EVBỌZẸ NE Ọ NA RU EKPATAKI: Te emwa ne ima gu ruẹ e Baibol gha yegbe iran fiohan ne Jehova kevbe iran ghi dinmwiamẹ, ne Jehova mieke na miẹn iran yi. (1 Pit 3:21) Adeghẹ iran na ghi gha yin vbe odẹ nọ guaẹro ighẹ ayegbe fiohan ọghe iran, iran ghi miẹn igbaroghe ọghe Osanobua vbe odẹ ọghe orhiọn. (Psm 91:1, 2) E Jehova ẹre Ivbiotu e Kristi yegbe fiohan na, ẹi re emwa nagbọn ra iwinna ra otu rhọkpa. Rhunmwuda ọni, te emwa ne ima gu ruẹ e Baibol gha họọnrẹn ahoẹmwọmwa na mwẹ ne Osanobua.—Rom 14:7, 8.

VBENE A YA RUẸ HẸ:

• Vbe ẹghẹ ne uwa ya ruẹ emwi, giẹ rẹn vbene emwi ne uwa ruẹ ya dekaan e Jehova hẹ. Giẹ rẹn vbe nọ ru ekpataki sẹ hẹ ighẹ e Baibol na tie kevbe erhunmwu ne a na gie Jehova vbe “ẹghẹ hia.”—1 Tẹs 5:17; Jems 4:8

• Rhie igiọdu nẹ, nọ gha mwẹ evbakọnrẹn ọghe ayegbe fiohan kevbe idinmwiamẹ. Deba ọni, ru iyobọ nẹ, nọ ya fian okhuo ne kherhe kherhe ne egbe ẹre vbe na ghee ewanniẹ na zẹ vbe iko ra na gha kporhu ma emwa ọvbehe. Yerre wẹẹ, e Jehova i mu ọmwa egbe kpan yọ na ga irẹn. Dọmwadọghẹ ẹre ọ khian zẹ ne egbe ẹre vbe nọ dekaan ayegbe fiohan.—Diut 30:19, 20

• Gua ọmwa ne u gu ruẹ e Baibol kpa nọ ru afiwerriẹ nọ khẹke nọ mieke na ya ẹko rhiẹnrhiẹn e Jehova kevbe nọ sẹtin dinmwiamẹ. (Itan 27:11) Rhunmwuda wẹẹ emwi ne ọmwa guẹ lọghọ na ban, ọmwa ne u gu ruẹ e Baibol keghi gualọ iyobọ ruẹ ke ẹghẹ ya fi ẹghẹ nọ mieke na sẹtin muẹn fua ighẹ akpa nẹdẹ kevbe nọ muẹn yọ ne akpa ọghe ọgbọn. (Ẹfis 4:22-24) Rhiẹre ekhọe ghee avbe uhunmwuta na gba re ikun nọ rre Watchtower nọ re “The Bible Changes Lives”

• Tama rẹn ọyẹnmwẹ ne u he miẹn vbe ugamwẹ ọghe Jehova.—Aiz 48:17, 18