin ru’? Wẹ ma rẹn wẹẹ, ọmwa ghaa mwẹ amuẹtinyan, a i miẹn emwi nọ gualọ nẹi khian sẹ ọre obọ?”
24 Vbe ọwara ọkpa nii, erha ọmọ nii keghi datu wẹẹ: “I mwẹ amuẹtinyan! Lahọ ru iyobọ mẹ, ne amuẹtinyan mwẹ mieke na wegbe sayọ!”
25 Jesu ghi bẹghe ẹre wẹẹ, emwa bi die eke ne iran ye, ọ na zaro mu orhiọn dan* nii, ọ na tama rẹn wẹẹ: “Wẹ ne orhiọn dan nẹi guan kevbe nọ yin ehọ,* I tama ruẹ nian, ladian vbe egbe ọmọ na, ghẹ vbe werriegbe la uwu egbe ẹre!”
26 Orhiọn dan nii ghi rhie so, ọ na ya ahẹ mu ọmọ nii inugba nọ khin, iyeke ọni, ọ na ladian. Ọmọ nii na ghi yevbe ọmwa nọ wu, rhunmwuda ọni, emwa ni ghi bun sẹ vba na gha kha wẹẹ: “Ọ wu nẹ!”
27 Sokpan, Jesu keghi rhie ọmọ nii obọ, ọ na si ẹre kpaegbe, ẹre ọmọ nii na kpaegbe mudia.
28 Jesu ghi la owa nẹ, erhuanegbe ẹre na do nọ rẹn vbe ẹkhokho wẹẹ: “Vbọzẹ ne ima ma na sẹtin khu orhiọn dan nii?”
29 Ọ na wanniẹn iran wẹẹ: “Emwi ọkpa i rrọọ na khian ya sẹtin khu orhiọn dan vbenian ladian vbọ gberra erhunmwu.”
30 Iran ghi ke evba kpa, iran na ya la e Galili gberra, sokpan, ọ ma hoo ne ọmwa rhọkpa rẹn ehe ne irẹn ye.
31 Rhunmwuda, ọ kegha ma erhuanegbe ẹre emwi, ọ na gha tama iran wẹẹ: “A gha ya Ovbi ọmwa dẹ, a ghi muẹn ye obọ emwa, iran ghi vbe gbe ẹre rua; sokpan, ọ ghaa rre ikpẹdẹ eha ne iran gbe ẹre rua, ọ ghi rhiọ kpaegbe.”
32 Vbọrhirhighayehẹ, iran ma rẹn otọ ẹmwẹ nọ tae, ohan ma vbe gi iran nọ rẹn ọta.
33 Iran keghi sẹ e Kapaniọm. Vbe Jesu ghi rre uwu owa, ọ na nọ erhuanegbe ẹre wẹẹ: “De emwi ne uwa ghaa muan ẹmwẹ yi vbe odẹ?”
34 Iran na wa hunwan kpọkpọkpọ, rhunmwuda, vbe iran rre odẹ, te iran ghaa muan ẹmwẹ ye ẹmwẹ ọmwa nọ ghi kpọlọ sẹ vbe uwu iran.
35 Ẹre ọ na tota, ọ na tie iran Iweva nii, ọ na tama iran wẹẹ: “Adeghẹ ọmwaikọmwa hoo nọ gha re okaro, gi ọmwa nii gha re nokiekie vbe uwu ẹbu uwa, ọ ghi vbe gha re ọguọmwadia uwa hia.”
36 Ẹre ọ na rhie ọvbokhan ọkpa mudia vbe uwu ẹbu iran, ọ na rhie obọ la ẹre urhu, ọ na tama iran wẹẹ:
37 “Ọmwaikọmwa nọ rhunmwuda mwẹ* miẹn egbe ọvbokhan vbenian yi, mẹ ẹre ọ vbe miẹn yi; ọmwaikọmwa nọ vbe miẹn mwẹ yi, ẹ i re imẹ ọkpa ẹre ọ miẹn yi, sokpan, ọ vbe miẹn ọnrẹn yi ighẹ Ọmwa nii nọ gie mwẹ rre.”
