Ke ukpo 2018 gha dee, uhunmwuta ọkpa ẹre ọ ladian vbe ebe iyẹn ọghomwa. Avbe ebe iyẹn na, keghi re ọkpa vbe usun Emadogua Ne A Ya Maa Emwa Emwi. Nọnaghiyerriọ, ma sẹtin gha loo iran vbe ikporhu. Ma sẹtin vbe viọ eso lele egbe vbe ima ghaa mu okhian rrie ehe ra vbe ima ghaa rrie ẹki. Ma i ya avbe ebe iyẹn gu emwa ruẹ Baibol, sokpan iran gha sẹtin ya emwa gha mwẹ ẹkorhiẹnrhiẹnmwẹ ye imamwaemwi ẹmwata ni rre Baibol.

U gha ghi tuẹ ọmwa nii nẹ, u ghi ya unu kaẹn ako ọghe Baibol ọkpa kevbe uhunmwuta ọghe ebe iyẹn nọ gha mu ẹre ekhọe. Vbe igiemwi, adeghẹ ọmwa nọ mwẹ ọmọ mwẹ amwẹ ra ọmwa nọ rre uwu ibavbaro nọ, u sẹtin tama rẹn wẹẹ: “Ọ mwẹ ebe ọkpa ne I da wa tie, nọ gha wa ru iyobọ nuẹn. Ne I gie ẹre ma ruẹ ra?” Adeghẹ ọmwa nii mwẹ ẹkorhiẹnrhiẹnmwẹ, u sẹtin rhie ebe iyẹn ọkpa nẹẹn ra u ghi sẹnd ẹre gie ẹre vbe efoni, ọ gha khọnrẹn wẹẹ, ọni ọre ẹghẹ okaro ne u ya kporhu ma rẹn. Ẹmwata nọ wẹẹ, ẹi re te ima yo ikporhu rhunmwuda wẹẹ ima hoo ne ima ya gha ghae ebe iyẹn, sokpan, ọ gha sẹtin ru iyobọ ne ima ya miẹn emwa ni mwẹ ekhọe ata.—Iwinna 13:48.