Na Gbẹn Gie Ivbi E Rom 11:1-36
11 Te imẹ ghi nọ nian wẹẹ: Te Osanobua ghi he emwa rẹn ra? Hiehie! Mẹ tobọ imẹ, Ovbi Izrẹl ẹre I khin, ovbi Ebraham* nọ ke uniẹn e Bẹnjamin rre ẹre I khin.
2 Osanobua ma he emwa rẹn, ne irẹn ka wa gha yẹrẹro.* Wa ma ghi yerre ẹmwẹ ne ebe nọhuanrẹn tae vbekpa Ẹlaija, vbe ẹghẹ nọ na gha gui ẹzọ Ivbi Izrẹl ma Osanobua ra?
3 Ọ na wẹẹ: “E Jehova,* iran gbele avbe akhasẹ ruẹ hia rua nẹ, iran vbe guọghọ avbe ogiukpo ruẹ sotọ, mẹ ọkpa kẹkan ẹre ọ ghi wa kẹ, vbene a wa guan na, iran vbe hoo ne iran gbe mwẹ ruan.”
4 Sokpan, de ewanniẹn ne Osanobua ghi rhie nẹẹn? Ọ wẹẹ: “I ye mwẹ orhunmwu arriaisẹn ihinrọn (7,000) ni ma he diguẹ ne Bel.”
5 Erriọ ẹre ọ wa vbe ye vbe ẹghẹ na. Ibozẹghẹ emwa ye rrọọ ne Osanobua zẹ rhunmwuda ẹse ne kpataki* nọ ru ne iran.
6 Adeghẹ ẹse ne kpataki* ẹre Osanobua ru ne iran, ọni rhie ma wẹẹ, iran ma winna yọ; rhunmwuda, akpawẹ te iran winna yọ, ẹ i ghẹ te gia ta wẹẹ, ẹse ne kpataki* ẹre a ru ne iran.
7 De emwi ne ima khian ghi ta? Emwi ne Ivbi Izrẹl wa fie gualọ khian ma sẹ iran obọ, sokpan, emwa na zẹ ẹre ọ ghi sẹ ọre obọ. Te ekhọe iran nikẹre ghi gbin,
8 zẹvbe na gbẹn ọnrẹn yotọ wẹẹ: “Osanobua keghi bọ iran ye ovbe nọ dinmwi, ọ na viọ aro nai ya bẹghe kevbe ehọ nẹi họn ẹmwẹ ne iran, do sẹ ẹdẹnẹrẹ.”
9 E Devid vbe kha wẹẹ: “Gi evbare ne iran re* do gha re akobẹ kevbe ifi nọ ra munọ iran, ọ ghi vbe gha re okuta nọ ra munọ iran gbe otọ, iran ghi vbe rri oya ye emwi ne iran ru.
10 Gi ebiebi so ye iran aro, ne iran ghẹ mieke na bẹghe odẹ; gi iran gha rre ighughẹ khian vbe ẹdagbọn iran hia.”
11 Te imẹ ghi nọ nian wẹẹ: Ẹghẹ ne Ivbi e Ju na rrua owẹ, te iran wa dele guọghua ra? Hiehie! Sokpan, vbe ẹghẹ ne iran ya zẹ owẹ ihan, odẹ keghi kie ne ivbi agbẹnvbo ọvbehe ya miẹn fan, nọ mieke na gha da Ivbi e Ju.*
12 Adeghẹ owẹ ihan ne iran zẹ, zẹ ẹfe ku agbọn, adeghiyeke ọghe iran na vbe zẹ ẹfe ku ivbi agbẹnvbo ọvbehe, vbọ khian ghi wa gha ye hẹ, deghẹ a na si iran hia fẹẹrẹ koko?
13 Wa ne ivbi agbẹnvbo ọvbehe ẹre imẹ ghi gu guan nian. Ugbẹnvbe a miẹn wẹẹ, ukọ na gie bu ivbi agbẹnvbo ọvbehe ẹre I khin, te I wa ya iwinna mwẹ hio,
14 ughaghe I gha ru ẹre vberriọ, ọ sẹtin gha da ivbi ẹvbo mwẹ,* ẹghẹ nii, eso vbe uwu iran ghi vbe do miẹn fan.
15 Ugbẹnvbe a miẹn wẹẹ, odẹ kie ne emwa ni rre uwu agbọn ya do gu Osanobua ru adọlọ rhunmwuda ne Osanobua na he Ivbi e Ju, inu ghi nọ vbe ọ gha ghi miẹn iran yi? Ọ ghi yevbe na miẹn wẹẹ, te iran te wu, sokpan, a na werriegbe huẹn iran kpaegbe!
16 Yevbesọni, adeghẹ abọ nokaro na fian yotọ vbe eflawa na fuẹn na huan, ọni rhie ma wẹẹ, eflawa nii hia na fuẹn vbe huan; adeghẹ inian erhan na huan, ọni rhie ma wẹẹ, avbe abọ ọre vbe huan.
17 Vbọrhirhighayehẹ, a keghi giagia abọ eso kua vbe erhan ọliv nii, a na do viọ uwa ye nene erhan ọliv, agharhemiẹn wẹẹ ọliv nọ rre oha ẹre uwa khin, te uwa ghi vbe gu abọ nikẹre ghae vbe amẹ nọ ke inian ọliv nii rre.
18 Rhunmwuda ọni, ghẹ gha roro ẹre wẹẹ u maan sẹ avbe abọ* na giagia kua. Adeghẹ u na gha roro ẹre wẹẹ u maan sẹ iran,* u ghi yerre wẹẹ, ẹ i re uwẹ ẹre ọ da inian erhan nii yi, sokpan, inian erhan nii ẹre ọ da ruẹ yi.
