Igbama nọ ya iyẹn wewe nọ ma he dinmwiamẹ ẹre u khin ra, ra te a he gu ruẹ tie Baibol? Adeghẹ erriọ nọ, u gha hoo ne u dinmwiamẹ ra? Vbọzẹe nọ na khẹke ne u dinmwiamẹ? Adeghẹ u na ya egbuẹ fiohan ne Jehova, u na vbe dinmwiamẹ, u ghi do gha gu e Jehova mwẹ asikẹgbe ne khuankhuankhuan. (Psm 91:1) Levba sevba, imiẹnfan ghi vbe sẹ ruẹ obọ. (1 Pit 3:21) De emwi ne u gha ru ne u mieke na sẹtin ya egbuẹ fiohan ne Jehova, ne u vbe dinmwiamẹ?

Ọ khẹke ne u ya ekhọe hia yayi wẹẹ, odẹ ẹmwata ẹre ọna khin. Adeghẹ emwi rhọkpa na susu yọ ruẹ aro, ru ezanzan. (Rom 12:2) U ghi vbe zanzan egbuẹ ghee ne u mieke na rẹn ako nọ khẹke ne u winna yan. Ahoẹmwọmwa ne u mwẹ ne Jehova ẹre ọ khẹke nọ gua ruẹ kpa ya ru afiwerriẹ nọ khẹke. (Itan 27:11; Ẹfis 4:23, 24) Gha nọ iyobọ vbe obọ e Jehova vbe ẹghẹ hia. Gha mwẹ ọnrẹn vbe ilẹkẹtin wẹẹ, e Jehova gha ya orhiọn nọhuanrẹn ru iyobọ nuẹn, ne u mieke na sẹtin musọe. (1 Pit 5:10, 11) Ẹrhiọn ne u rhirhi loo i khian de ihoi rua, rhunmwuda, ai miẹn emwi na ya gie ugamwẹ e Jehova!—Psm 16:11.

GHEE VIDIO NỌ MWẸ UHUNMWUTA NỌ KHARE WẸẸ U GHA SẸTIN DINMWIAMẸ, IYEKE ỌNI, A GHI ZẸ EWANNIẸN YE AVBE INỌTA NA:

• De emwi ne etẹn eso ru ne iran mieke na sẹtin dinmwiamẹ?

• De emwi ne u gha ru ne u mieke na gha mwẹ amuẹtinyan nọ gha gua ruẹ kpa ya ya egbuẹ fiohan ne Jehova?

• De emwi nọ gua etẹn eso kpa ya zẹ owẹ nọ khẹke ne iran mieke na gha re nọ gbegba nọ gha sẹtin dinmwiamẹ?

• De afiangbe ne emwa ni ga e Jehova miẹn?

• Vbe a ye a ya egbe fiohan kevbe idinmwiamẹ kha?