E Jehova i zẹdẹ hoo ne ọdọ vbe amwẹ rhie obọ gberra eyan ne iran ru vbe ẹdẹ orọnmwẹ. (Mat 19:5, 6) Ọdọ vbe amwẹ nibun vbe otu e Jehova wa sọyẹnmwẹ orọnmwẹ ọghe iran. Vbọrhirhighayehẹ, ai miẹn owa ne ai na gui. Ọ ma khẹke ne ima gha yevbe emwa ni rre uwu agbọn ni roro ẹre wẹẹ, ọlọghọmwa gha wa rhiegbe ma vbe orọnmwẹ, te ọ khẹke ne ọdọ vbe amwẹ wannọ egbe, ne dọmwadẹ ọghẹe khian ọghẹe. Nọnaghiyerriọ, deghẹ ọdọ ra amwẹ ẹre u khin, vbua khian ya gbogba ga orọnmwẹ ọghuẹ hẹ?

Gi ima ghee emwi isẹn nọ gha ru iyobọ nuẹn.

1. Ọ ma khẹke ne u gha gu emwa ọvbehe gbe ọkiẹkiẹ nọ ma khianrẹn, ra ne u gha ya ughe nọ ma khẹke sọyẹnmwẹ egbe, rhunmwuda te emwi vbenian zagha owa.—Mat 5:28; 2 Pit 2:14.

2. Sikẹ e Jehova sayọ, ne u vbe gha ru emwi nọ ya ẹko rhiẹnrhiẹn ọnrẹn vbe orọnmwẹ ruẹ.—Psm 97:10.

3. Ye gha mu akpa ọghe ọgbọn yọ, u vbe gha ru emwi nọ gha ya ọmwa ne uwa gba rre orọnmwẹ gha sọyẹnmwẹ.—Kọl 3:8-10, 12-14.

4. Gha fannọ otọ ẹko ruẹ ma ọmwa ne uwa gba rre orọnmwẹ, u ghi vbe gha gu ẹre guan vbe odẹ ọghe ọghọ vbe ute.—Kọl 4:6.

5. Ọ khẹke ne u gha mwẹ amuroro daa ọmwa ne uwa gba rre orọnmwẹ vbe ọ gha de ọghe emwi ọdọ vbe amwẹ.—1 Kọr 7:3, 4; 10:24.

Ivbiotu e Kristi ghaa ya aro nọ ghaan ghee orọnmwẹ, te iran rhie ọghọ ne Jehova rhunmwuda irẹn ẹre ọ mu orọnmwẹ gbọọ.

GHEE VIDIO NỌ MWẸ UHUNMWUTA NỌ KHARE WẸẸ, TE IMA GHA YA IZINEGBE RHULẸ—GHA LELE AVBE UHI NA LELE VBE NE ULẸ, IYEKE ỌNI, A GHI ZẸ EWANNIẸN YE AVBE INỌTA NA:

• Emwi hia sẹtin wa gha khian hẹnnẹhẹnnẹ vbe emwa gha da rọnmwẹ egbe, sokpan de ọlọghọmwa nọ gha sẹtin rhiegbe ma?

• De vbene ilele ni rre Baibol khian ya ru iyobọ ne ọdọ vbe amwẹ ni roro ẹre wẹẹ iran ma ghi hoẹmwẹ egbe?

• De uhi ne Jehova yi ne avbe ọdọ vbe amwẹ?

• Vbọ khẹke ne ọdọ vbe amwẹ ru ne iran mieke na rọnmwẹ egbe sẹ ota?