19 U sẹtin gha kha nian wẹẹ: “Te a giagia abọ eso kua, na mieke na do mu mwẹ yọ.”
20 Ẹmwata ẹre ọni khin! Te a giagia iran kua rhunmwuda ne iran i na mwẹ amuẹtinyan. Sokpan, rhunmwuda ne uwẹ na mwẹ amuẹtinyan ẹre ọ zẹe ne u na rre evba. Vbọrhirhighayehẹ, ghẹ rhunmwuda ọni do gha hio, sokpan, gi ohan gha mu ruẹ.
21 Adeghẹ Osanobua giagia abọ ne abọ ni ka wa gha rre evba kua, ọni rhie ma wẹẹ, ọ gha vbe sẹtin fian ruẹ fua.
22 Ọna ya ima rẹn vbene Osanobua mwẹ ekhọe itohan hẹ kevbe vbene ọ vbe khọọ hẹ. Ọ keghi khọọ mu iran ni dele kua, sokpan, ọ keghi tohan ruẹ; ọ gha ye gha ru vberriọ deghẹ u na mudia ẹse, vbe ẹ i re erriọ, te ọ khian vbe fian ruẹ fua.
23 Nọ ne avbe abọ na giagia kua nii, a gha werriegbe viọ iran ye erhan nii deghẹ iran na werriegbe gha mwẹ amuẹtinyan, rhunmwuda, Osanobua gha sẹtin werriegbe viọ iran yọ.
24 Adeghẹ a giagia uwa ke erhan ọliv nọ rre oha rre, a na do viọ uwa ba erhan ọliv na kọ ye ọkpẹn owa, agharhemiẹn wẹẹ ẹ i re erriọ ẹre a te ya ru ẹre, inu ghi nọ ne abọ ni ka wa gha rre erhan ọliv nii? Ẹ i khian lọghọ a ke werriegbe viọ iran ba erhan ne iran ka gha ye!
25 Etẹn, I hoo ne uwa rẹn ẹmwẹ oro nọhuanrẹn na, ne uwa ghẹ do gha roro ẹre wẹẹ, wa mwẹ ẹwaẹn gbe: Ivbi Izrẹl eso ze vbe udu, erriọ ẹre ọ khian gha ye, a te miẹn wẹẹ, ivbi agbẹnvbo ọvbehe na khian viọ rre gbae.
26 Odẹ vbenian ẹre a khian ya miẹn Ivbi Izrẹl hia fan. Zẹvbe na gbẹn ọnrẹn yotọ: “Ọmiọnmwafan gha ke Zaiọn rre, ọ ghi rhie uyinmwẹ dan hin uniẹn e Jekọb rre.
27 Ọna ọre ile ne I khian gu iran ta, vbe I gha rhie orukhọ ọghe iran hin iran egbe rre nẹ.”
28 Ẹmwata nọ wẹẹ, eghian iyẹn nọ maan ẹre iran khin, sokpan, ne iran na re eghian iyẹn nọ maan, wa keghi do miẹn ere vbọ; sokpan, zẹvbe emwa ne Osanobua zẹ, Osanobua keghi hoẹmwẹ iran rhunmwuda avbe erha iran odede.
29 Osanobua gha ru ẹse ne emwa, ọ na vbe hannọ emwa zẹ, ẹ i gbe I ma rẹn yọ.
30 Emwa nẹi họn ẹmwẹ ne Osanobua ẹre uwa ka gha khin, sokpan, te a ghi tohan uwa nian rhunmwuda iyenhọ ọghe Ivbi e Ju.
31 Erriọ vbe ye, ugbẹnvbe a miẹn wẹẹ, iyenhọ ọghe iran ẹre ọ ghi zẹe ighẹ a tohan uwa, a gha vbe tohan iran zẹvbe na vbe tohan uwa.
32 Te Osanobua sẹ iran hia rae, ne iran gha re eviẹn ọghe iyenhọ, nọ mieke na vbe tohan iran hia.
33 U miẹn vbene Osanobua fe hẹ! U miẹn vbene ẹwaẹn kevbe irẹnmwi ọghẹe dinmwi hẹ! De ọmwa nọ gha sẹtin rẹn otọ vbene ọ ya bu ohiẹn kevbe vbene ọ ya ru emwi hẹ?
34 Zẹvbe ne Ebe Nọhuanrẹn khare: “De ọmwa nọ rẹn ekhọe Jehova?* De ọmwa nọ bu ẹre ude?”
35 Ra, “de ọmwa nọ he rhie emwi nẹẹn mọmọ ẹdẹ, nọ miehe na werriegbe ha ẹre nẹẹn?”
36 Rhunmwuda, irẹn ẹre ọ yi emwi hia, irẹn ẹre ọ zẹe ighẹ iran vbe rrọọ, ọghẹe ẹre ehia vbe khin. Uyi nọ nẹẹn vbe ẹdẹdẹmwẹdẹ. Isẹ.
Avbe Futnot
^ Vbe Grik, “ikpẹ ọghe Ebraham.”
^ Ra “zẹ.”
^ Ya ghee Apẹndis A5.
^ Vbe Grik, “eteburu ọghe iran.”
^ Ra “si igbọvo ye Ivbi e Ju egbe.”
^ Ra “si igbọvo ye ivbi ẹvbo mwẹ egbe.”
^ Ra “ghẹ gha hio ku avbe abọ.”
^ Ra “Adeghẹ u na gha hio ku iran.”
^ Ya ghee Apẹndis A5.
