RHIEGBE YE IWINNA IKPORHU IYẸN NỌ MAAN | EMWI NỌ GHA YA RUẸ GHA SỌYẸNMWẸ IWINNA IKPORHU SAYỌ
Gha Mwẹ Amuroro
Ọmwa nọ mwẹ amuroro ẹre ọ sẹtin rẹn vbene emwi ye emwa ọvbehe hẹ kevbe emwi ne iran gualọ. Emwa wa rherhe rẹn ọmwa nọ mwẹ amuroro, ekhọe hia ẹre ọmwa vberriọ ya ru iyobọ ne emwa ọvbehe. Ma ghaa mwẹ amuroro daa emwa ne ima kporhu ma, ọ ghi ya iran rẹn wẹẹ e Jehova hoẹmwẹ iran kevbe wẹẹ ọ gbaroghe iran, ọna gha ya iran gha hoo ne iran sikẹ ọre.—Fil 2:4.
Odẹ ughughan ẹre ima ya rhie ẹre ma wẹẹ ima mwẹ amuroro daa emwa ọvbehe. Ma ghaa mwẹ amuroro daa emwa ọvbehe, ọ keghi rhiegbe ma vbe odẹ ne ima ya gbehọ kotọ danmwehọ iran, vbene ima ya guan, uyinmwẹ ima, vbene ima ya ya obọ gbe ekhakha kevbe vbene ugbaro ọghe ima ye hẹ. Adeghẹ ima rhie ẹre ma wẹẹ ima mwẹ ẹmwẹ emwa ọvbehe vbe orhiọn, te ima rhie ẹre ma wẹẹ ima mwẹ amuroro daa iran. Ma ghi hia ne ima rẹn emwi nọ yẹẹ iran, emwi ne iran yayi kevbe vbene emwi ye iran hẹ. Ma sẹtin rhie adia eso ne iran, ma sẹtin vbe ru iyobọ nọ khẹke ne iran, sokpan ọ ma khẹke ne ima kpikpi iran ne iran fiwerriẹ. Emwa ne ima kporhu ma gha miẹn iyobọ ọghe ima yi, ọ keghi ya ima sọyẹnmwẹ iwinna ikporhu sayọ.
GHEE VIDIO NỌ MWẸ UHUNMWUTA NỌ KHARE WẸẸ GHA SỌYẸNMWẸ IWINNA ỌGHE NA YA EMWA KHIAN ERHUANEGBE KRISTI—GHA MWẸ ALAGHODARO VBE ODẸ NE U YA KPORHU—GHA MWẸ AMURORO, IYEKE ỌNI, A GHI ZẸ EWANNIẸN YE AVBE INỌTA NA:
-
De vbene Neeta ya mwẹ amuroro dae Jade vbe Jade ma rherhe rre?
-
De vbene Neeta ya mwẹ amuroro dae Jade vbe Jade wẹẹ irẹn i khian sẹtin ruẹ emwi rhunmwuda ne egbe na wọọ irẹn?
-
Ma ghaa mwẹ amuroro daa emwa ọvbehe, ọ gha ya iran sikẹ e Jehova
De vbene Neeta ya mwẹ amuroro dae Jade vbe Jade wẹẹ irẹn i re ọmwa nọ gua mwamwa emwi?
