Ke ukpo na kpa, te ima khian ghi gha mwẹ ẹghẹ nọ somwa ne ima khian ya gha mu egbe yotọ khẹ Ugie Ayere ọghe uwu e Kristi. Ẹghẹ ke ẹghẹ ne Ugie Ayere ghi ya de ye ẹdẹ uzọla, ai khian ghi do iko Uyinmwẹ Kevbe Iwinna Ọghe Ima vbe uzọla nii. Ugie Ayere gha vbe de ye ufomwẹ uzọla, ai khian vbe do iko na te do vbe ufomwẹ uzọla nọ re ọta ọghe azagba kevbe Iruẹmwi Ebe Owa Ọkhẹ. De vbene u khian ya loo ẹkpotọ nọ kie re na vbe odẹ nọ khẹke? Zẹvbe nọ ghaa ye vbe orre nokaro, te ima gha ru emwamwa nọ khẹke ne ima ya mu egbe khẹ ugie ne kpataki na. (Luk 22:7-13; km-E 3/15 1) Sokpan emwi ọvbehe rrọọ ne ima hia gha sẹtin ru, ne ima mieke na gele sọyẹnmwẹ ugie na. De emwi eso ne ima gha sẹtin ru?

• Muẹn roro evbọzẹe nọ na khẹke ne u gha rre ugie na.—1 Kọr 11:23-26

• Muẹn roro vbene asikẹgbe ne u gu e Jehova mwẹ wegbe sẹ hẹ, u ghi vbe na erhunmwu vbekpa re.—1 Kọr 11:27-29; 2 Kọr 13:5

• Tie avbe ebe ọghomwa ni rhan otọ emwi ne Ugie Ayere demu, u ghi vbe ru erria yan rẹn.—Jọn 3:16; 15:13

Etẹn eso keghi tie ako Evbagbẹn Nọhuanrẹn na tie vbe ẹghẹ Ugie Ayere nọ rre Examining the Scriptures Daily; iran ghi vbe ru erria yan rẹn. Eso keghi tie avbe ako ọghe Baibol ni rre isama nọ rre ototọ mwa. Eso vbe rrọọ ni tie avbe ako iruẹmwi ni ladian vbe ebe Owa Ọkhẹ ni rhan otọ emwi ne Ugie Ayere demu kevbe ni guan kaan odẹ ne Jehova kevbe Jesu ya rhie ahoẹmwọmwa ma ima. Obẹlẹ ne u rhirhi loo ya mu egbe yotọ khẹ Ugie Ayere gha ya ruẹ sikẹ e Jehova kevbe Ovbi ẹre sayọ.