38 E Jọn keghi tama rẹn wẹẹ: “Ọmamwaemwi, ma bẹghe orhunmwu ọkpa nọ ya eni ruẹ khulo avbe orhiọn dan, ma na te hia ne ima da ẹre obọ yi, rhunmwuda, ẹ i re ọkpa vbe usun ima.”
39 Sokpan, Jesu na kha wẹẹ: “Wa ghẹ da ẹre obọ yi, rhunmwuda, ọmwa rhọkpa i rrọọ nọ khian ya eni mwẹ ru emwi ọyunnuan, nọ gha wa vbe suẹn gha ta mwẹ ọtakhọ.
40 Rhunmwuda, ọmwaikọmwa nọ ma gbodan ghee ima, obọ ọghe ima ẹre ọ ye.
41 Ọmwaikọmwa nọ vbe sa amẹ ne uwa wọn, rhunmwuda ne uwa na re ọghe Kristi, ne I ta ẹmwata ma uwa, ẹ i mwẹ a ma san rẹn ẹse.
42 Sokpan, ọmwaikọmwa nọ ya ọkpa vbe uwu iran ne giẹrẹ na, ni mwẹ amuẹtinyan rrua owẹ, ọ gha maan sẹ, na dee olọ nọkhua ne ekẹtẹkẹtẹ fi lẹga ye ọre urhu, na ya muẹn fi uwu okun.
43 “Adeghẹ obọ ruẹ na gha ya ruẹ rrua owẹ, fiaẹn rhie fua. Ọ gha maan sẹ ne arrọọ sẹ ruẹ obọ, ọ gha khọnrẹn wẹẹ egbe ma gba nuẹn, na khian ya miẹn wẹẹ, obọ ruẹ eveva ye gba nuẹn, sokpan, a na fi ruẹ fi e Gẹhẹna,* ne erhẹn i na dọyọ.
44 * ——
45 Adeghẹ owẹ ruẹ na vbe gha ya ruẹ rrua owẹ, fiaẹn rhie fua. Ọ gha maan sẹ ne arrọọ sẹ ruẹ obọ, ọ gha khọnrẹn wẹẹ uke ẹre u khin, na khian ya miẹn wẹẹ, owẹ ruẹ eveva ye gba nuẹn, sokpan, a na fi ruẹ fi e Gẹhẹna.*
46 * ——
47 Adeghẹ aro ruẹ na vbe gha ya ruẹ rrua owẹ, fi ẹre fua. Ọ gha maan sẹ ne u ya aro ọkpa la Arriọba Osanobua, na khian ya miẹn wẹẹ, aro ruẹ eveva ye gba nuẹn, sokpan, a na fi ruẹ fi e Gẹhẹna,*
48 eke ne ọkhọe i na wu, ne erhẹn i na vbe dọyọ.
49 “Rhunmwuda, a gha rhurhẹ erhẹn yan emwa hia, vbe na zẹ umwẹ ye emwi.
50 Umwẹ maan, sokpan, deghẹ umwẹ i ghi fian, vbua khian ya ru ẹre hẹ, nọ gha fian? Wa gha mwẹ umwẹ vbe uwu uwa, ne uwa gu egbe gha rrọọ vbe uwu ọfunmwegbe.”
Avbe Futnot
^ Vbe Grik, “vbe ọ gha rre vbe ẹtin.”
^ Ọ sẹtin vbe gha re, “Iran ma ta ẹmwẹ nii ma ọmwa rhọkpa.”
^ Ra “iran ni ma emwa Uhi.”
^ Ra “iran ni ma emwa Uhi.”
^ Ra “orhiọn dan nọ ya ọmwa khian odin.”
^ Ọni ọre, ne asẹn na hu ladian vbe unu ọmwa pọpọpọ.
^ Ọni ọre, ne asẹn na hu ladian vbe unu ọmwa pọpọpọ.
^ Vbe Grik, “orhiọn nọ ma huan.”
^ Ra “orhiọn dan nọ ya ọmwa khian odin kevbe ayenhọ.”
^ Ra “rhunmwuda eni mwẹ.”
^ Ya ghee Apẹndis A3.
^ Ya ghee Apẹndis A3.
