Vbe ẹghẹ nẹdẹ, e Jehova keghi mwamwa Ivbi Izrẹl vbe odẹ nọ khẹke. Erriọ wa vbe ru ẹre vbe ẹdẹnẹrẹ, ne eguọmwadia ẹre mieke na sẹtin gha ru ahoo ọghẹe. Vbe uhunmwu otagbọn hia, ma mwẹ abotu ughughan, otako, iko kevbe ẹbu etẹn ni koko yo ikporhu. Ena hia rre usun emwi nọ zẹe ighẹ ima sẹtin gha kporhu iyẹn nọ maan vbe ẹdẹnẹrẹ. Emwa hia ẹre ima kporhu ma, ya sẹ egbe emwa ni zẹ urhuẹvbo ọvbehe.—Arhie 14:6, 7.

U he ka roro ẹre ẹdẹ deghẹ u gha sẹtin ruẹ urhuẹvbo ọvbehe ne u mieke na sẹtin ru iyobọ ne ọmwa ọvbehe ya la odẹ ẹmwata na ra? Ọ gha khọnrẹn wẹẹ u ma miẹn ẹghẹ ya ruẹ urhuẹvbo ọvbehe, u gha sẹtin loo JW Language app ya ruẹ vbene u gha ya sẹtin ya urhuẹvbo ọvbehe kporhu ma emwa. U gha loo emadogua na vbe ikporhu, te ọyẹnmwẹ khian gha sẹ ruẹ vbene ọ ghaa ye ne etẹn vbe orre nokaro vbe ẹdẹ Pẹntikọst, vbe iran “ta ẹmwẹ iwinna nọkhua ne Osanobua winnaẹn,” ma emwa vbe urhuẹvbo iran.—Iwinna 2:7-11.

GHEE VIDIO NỌ MWẸ UHUNMWUTA NỌ KHARE WẸẸ, DO GHA RE ỌSE ỌGHE JEHOVA—YA URHUẸVBO ỌVBEHE KPORHU, IYEKE ỌNI, A GHI ZẸ EWANNIẸN YE AVBE INỌTA NA:

• De ẹghẹ nọ khẹke ne u ya loo JW Language app?

• De emwi eso ni rre uwu ẹre?

• De urhuẹvbo ne emwa zẹ vbe ẹdogbo ne u na kporhu?

• De emwi nọ khẹke ne u ru deghẹ a na miẹn wẹẹ, ọmwa nọ zẹ urhuẹvbo ọvbehe mwẹ ẹkorhiẹnrhiẹnmwẹ?—od-E 100-101 ¶39-41